Read Hadiyya Maatiwoos Mishiraachcha 16 Bible Online

Maatiwoos Mishiraachcha 16 - Hadiyya bible

Maatiwoos Mishiraachcha 16

¹ Mat mat Farisaawe'uwwii Saduuqaawe'uwwii Yesuus beyyo waatta'a Yesuusa keenteena hasso'i bikkina iimaniinsi maalalsiisoo mare'e moo'isoo'isina xa'mmito'o.

²Ihukkaarem Yesuus ixxuwwina «Eelliinchi aagoo ammane ‹Iiman kasharaakko; ee bikkina xeen ga'nnooyyo› yitakkamo.

³Odim soodaraar dara ‹Uulli duubaakko; kaballa xeen ga'nneenatte› yitakkamo. Iima'nneka saarayyitakka'a laqqakkamo. Ihukkaarem doollika mare'e annanni issitakka'a hiraaggakkeena xantakkamoyyo.

⁴ Amma'nnat bee'i ka doollik jor manni maalalsiisoo mare'e hasookko. Ihukkaarem hiraagaanchi Yoonaasanne ihu mare'iinsi bagaan mulli mare'i uwwamooyyo» yukko. Ee lasage Yesuus ixxuwwa uraa marukko.

⁵Losaanim dambalaq eeqido qorosho'ika maham amaddoo'n xadda'a waatto'isa tiitto'o.

⁶ Yesuusim ixxuwwina «Farisaawe'uwwaanniinsii Saduuqaawe'uwwi ursho'iinsii qoxxitakka'a ege'llehe» yukko.

⁷Ixxuwwim «Kid yu mashka'i neese qorosho'o amandoo'n waallummi bikkinatti ihoo'n urooyyo» yaqqanto'o.

⁸Ihukkaarem Yesuus ixxuwwi sawwixxeka la'aa «Ki'nnuwwi ka amma'nnat bee'i keeno; qorosho'o amaddakkobee'i bikkina ki'nnuwwina'i ki'nnuwwim mahina woccakkamuulla?

⁹ Kabad afeebe'em qoossitakkamoyyonnihe? Onti xeffo'i qorosho'i onti kum mannina ihaa gatukkaare manni itaa gatu giggira mee'i sanfonne wonshitakka'a ki'issakkoda'e tiittakkamoyyonnihe?

¹⁰ Odim lamar xeffo'i qorosho'i soor kum mannina ihaa gatukkaare mee'i sanfonne wonshitakka'a ki'issakkoda'e sawwitakkamoyyonnihe?

¹¹Eehaara'i an ki'nnuwwina ‹Farisaawe'uwwaanniinsii Saduuqaawe'i ursho'iinsii ege'llehe!› yaa wocummok qorosho'i bikkinatte ihubee'isa hinkid qoossitakkamoyyo?» yukko.

¹²Ee lasage losaan Yesuus wocukkok Farisaawe'ii Saduuqaawe'ii losissam losishshiinsi ege'llitamisinatte bagaan ursho'i bikkinatte ihubee'isa qoossita'a laqqo'o.

¹³Filiphphoos Qiisaariya yakkam uulla Yesuus afu ammanenne ixxi losaanina «Manchi Beeto manni ayyette yoolla?» yaa xa'mmukko.

¹⁴ Ixxuwwim dabatta'a «Mat mat manni ‹Xammaqaanchi Yohaannisatte› yitamuulla. Mulli keenim ‹Eeliyaasatte› yitamuulla. Mulli keen odim ‹Ermiyaasatte› te'im ‹Hiraagaaniinsi mato› yitamuulla» yito'o.

¹⁵Odim Yesuus «Eehaare ki'nnuwdu eese ayyette yitakkamuulla?» yaa xa'mmukko.

¹⁶ Ee ammanenne Simi'oon Pheexiroos «At hee'oo Waa'i Beet Kiristoosatte» yaa dabarukko.

¹⁷Yesuusim dabaraa «Yoona'i beet Simi'oona, at maasse'antaattoohane. Mashka'oomim kaka kiina la'isukkok iimanenne yoo Iyyanna bagaan ki mannoomayyo.

¹⁸Ee bikkina an kuroommo; at Pheexiroosatte. Ka ki'n hanenne amma'nnaa'n wixxite baxoommo. Leh malaayyim ixxo kaa'eena xanooyyo.

¹⁹ An kiina Waa'i adilla'n fooqaa'aancho uwwoommo. Uullanne kattittok iimanennem karamaakkoohane; uullanne tittittok iimanennem tiramaakkoohane» yukko.

²⁰Ee lasage Yesuus ixxi losaanina «An Kiristoosatte ihummisa ayyenam kuttakkotte» yaa ijaajukko.

²¹Ee ammaniinsi ki'isaa Yesuus ixxi losaanina «Lommanniinsi, qeessa awwonsaaniinsii Seera losisaaniinsii lobakat hawwo aa'aa leheenaa lehiinsim saxxi ballanne ki'eenaa an Yerusaaleema marimmi hasisookko» yaa kurimma asheerukko.

²²Ihukkaarem Pheexiroos Yesuusa mullam haxonne fissaa «Moollanna, eekka Waa'i eeboone; kuk keesenne hore'em afoone!» yaa hooreena yakukko.

²³Ihukkaarem Pheexiroos kollonne Yesuus daba'llaa «Sheexaancho, iinniinsi qee'lle! At iina qolaanchi ikkaatto. Mashka'oomim at sawwitoottok mannisa bagaan Waa'isayyo» yukko.

²⁴ Ee lasage Yesuus ixxi losaanina «Ayyim eese awwoneena hasulas ixxi gaga lagona. Lehinam gudaa eese awwonona.

²⁵ Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok ixxi foore siixxookko.

²⁶Mat manchi ka uulli amaxxa hundam siixxaa ixxeka foore bi'isuta'n ixxena maha awwaadoo? Te'im mat manchi ixxeka foore mahinne bitaa'eena xanoo?

²⁷Manchi Beet ixxi anni lombinnee iima'n asse'amaaninnee maqirem waarookko. Ee ammane manni hundinam annannichchi baxisam miqookko.

²⁸Hanqinam an ki'nnuwwina kuroommo; Manchi Beet ixxi adillaninne waarukkuuyyi moo'lleebe'i afeebe'e ka beyyonne yo'i mannik mat mat keen letamoyyo» yukko.