Read Hadiyya Maatiwoos Mishiraachcha 17 Bible Online

Maatiwoos Mishiraachcha 17 - Hadiyya bible

Maatiwoos Mishiraachcha 17

¹ Loh balliinsi lasage Yesuus Pheexiroosa, Yaaqoobaa Yaaqoob abbaayyi Yohaannisaa mulli keeniinsi annanni issaa awwonsaa mat lob duunanne firukko.

²Eekke'em ixxuwwi moo'llu'uuyyim Yesuus mulli hagaranne daba'llukko. Ixxek illi kollim eelliinchisa caakkisukko. Eddechchim belecce'oo qadaalli ihukko.

³Ee lasage Muse'ennee Eeliyaasinnee Yesuus atoorarukkuuyyi sasem losaanim moo'llo'o.

⁴Pheexiroosim Yesuusina «Moollanna! Neese ka beyyonne hee'nnumta'n danaamo; at hassittaare sas daasa matoo kiina matoo Muse'ena matoo Eeliyaasina baxoommo» yukko.

⁵ Pheexiroos eekka wocukkuuyyim lobakata belecce'oo umbu'l waaraa ixxuwwa ifiisukko. Umbu'l woriinsim «An iittoommi i beet, ixxonnem an liiramoommok kane; ixxeensi macceessehe!» yoo sagar waarukko.

⁶Losaanim ee sagara macceesso'i ammanenne lobakata muggito'i bikkina illillaachcha ubbo'o.

⁷Ihukkaarem Yesuus ixxuwwi kollonne hincaa ixxuwwa nakkaa «Badditakkotte; ki'llehe» yukko.

⁸Ixxuwwim iimita'a moo'llo'i ammanenne Yesuusiinsi bagaan matom moo'llo'oyyo.

⁹Duuniinsi dillitu'uuyyi Yesuus ixxuwwina «Manchi Beet lehiinsi ki'eebe'i afeebe'e ki'nnuwwi moo'llakko'oka ayyenam kuttakkotte» yaa ijaajukko.

¹⁰ Losaanim «Eehaare Seera losisaan ‹Gaassaa Eeliyaas waarimmi hasisookko› yitamok mahinatte?» yita'a Yesuusa xa'mmito'o.

¹¹Yesuusim dabaraa «Eeliyaas gaassaa waarookko. Ixxim hundem luwwam gudisookko.

¹² Ihukkaarem an ki'nnuwwina kuroommo; Eeliyaas gaassim waaraakko. Waarukkaarem minaadab ixxo laqqo'oyyo. Ee bikkina ixxo hasso'is hundam issito'o. Ee'isam Manchi Beetim ixxuwwi angiinsi hawwo aa'ookko» yukko.

¹³Losaanim ixxi wocam hee'ukkok Xammaqaanchi Yohaannis bikkinatte ihukkisa laqqo'o.

¹⁴Ixxuwwim minaadaphphi beyyo waatto'i ammanenne mat manchi Yesuus beyyo hincaa ixxi illagenne guruphphaa

¹⁵«Moollanna! I beetina qishixxe! Xafanni amadaa jorisa hawwoolla. Lobakat ammanem giirannee wo'onnee ubbuusoolla.

¹⁶An ixxo ki losaa'n beyyo eebaa hee'ummo. Ihukkaarem ixxuwwi fayyiisseena xanto'oyyo» yukko.

¹⁷Yesuusim «Ki'nnuwwi hinkido'i amma'nnat bee'i boqqi qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo? Hino'o, beetooma i beyyo eebbehe» yukko.

¹⁸Yesuusim habusa ijaaju ammanenne beetiinsi habus firukkaare ee ammanem fayye'ukko.

¹⁹Ee lasage ixxi losaan Yesuus beyyo hincita'a «Neese habusa fissineena xannumbee'ek mahinatte?» yita'a mulli manni macceesoobee'isa xa'mmito'o.

²⁰ Yesuusim «Ki'nnuwwik amma'nnat hoffan ihu bikkinatte. Hanqinam an ki'nnuwwina kuroommo; winxo'i shaa'n sireqax amma'nnat ki'nnuwwina hee'uta'n ka duuna ‹Ka beyyiinsi ki'llaa eekke'e mare› yitakko'aare marookko. Ki'nnuwwa kaa'oo luwwim ma'lluchchim hee'ooyyo.

²¹Ihukkaarem kido'i habus soommanakka'a Waa'a uunxakkobeelas hore'em firooyyo» yaa dabarukko.[9]

²²Losaan hundim Galiilanne mat ikka'a wixxito'i ammanenne Yesuus ixxuwwina «Manchi Beeto manni anganne higisakka'a uwwakkamo.

²³Ixxuwwim ixxo shitamo. Ihukkaarem saxxi ballanne lehiinsi ki'ookko» yukko. Ee bikkina losaan lobakata kichche'llo'o.

²⁴ Yesuusii ixxi losaanii Qifirinnaahoom beero'o waatto'i ammanenne Keesammi Mi'n gibiro[10] miqisaan Pheexiroos beyyo waatta'a «Ki'nnuwwik losisaanchi Keesammi Mi'n gibiro miqooyyonnihe?» yita'a xa'mmito'o.

²⁵Pheexiroosim «Eeyya, miqookko» yaa dabarukko. Pheexiroosim mine aagu ammanenne gaassaahim Yesuus «Simi'oona, kiina maha labookko? Ka uullik adilluwwi qaraxo te'im gibiro aa'llamok ayyeensette? Ixxuwwi oosiinsettennii te'im mulli manniinsette?» yaa xa'mmukko.

²⁶Pheexiroosim «Mulli manniinsette» yaa dabarukko. Yesuusim «Eehidette ihulas ixxuwwik oos gibiro miqimmiinsi gatto'oo keenoo yimmayyonnihe?

²⁷Ihukkaarem ixxuwwi qolantambee'isina dambalaqa mattaa shikka ubbuussaa luxxeka amaddoo qurxummekkichchika suume fooqaa'lloo ammane lam kin bira siiddootto; eeham massitaa iinaa kiinaa miqe» yukko.