Read Hadiyya Maatiwoos Mishiraachcha 12 Bible Online

Maatiwoos Mishiraachcha 12 - Hadiyya bible

Maatiwoos Mishiraachcha 12

¹ Ee ammane Yesuus Usheexxaxxi Ayyaamonne hurbaaxxi worinne higam hee'ukko. Ixxi losaanim sibaatta'a hee'llo'i bikkina hamaamika quxxa'a cukkita'a itimma asheetto'o.

²Farisaawe'uwwi eekka moo'llo'i ammanenne Yesuusina «Ki losaan Usheexxaxxi Ayyaamonne issimmina laboobee'i luwwa issitamisa moo'e!» yito'o.

³ Yesuusim ixxuwwina dabaraa «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe?

⁴ Ixxi Keesammi Mine aagaa qeessuwwiinsi bagaan ixxi te'im ixxenne maqire hee'llo'i manni itimmi hasisoobee'i keesammi qorosho'o itukko.

⁵ Odim Usheexxaxxi Ayyaamonne Keesammi Minenne qeessuwwi ee Usheexxaxxi Ayyaa'm seera gindito'aarem baaxiil ihoobee'isa Seeranne qananaa'llakko'oyyonnihe?

⁶An ki'nnuwwina kuroommo; Keesammi miniinsi lophphookkok keyye yookko.

⁷ ‹Diinate kitimimmi ihoo'n qishixximma iittoommo› yookkok mayyimda'e ihukkisa qoossitakko'oohan ihuta'n bi'ishshibee'i mannanne oogattakkam hee'llakko'oyyo.

⁸Manchi Beet Usheexxaxxi Ayyaaminam annichchomena'e» yukko.

⁹Yesuus ee beyyiinsi maraa Ayihuxxi manni wixxixxi mine aagukko.

¹⁰Eekke'em angi shiihaakkoo mat manchi hee'ukko. Ee ammane Yesuusa kasasseena hassam manni «Seeranne ‹Usheexxaxxi Ayyaamonne manna fayyiissehe› yoohonnihe?» yita'a xa'mmito'o.

¹¹ Yesuusim ixxuwwina «Ki'nnuwwiinsi matina gereechchi yookkok oo gereechchi Usheexxaxxi Ayyaamonne xilli barenne ubuta'n bariinsi fissoobee'ek ayyette?

¹²Eehannata'i gereechchiinsi manchi hinkaa'nna lophphoohane? Ee bikkina Usheexxaxxi Ayyaamonne er luwwa issimma Seer hoorooyyo» yukko.

¹³Ee lasage Yesuus ee anga shiihu mancho «Ki anga biddiqaa'e!» yukko. Ixxim biddiqaa'u ammanenne ee la'm angisam fayya'i ihukko.

¹⁴Ihukkaarem Farisaawe'uwwi ee beyyiinsi fitta'a Yesuusa shitam googo a'llanto'o.

¹⁵Yesuusim eekka la'u ammanenne ee beyyiinsi ille hoo'llukko. Lobakat minaadabim ixxo awwonto'aare hundam fayyiisukko.

¹⁶Oo fayyiisu manni ixxi bikkina mulli keenina kuttambee'isa Yesuus ijaajukko.

¹⁷Oohim ihukkok hiraagaanchi Issaayyaas

¹⁸ «An doo'llummi i awwaadaanchi kane; an iittoommokii eese liiransookkokii ixxotte. I Keesammi Ayyaanam ixxonne issoommo. Ixxim minaadabina iikka hanqo'i oogato'o alallaatookko.

¹⁹Ayyennem fitamooyyo te'im laarooyyo; googonnem ixxi sagara ayyim macceesooyyo.

²⁰Hoongaan keeninam qishixxookko; hara'mmaanchibee'i keenom abooyyookko. Eekkam issookkok hanqo'i oogato'ina beyyi siidameebe'i afeebe'e.

²¹Minaadab hundim ixxonne neeyyato issitamo» yaa wocu hiraag wo'mmoo'isinatte.

²²Habus asheeru bikkina moo'eenaa woceenaa xanoobee'i mancho Yesuus beyyo eebakko'aare Yesuus fayyiisukko. Ee lasage oo manchim moo'eenaa woceenaa xanukko.

²³Minaadab hundim maalalta'a «Ku manchi Daawiit Beet[7] ihoo'n urooyyo» yito'o.

²⁴ Farisaawe'uwwim eekka macceesso'i ammanenne «Ku manchi habusa fissookkok habus adil Bi'eelzeebul uwwu malaayyinnette» yito'o.

²⁵Ihukkaarem Yesuus ixxuwwika sawwite la'aa «Mat adil gassoo uulli manni ixxuwwina'i ixxuwwim qasantaman ihulas oo adillan bi'ookko. Odim mat beero'i te'im mat mi'n abaroos ixxuwwina'i ixxuwwim annanni ikkolas qoxxita'a uulliteena xantamoyyo.

²⁶Sheexaanim Sheexaana fissoohan ihukkaa'lleensi ixxina'i ixxim annanni ihookko. Eehaare ixxek adillan hinkid qoxxaa uulleena xanookko?

²⁷Bi'eelzeebul uwwu malaayyinne an habusa fissoomman ihulas ki'nnuwwik awwonaan ayyi malaayyinne fissitamo? Ee bikkina ki'nnuwwi huushanchanne ixxuwwi oogattamo.

²⁸Ihukkaarem an habusa fissoommok Waa'i Ayyaaninnette ihu bikkina Waa'ik adillan ki'nnuwwi beyyo waaraakko.

²⁹Mat malaayyaam manchika mine aagaa gaassaa manchooma karoo'n ixxi mu'uta bogeena ayyim xanooyyo. Ihukkaarem manchooma karaa lasage mu'uta bogeena xanookko.

³⁰ Iinninne mateeyyoom bee'ek iinninne uullixxamookko. Iinninne maqire wixxaa'oobee'ekim binnaa'ookko.

³¹ Ee bikkina an ki'nnuwwina kuroommo; mannik baaxiilii Waa'inne game'llamoo game'llanchii hundim haafamookko. Ihukkaarem Keesammi Ayyaaninne game'llamoohaannina haafamooyyo.

³²Ayyi manchim Manchi Beetonne jora wocukkaare haafamookko. Ihukkaarem Keesammi Ayyaananne jora wocukkaannina ayyi manchinam ka doollennem ihukko te'im waaroo doollenne haafamooyyo» yukko.

³³ Odim Yesuus «Haqqichchi danaam ihulas ixxi mishim danaam ihookko. Haqqichchimdu jor ihulas ixxi mishim jor ihookko. Haqqichcho la'akkamok ixxi mishinnette.

³⁴ Ki'nnuwwi hamashshi ooso; ki'nnuwwi jor keen ikkakko'i bikkina er woshsha woccakkeena hinkid xantakkamo? Mashka'oomim manni suuminne fissaa wocookkok wodanonne wo'mmaa gatukkane.

³⁵Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko.

³⁶An ki'nnuwwina kuroommo; manni wocu awwaad bee'i woshshi hundinam oogaxxi ayyaamonne xa'mmamookko.

³⁷At muccur ikkoottok te'im keesenne oogatamookkok at woccitti woshshinnette» yukko.

³⁸ Ee lasage Seera losisaanii Farisaawe'uwwii «Losisaancho! Kiinniinsi maalalsiisoo mare'e moo'nneena hansoommo» yito'o.

³⁹ Ixxim dabaraa «Amma'nnatbee'i ka doolli jor manni maalalsiisoo mare'e moo'eena hasookko. Ihukkaarem hiraagaanchi Yoonaasanne ihu mare'iinsi bagaan mulli mare'i uwwamooyyo.

⁴⁰ Geejji qurxummekkichchi godaphphi woronne Yoonaas sas ballaa sas hiimoo hee'ukkisam ee'isam Manchi Beetim sas ballaa sas hiimoo uulli woronne hee'ookko.

⁴¹ Naanaawe'i uulli manni Yoonaas kuru woshsha macceessa'a baaxiilo biiraa yita'a daba'llito'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Yoonaasiinsi lophphookkok keyye yookko.

⁴² Woroo'n qarinne yoo uullina adil hee'llo'i Saaba'am Salamoonika qoorooma moo'lleena uulli tochchiinsi waatto'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Salamooniinsi lophphookkok keyye yookko» yukko.

⁴³Odim Yesuus «Jor ayyaan manniinsi firoo ammane usheexxoo beyyo hasukkuuyyi wobee'i udma'anne kululookko. Ihukkaarem usheexxoo beyyo siidooyyo.

⁴⁴Ee bikkina oo habus ‹Firaa waarummi i mi'n beyyom daba'llaa maroommo› yookko. Daba'llaa maroo ammane oo min fii'amaa ma'lluwwimbee'i muccur ihaa gudaakkoo siidookko.

⁴⁵Ee lasage maraa ixxeensi baassam habussuwwika lamara ixxenne maqire massookko. Ixxuwwim aagga'a eekke'e hee'llamo. Ee manchik duuha'i eraa'llaanniinsi lasaqqek jorookko. Ka doolli jor mannannem ee'isa ihookko» yukko.

⁴⁶Minaadabina Yesuus wocukkuuyyi hee'onam ixxi amaa ixxi abbaayyuwwii atoorassiteena hassa'a biiranne uullita'a hee'llo'o.

⁴⁷Eekke'e hee'u minaadabiinsi mat manchi Yesuusina «Kiyyummaa kiyyabbaayyuwwii keese atoorassiteena hassa'a u'llummanne uullito'ookko» yukko.

⁴⁸Yesuusim dabaraa ixxena «Iyyumma ayyette? Iyyabbaayyuwwim ayyayyaamo?» yukko.

⁴⁹Ee lasage ixxi losaa'n kollonne anga biddiqaa'aa «Iyyummaa iyyabbaayyuwwii ka keeno.

⁵⁰Mashka'oomim iimanenne yoo Iyyanni yukkoka wonshookkok ayyim iyyabbaayyo, iyyaayyattee iyyummattee» yukko.