Read Hadiyya Maatiwoos Mishiraachcha 13 Bible Online

Maatiwoos Mishiraachcha 13 - Hadiyya bible

Maatiwoos Mishiraachcha 13

¹Yesuus ee ballam miniinsi firaa maraa dambalaq gammalanne yoohaannonne

² lobakat minaadabim ixxi beyyo waatta'a wixxito'i bikkina wongiranne firaa afuurukko. Minaadab hundim dambalaq gammalanne uullita'a hee'llo'o.

³Ee lasage dut luwwa kobi'llishshinne «Mat ayyaamo mat manchi sire'e wixeena firukko.

⁴Wixukkuuyyim mat mat sire'i googonne ubukko. Cii'im waaraa feeraa itukko.

⁵Odim mat mat sire'i lobakat buchchi bee'i kinaam uullanne ubukko. Lobakat buchchi bee'i bikkina qaqqisom mutukko.

⁶Ihukkaarem eelliinchi firu ammanenne xaph aad aagubee'i bikkina quubaa gogukko.

⁷Odim mat mat sire'i utti lambe'enne ubukko. Ihukkaarem utti li'aa ee muta xagarukko.

⁸Odim mat mat sire'i harish uullanne ubukko. Oo sire'im mutaa matii xibbe, matim lohayye, matim sade mishukko.

⁹Qoossaa macceesoo macci yookkok macceesona» yaa kurukko.

¹⁰Ee lasage losaan Yesuus beyyo hincita'a «Mahina ixxuwwina kobi'llishshinne kuttoolla?» yita'a xa'mmito'o.

¹¹Yesuusim ixxuwwina «Waa'i adilla'n bikkina manniinsi daphphukkoka laqqakkamisina ki'nnuwwina lachchi uwwamaakko. Ihukkaarem ixxuwwina uwwamukkoyyo.

¹² Mashka'oomim yoohaannina edamaa uwwamookko; lophphookkome. Ihukkaarem bee'aanniinsi oo yoo qaxichchim hooramookko.

¹³An ixxuwwina kobi'llishshinne wocummok moo'llu'uuyyim moo'llambee'i bikkinattee macceessu'uuyyim qoossitambee'i bikkinattee.

¹⁴ Hiraagaanchi Issaayyaas ixxuwwi bikkina ‹Hanqinam ki'nnuwwi macceesimmina macceessakkamo; ihukkaarem qoossitakkamoyyo. Moo'imminam moo'llakkamo; ihukkaarem hindihitakkamoyyo.

¹⁵Mashka'oomim ka mannik wodan duudaakko; maccim macceesoobee'isa gawwaakko. Ixxuwwik illim ifiisamaakko. Eehid ihubeeta'n an ixxuwwa fayyiisoommisina illinne moo'lla'a maccinnem macceessa'a wodaninnem qoossita'a i kollonne daba'llitam hee'llo'o› yaa wocukkok wo'mmoo'isinatte.

¹⁶ «Ihukkaarem ki'nnuwwik illi moo'oo bikkinaa maccim macceesoo bikkinaa maasse'antakko'oo keeno.

¹⁷Hanqinam an ki'nnuwwina kuroommo; hiraagaa'nnek dut keenii lobakat xummaan keenii ki'nnuwwi moo'llakko'oka moo'immina mixxa'a hee'llo'o; ihukkaarem moo'llo'oyyo. Ki'nnuwwi macceessakko'okam macceesseena mixxa'a hee'llo'o; ihukkaarem macceesso'oyyo» yaa dabarukko.

¹⁸Odim Yesuus «Sire'e wixu manchi kobi'llishshi maruchda'e ihukkisa kaba macceessehe.

¹⁹Waa'i adilla'n bikkina macceesaa qoossoobee'ek ayyi manchim hee'ulas oo jor waaraa ixxi wodanonne wixamukkoka feeraa massookko. Googonne wixamu sire'ik kobi'llishshi moo'isookkok eehane.

²⁰«Kinaam uullanne wixamu sire'i moo'isookkok ka sagara macceessa'a ee ammanem liiranchinne aa'llam manna.

²¹Ihukkaarem ammanoominatte bagaan ixxuwwik xaph aad aagubee'i bikkina ka saga'l mashka'inne ixxuwwanne hawwi te'im yaayyanchi afoo ammane qaqqisom amma'nnatiinsi ubbamo.

²²Odim utti lambe'enne wixamu sire'i moo'isookkok Waa'ika sagara macceessam manna. Ihukkaarem ka uulli heechchina kichchechchii godda iittii ee macceesso'i Waa'i sagara xagaraa amadoo bikkina mishbee'i keen ikkamo.

²³Danaam uullanne wixamu sire'i moo'isookkok ka sagara qoossita'a macceessam manna. Oo manni hanqinam misha mishshamo. Ixxuwwikim matii xibbe, mullekim lohayye, mullekim sade mishookko» yukko.

²⁴Odim Yesuus ixxuwwina mulli kobi'llishshinne «Waa'ik adillan danaam sire'e ixxi uullanne wixu mancho labookko.

²⁵Ihukkaarem manni diriiraakkoohaannonne diinakkichchi waaraa aras lambe'enne sinnaara wixaa marukko.

²⁶Aras mutaa mishu ammanenne sinnaarim moo'amukko.

²⁷Ee bikkina mi'n annichchik awwaadaan annichchi beyyo waatta'a ‹Moollanna, ki uullanne danaam sire'e wixxaa hee'llittoyyonnihe? Eehannah sinnaar hanniinsi waarukko?› yito'o.

²⁸Ixxim ‹Kaka issukkok diinakkichcho› yaa dabarukko. Ixxi awwaadaanim ‹Moollanna, sinnaarooma shuqunnona hassoohonnihe?› yito'o.

²⁹Ixxim ‹Eehideyyo; sinnaara shuquntakkam ammane arasam gossakkam bikkina

³⁰muraxxi amman afeebe'e lamim maqirem li'llona. Muraxxi ammane muroo keenina sinnaarooma gaassitakka'a feettakka'a hoollehe; giirannem shokkoo'isina wixxaa'llakka'a kallehe. Ihukkaarem hurbaatooma wixxaa'llakka'a i sechchonne issehe!› yoommo» yukko.

³¹Yesuus odim mulli kobi'llishsham «Waa'i adillan mat manchi massaa ixxi uullanne wixu shaa'n sire'i'nnoo'i sire'e labookko.

³²Oo sire'i mulli sire'i hundiinsim gootto'o. Ihukkaarem li'oo ammane duubbonne wixakkam luwwi hundiinsim lophphaa haqqichchisa ihookko. Ee lasage cii'i waaraa caaffuwwanne do'nna baxaa usheexxookko» yukko.

³³Odim Yesuus mulli kobi'llishshinne «Waa'i adillan mat meentichcho sas qunni qamanne edda'a qufisso'i ursho'o labookko. Oo ursho'i qufisso'i qam hundoomam hufaa'ukko» yukko.

³⁴Yesuus ka woshshi hundam minaadabina kobi'llishshinne kurukko. Kobi'llishshi bee'eka maham wocukkoyyo.

³⁵ Oohim hiraagaanchinne «Kobi'llishsha wocimminne i suume fooqaa'oommo. Uulli qooccamukkaanniinsi ki'isaa maaxamukkokam wocoommo» yukkok wo'mmoo'isinatte.

³⁶Yesuus ee lasage minaadaba uraa mine aagukko. Ixxi losaanim ixxi beyyo waatta'a «Aras woronne wixamu sinnaa'l kobi'llishsha niina tittaa kure» yito'o.

³⁷Yesuusim «Danaam sire'e wixukkok Manchi Beeto.

³⁸Abuulloom ka uulla; danaam sire'im Waa'i adilla'n ooso. Sinnaaroom Sheexaa'n ooso;

³⁹sinnaara wixu diinakkichchim Sheexaancho. Hurbaata murimmi ammanoom doolli beeddichcha; muroo keenim Waa'i asse'amaano.

⁴⁰Sinnaarooma feerakka'a giiranne shokkiisakkamisa doolli beeddichchannem ee'isa ihookko.

⁴¹Manchi Beet ixxi asse'amaano asse'ookko. Ixxuwwim baaxiilina mashka'i ikko'i keenoo jora baxxam keenoo hundam Waa'i adilla'n woriinsi wixxaa'lla'a fissita'a

⁴²xoo'oobee'i giiranne eddamo. Eekke'em wi'llitamoo inqe iiccamoo.

⁴³Ihukkaarem xummaan keen Waa'i adillanonne eelliinchisa caakkissamo. Qoossaa macceesoo macci yookkok macceesona» yukko.

⁴⁴Odim «Waa'i adillan abuulli woronne maaxamu diinate labookko. Mat manchi ee diinate siidu ammanenne dabaraa waammukko. Oo manchi liiramu bikkina maraa ixxena yoo luwwa hundam biteesaa ee uulla bitaa'ukko» yukko.

⁴⁵Odim «Yesuus Waa'i adillan worqa siideena mixoo daddaraancho labookko.

⁴⁶Danaam worqa siidu ammanenne ixxena yoo luwwi hundam biteesaa ee worqa bitaa'ukko» yukko.

⁴⁷Odim Yesuus «Waa'i adillan dambalaqanne darabamaa hundem hagar qurxumme'iinsim wixxaa'u shikka labookko.

⁴⁸Shikkanne qurxumme'i wo'mmu ammanenne gosaasakka'a dambalaq tochchonne fissakko'o. Ee lasage afuurakka'a danaam danaam qurxumme'e sanannanne wixxaa'akko'o. Ihukkaarem jor jora uunjakko'o.

⁴⁹«Ee'isam lasaanchi doollenne Waa'i asse'amaan waatta'a xummaan kee'n lambe'iinsi jor keeno annanni issita'a

⁵⁰xoo'oobee'i giiranne darabbamo. Ee beyyonnem ixxuwwi wi'llitamoo inqe iiccamoo» yukko.

⁵¹«Ka woshsha hundam qoossitakka'atennihe?» yukko. Ixxuwwim «Eeyya!» yita'a dabatto'o.

⁵²Odim Yesuus «Ee bikkina Seera losisaa'nnek ayyim Waa'i adilla'n bikkina losoo ammane ixxi mu'uta dissu beyyiinsi haareechchi mu'utaa moosir mu'utaa hundam fissoo mi'n annichcho labookko» yukko.

⁵³Yesuusim ee kobi'llishsha wocaa guullukkisam ee beyyiinsi marukko.

⁵⁴Ixxim ixxi uulla daba'llaa waaraa wixxixxi minenne manna losisimma asheerukko. Ee bikkina manni maalalaa «Ku manchi ka lachchaa aganna issoo malaayyee hanniinsi siidukko?

⁵⁵Kuk haqqa cabbaraanchina beetoyyonnihe? Ixxi amdu Maaraametteyyonnihe? Ixxi abbaayyuwdu Yaaqoobatte, Yoosa'atte, Simi'oonattee Yihudatteyyonnihe?

⁵⁶Odim ixxi aayyuwwi hundim niinninne maqire yo'i keenoyyonnihe? Eehaara'i ku manchi ka luwwi hundam hanniinsi siidukko?» yito'o.

⁵⁷ Ee mashka'inne ixxo sabbo'o. Ihukkaarem Yesuus ixxuwwina «Hiraagaanchi lomba siixxoobee'ek xale'i ixxi uullannettee ixxi minennettee bagaan mulli beyyonne hannonnem lomba siixxookko» yukko.

⁵⁸Amma'nnitobee'i bikkina ee beyyonne maalalsiisoo baxika lobakata Yesuus baxukkoyyo.