Read Hadiyya Maatiwoos Mishiraachcha 14 Bible Online

Maatiwoos Mishiraachcha 14 - Hadiyya bible

Maatiwoos Mishiraachcha 14

¹Ee doollenne Galii'l uullina gassaanchi hee'u Heeroodis Yesuus bikkina manni er sado wocukkuuyyi macceesaa

²ixxena awwaaddam keenina «Kuk Xammaqaanchi Yohaannisatte; lehiinsi ki'aakko. Ka aganna baxoollak ee bikkinatte» yukko.

³ Heeroodis ixxi abbaayyi Filiphphoosina arette hee'llo'i Heeroodiyaad mashka'inne Yohaannisa amadiisaa karaxxi minenne kassiisaa hee'ukko.

⁴Kassiisu mashka'im «Kiyyabbaayyi are at eebbona Seer uwwooyyo» yaa Heeroodisina Yohaannis wocam hee'u bikkinatte.

⁵Ee bikkina Yohaannisa sheena Heeroodis hasam hee'ukko. Ihukkaarem minaadab ixxo hiraagaanchi issaa moo'am hee'u bikkina minaadaba baddukko.

⁶Heeroodis qaramu ayyaamo lonsakkam balla weeshamu manni illagenne Heeroodiyaad landichcho kajja kadda'a Heeroodisa liiransito'o.

⁷Ee bikkina xa'mmito'i luwwi hundam uwweena hide'ukko.

⁸Landichchom is ama soggo'isinne «Xammaqaanchi Yohaannisika gaanjiinsi iim yooqaxa qunuunchonne issitaa kaba uwwe» yito'o.

⁹Ee woshshanne adil kichche'ukko. Ihukkaarem koyyi illagenne hide'aa hee'u bikkina isena uwwakkamisina ijaajukko.

¹⁰Ee bikkina manna asse'aa Yohaannisika gaanje karaxxi minenne mussiisukko.

¹¹Muramu horoorem qunuunchonne issakka'a eebakka'a landichchona uwwakko'o. Isem amana massita'a uwwito'o.

¹²Yohaannis losaanim waatta'a leeshooma massita'a waammito'o. Ee woshsham matta'a Yesuusina kutto'o.

¹³Yesuusim Yohaannis lehukkisa macceesu ammanenne wongiranne aagaa ee beyyiinsi manni bee'i beyyo mullam marukko. Minaadabim eekka macceesso'i ammanenne beero'uwwiinsi lokkinne ixxo awwonto'o.

¹⁴Yesuusim wongiriinsi firu ammanenne lobakat minaadaba moo'aa qishixxukko. Jabbaano fayyiisukko.

¹⁵Uulli hiimu ammanenne Yesuusik losaan ixxi kollonne hincita'a «Ku beyyi manni gatti bee'i beyyo. Ammanim hiimaakko. Ee bikkina gattuwwa matta'a ixxuwwi gagina hurbaata bito a'llitamisina ka minaadaba geegeese» yito'o.

¹⁶Yesuusim «Ittam luwwa ki'nnuwwi uwwehe bagaan marimmi hasisooyyo» yukko.

¹⁷Ixxuwwim «Niina'i yookkok xale'i onti xeffo'i qorosho'oo lam qurxumme'ee» yita'a dabatto'o.

¹⁸Ixxim «Eeqaxam i beyyo eebbehe!» yukko.

¹⁹Minaadabim hixenne afuuroo'isina ijaajukko. Ee lasage ontem xeffo'i qorosho'oo lamem qurxumme'ee amadaa iimane moo'aa Waa'a galaxxaa qorosho'o iiqansaa ixxi losaanina uwwukko. Ixxi losaanim minaadabina uwwito'o.

²⁰Minaadab hundim itta'a goddita'a gatu giggira tommonnee lam sanfonnee wonshita'a ki'isso'o.

²¹Itu minaadabim meentii oosii xigamoo'n xale'i goon onti kuma ihooqax hee'ukko.

²²Ee lasage minaadaba geegeesukkuuyyi ixxi losaan wongiranne aagga'a dambalaq eeqidonne ixxeensi gaassita'a fittamisina Yesuus ijaajukko.

²³Minaadaba geegeesaa lasage Waa'a uunxeena mullam duunanne firukko. Uulli hiimaa lasagem ixxi ee beyyonne mullam hee'ukko.

²⁴Ee ammane wongir dambalaq tochchiinsi qee'llaa hee'ukko. Malaayyaam hafachchi ki'aa hee'u bikkina ixxi losaan hambu'llaminne hawwitam hee'llo'o.

²⁵Luxxi antabaa'i muuneena ihaakkoohaannonne Yesuusim dambalaq hanenne taakke'ukkuuyyi ixxi losaa'n kollonne waarukko.

²⁶Ixxi losaanim dambalaqanne taakke'ukkuuyyi maroo'isa moo'llo'i ammanenne «Kuk wiidda» yita'a lobakata baddita'a laatto'o.

²⁷Ihukkaarem Yesuus ee ammanem «Anette; badditakkotte» yaa wocukko.

²⁸Pheexiroosim ixxena dabaraa «Moollanna! Atette ikkilas wo'i hanenne taakke'aa ki beyyo waaroommisina ijaaje!» yukko.

²⁹Yesuusim «Waare» yukko. Ee bikkina Pheexiroos wongiriinsi firaa Yesuus beyyo afeena dambalaq hanenne taakke'ukkuuyyi marukko.

³⁰Ihukkaarem ee malaayyaam hafachcha moo'u ammanenne baddukko. Wo'onnem xuuxamukkuuyyi maru ammanenne «Moollanna! Eese gatise!» yaa laarukko.

³¹Yesuusim qaqqisaa Pheexiroosika anga amadaa «Kiikki amma'nnat gootto'o. Mahina maltitto?» yukko.

³²Ixxuwwim wongiranne aaggo'i ammanenne hafachchi uullukko.

³³Wongi'l woronne hee'llo'i losaanim «Hanqinam at Waa'i Beeto!» yita'a otossito'o.

³⁴Ixxuwwim dambalaqa fitta'a Gensereexa yakkam uulla waatto'o.

³⁵Ee uullanne hee'llo'i mannim Yesuusatte ihukkisa inkiinnito'i ammanenne gadanonne yoo uulli hundam asse'lla'a jabbaano ixxi beyyo eebbo'o.

³⁶Jabbaanim ixxi eddechchika kasoomam nakkimmina uunxitam hee'llo'o. Nakkito'i keen hundim fayye'llo'o.