Read Hadiyya Maatiwoos Mishiraachcha 15 Bible Online

Maatiwoos Mishiraachcha 15 - Hadiyya bible

Maatiwoos Mishiraachcha 15

¹Ee lasage Farisaawe'uwwii Seera losisaanii Yerusaaleemiinsi Yesuus beyyo waatta'a

²«Ki losaan anno'i losano mahina ginditamuulla? Mashka'oomim hurbaata ittam ammane losa'nnisa anga aanshaqqitamoyyo» yita'a xa'mmito'o.

³Yesuusim ixxuwwina «Ki'nnuwwim ki'nnuwwi losa'n bikkina Waa'i ijaajo mahina ginditakkamuulla?

⁴ Mashka'oomim Waa'i ‹Kiyyannaa kiyyummaa lonse. Ayyim ixxi annanne te'im ixxi amanne jor sagara wocookkok lehona› yaakko.

⁵Ihukkaarem ki'nnuwwi mat manchi anninaa amanaa ‹Iinniinsi siiddakkam hara'mmato Waa'ina kitim issaa hincaa'aammo› yulas

⁶‹Oo manchi anna te'im ama lonsimmi hasisooyyo› yitakkamo. Ki'nnuwwika losano qoxxisimminaa yitakka'a Waa'ika ijaajo ginditakkamo.

⁷Birantakkam keeno, Issaayyaas ki'nnuwwi bikkina

⁸ ‹Ku minaadab eese lonsookkok xale'i suuminnette bagaan ixxuwwik wodan iinniinsi qee'llaakkoohane.

⁹Manni losanoo heechchi qaanqaa See'llisa issita'a losissu'uuyyi kora'am iina otossitamo› yaa wocu hiraag hanqo'ane» yukko.

¹⁰Odim Yesuus minaadaba ixxi beyyo weeshaa «Qoossitakka'a macceessehe.

¹¹Mancho haashaassookkok suumiinsi firoohane bagaan suuminne aagoohaneyyo» yukko.

¹²Ee ammane losaan Yesuus beyyo hincita'a «Kaba at woccitti woshshanne Farisaawe'uwwi qolanto'isa laqqittonnihe?» yito'o.

¹³Yesuusim dabaraa «Iimanenne yoo Iyyanni kaasubee'i haqqi hundim xoqolamookko.

¹⁴ Ixxuwwik illi qooqaakkoo awwonsaan ikko'i bikkina ixxuwwa uttakka'a ullehe. Qooq qooqa awwonsulas lamim baallenne ubbamo» yukko.

¹⁵Ihukkaarem Pheexiroos Yesuusina «Kobi'llishshoom mayyimda'e niina caakkissaa kure» yukko.

¹⁶Yesuusim ixxuwwina dabaraa «Ki'nnuwwi kabad afeebe'em qoossitakkamoyyonnihe?

¹⁷Manchi suuminne aagookkok hundim godabonne dillaa ee lasage ixxi orachchiinsi shum ihaa firoo'isa qoossitakkamoyyonnihe?

¹⁸ Ihukkaarem suumiinsi firookkok wodaniinsi firoo bikkina manna haashaassookkokim ixxotte.

¹⁹Mashka'oomim jor sawwit, manna shimmi, mine issakkoo'n saa'immi, mine issakka'a saa'immi, game'immi, qophphanonne naqqasimmii mannika summa bi'isimmii hundim wodaniinsi firookko.

²⁰Manna haashaassookkok ee keeno bagaan losa'nnisanne anga aanshaqqakkoo'n itimmi manna haashaassooyyo» yukko.

²¹Yesuus ee beyyo uraa Xiiroosikaa Siidoo'n beero'oo marukko.

²²Ee uullanne hee'llam Kaana'aa'n uulli mat meentichcho ixxi beyyo waatta'a «Daawiit Beet i Moollanna, iina qishixxe! I landichcho malaayyaam habus amadaa jorisa hawwitamuulla» yitu'uuyyi laatto'o.

²³Ihukkaarem Yesuus isena matem sagaram dabarukkoyyo. Ee ammane Yesuusik losaan ixxi kollonne hincita'a «Tu meentichcho neese awwontu'uuyyi laatta'a hawwisso'i bikkina ise geegeese» yita'a uunxito'o.

²⁴Ixxim «An asse'amummok gereebbisa bi'llo'i xale'i Isra'ee'l minaadabinatte» yaa dabarukko.

²⁵Ihukkaarem oo meentichcho waatta'a Yesuus lokkonne ubba'a «I Moollanna, iina hara'mme!» yito'o.

²⁶Yesuusim isena dabaraa «Oosika hurbaata ki'isakka'a wishina uwwimmi hasisooyyo» yukko.

²⁷Isem dabatta'a «Moollanna! Hanqame; ihukkaarem wishim moollanni leemaatiinsi ubu furfuro'o itookko» yito'o.

²⁸Yesuusim dabaraa «Taa meentichche, ki amma'nnat lophphaakkoohane. Ee bikkina at hassitti luwwi ihona» yukko. Is landichchom ee ammanem fayye'llo'o.

²⁹Yesuus ee beyyiinsi uraa Galii'l Dambalaq gadano waaraa duunanne firaa afuurukko.

³⁰Lobakat minaadabim dimmuwwa, qooqquwwa, shiihuwwaa duudduwwaa mulli dut jabbaanom Yesuus beyyo eebba'a ixxi gadanonne dissito'aare Yesuus fayyiisukko.

³¹Ee bikkina minaadabim duudduwwi woccu'uuyyi, shiihuwwi fayye'llu'uuyyi, dimmuwwim taakke'llu'uuyyii illi qooqquwwim moo'llu'uuyyii moo'llo'i ammanenne maalalta'a Isra'ee'l Waa'a galaxxito'o.

³²Yesuus ixxi losaano weeshaa «Ku minaadab iinninne maqire sas balla afuutto'i bikkina ittam luwwi ma'lluchchim bee'e. Ee bikkina an ixxuwwina lobakata qishixxaammo. Elle'llam ammane googonne hoogga'a ubbambee'isina hurbaata ittoo'n geegeeseena hasoommoyyo» yukko.

³³Losaanim «Ka minaadab hundinam ihoo hurbaata neese ka udma'anne hanniinsi siindoommo?» yito'o.

³⁴Yesuusim «Ki'nnuwwina hinkaa'n qorosho'i yookko?» yaa xa'mmukko. Ixxuwwim «Lamar xeffo'i qorosho'ii gootto'i qurxummekkichcha'ik hoffokimii yookko» yito'o.

³⁵Ee lasage minaadab uullanne afuuroo'isina Yesuus ijaajaa

³⁶lamarem xeffo'i qorosho'oo qurxumme'ee ki'isaa Waa'a galaxxukko. Iiqaahim ixxi losaanina uwwukkaare losaan minaadabina uwwito'o.

³⁷Hundim itaa goddaa lasage gatu giggira losaan wixxaa'lla'a lamar sanfonne wonshita'a ki'isso'o.

³⁸Itu minaadabim meentii oosii exxaa xigamoo'n soor kum hee'ukko.

³⁹Yesuusim minaadaba geegeesaa lasage wongiranne aagaa Magdoona[8] yakkam uulla marukko.