Read Hadiyya Maatiwoos Mishiraachcha 18 Bible Online

Maatiwoos Mishiraachcha 18 - Hadiyya bible

Maatiwoos Mishiraachcha 18

¹ Ee ammane losaan Yesuus beyyo hincita'a «Waa'i adillanonne hundiinsi lophphookkok ayyette?» yita'a xa'mmito'o.

²Yesuusim mat ciilichcho weeshaa ixxuwwi lambe'enne uullisaa

³ «Hanqinam an ki'nnuwwina kuroommo; daba'llitakka'a ciilluwwisa ikkakkobeelas Waa'i adillanonne hore'em aaggakkamoyyo.

⁴Ka ciilichchisa ixxi gaga hoffiisookkok ayyim Waa'i adillanonne hundiinsim lophphookko.

⁵Ka ciilichchi'nnoo'i kee'nneka mato i summinne aa'ookkokim eesem aa'ookko» yukko.

⁶Odim Yesuus «Eesenne amma'nnito'i ka hoffi kee'nneka mato amma'nnatiinsi huushansoo manchi ixxi gaanjenne kee'mmaalli liitimma ka'llaa xilli dambalaqanne ubuta'n e'llookko.

⁷Baaxiilina mashka'i ihoo luwwinne wo'mmu uullina aayye! Baaxiil ihoo'n hore'em gatooyyo. Ihukkaarem baaxiilina mashka'i ihoo manchina aayye!

⁸ Ki angi te'im ki lokki at baaxiilo baxxona keese huushisoohan ihulas muttaa uunje. Mashka'oomim lam angi te'im lam lokki hee'aa heer heerinam xoo'oobee'i giiranne darabantoohaanniinsi anga murammi ikkaa te'im dim ikkaa heer heerina hee'oo heechcha siixximmi e'llookko.

⁹ Ki illim at baaxiilo baxxona keese huushisoohan ihulas fissitaa uunje. Mashka'oomim lam illi hee'aa heer heerinam xoo'oobee'i giiranne darabantoohaanniinsi mat illi hee'aa heer heerina hee'oo heechcha siixximmi kiina e'llookko» yukko.

¹⁰ Odim Yesuus «An ki'nnuwwina kuroommo; ka hoffi keeno egettam Waa'i asse'amaan iimanenne yoo Iyyanni illagenne hundi ammanem hee'llam bikkina ixxuwwika matom gaddakkotte.

¹¹Manchi Beet waarukkok bi'u keeno gatisimminatte.[11]

¹²Ki'nnuwwina maha labookko? Mat manchina xibbi gereebbi hee'uta'n ee gereebbiinsim mat annanni ihaa bi'uta'n gatu honsayyee honsi gereebbaa duunanne uraa ee bi'u gereechcho haseena marooyyonnihe?

¹³Hanqinam an ki'nnuwwina kuroommo; ixxi siidu ammane ee bi'ubee'i honsayyiinsii honsiinsii lonsaa bi'aa siidamu gereechchonne liiramooyyonnihe?

¹⁴Ee'isam iimanenne yoo ki'nnuwwik Waa'i ka hoffi kee'nnek matim bi'ona hasooyyo» yukko.

¹⁵ Odim Yesuus «Kiyyabbaayyi keese hawwoduta'n at mullam ixxi beyyo mattaa keese hawwodu luwwa kure. Ki woshshamdu macceesulas ixxo kiyyabbaayyi issitootto.

¹⁶ Ihukkaarem ixxi ki woshsha macceesubeelas Keesammi Kitaabanne ‹Lam manchi te'im sas manchi kuttolas woshshi hundim beeddookko› yoo bikkina kiinninne maqire mulli mannika mat mancho te'im lam mancho amaddaa ixxi beyyo mare.

¹⁷Ixximdu ixxuwwi woshsha macceesubeelas ee lasage amma'nnaa'n wixxitina kure. Amma'nnaa'n wixxixxi woshshamdu macceesubeelas ee mancho mulli minaadaphphisa te'im jor kee'nnisa[12] xige.

¹⁸ Hanqinam an ki'nnuwwina kuroommo; ka uullanne kattakko'i luwwi hundim iimanennem karamaakkoohane. Ka uullanne tittakko'i luwwi hundim iimanennem tiramaakkoohane.

¹⁹Odim an ki'nnuwwina kuroommo; ki'nnuwwiinsi lam manchi ayyi luwwam uunxiteena iittantolas iimanenne yoo Iyyanni ee uunxito'i luwwa uwwookko.

²⁰Mashka'oomim lam te'im sas ikka'a i summinne wixxitam beyyonne an ixxuwwinnetti ihoommo» yukko.

²¹ Ee ammane Pheexiroos Yesuus kollonne hincaa «Moollanna! Iyyabbaayyi eese hawwoduta'n mee'i kore haafiho? Lamar kor afeebe'e haafihonnihe?» yaa xa'mmukko.

²² Yesuusim dabaraa « ‹Lamaraagge› yoommoyyo. Ihukkaarem lamarayyi ko'l lamaraagge haafihe.

²³Ee bikkina Waa'i adillan ixxi awwaadaaninne maqire shallaqqameena hasu adila labookko.

²⁴Adilim shallaqqancha asheeru ammanenne lohayyi miliyoon diinaa'l badan yoo mat awwaadaancho worakko'o.[13]

²⁵Oo awwaadaanchi ixxonne hee'u badano miqeena xanoobee'i bikkina oo awwaadaanchi, ixxi are, ixxi oosii ixxena yoo luwwii hundim biteesamaa badan miqamoo'isina adil ijaajukko.

²⁶Ihukkaarem oo awwaadaanchi adi'l lokkonne ubaa ‹I moollanna, kiikka hundi luwwam miqoommo; hofqax ammanem iyyaqqe!› yaa uunxukko.

²⁷Adilim ee awwaadaanchina lobakata qishixxu bikkina ee badano miqisoobee'isa uraa fatakukko.

²⁸Ihukkaarem oo awwaadaanchi ee beyyiinsi firaa marukkuuyyim mat xibbi diinaara ixxeensi liqaayyo aa'aakkoo ixxi beshichchinne edamaa ‹Iinniinsi liqaayyo aa'llittoka miqe› yaa leella'a xagaraa amadukko.

²⁹Ixxi beshichchim ixxi lokkonne ubaa ‹An kiina miqoommo; hofqax ammanem iyyaqqe› yaa uunxukko.

³⁰Ihukkaarem oo awwaadaanchi ‹Ihooyyo› yaa ixxi badano miqeebe'i afeebe'e karaxxi minenne kassiisukko.

³¹Mulli ixxi beshim eekka moo'llo'i ammanenne lobakata kichche'llo'o. Ixxuwwim adi'l beyyo matta'a ixxi issu luwwa hundam kutto'o.

³²Adilim ee awwaadaancho weeshisaa ‹At jor boqqi awwaadaancho! At eese uunxitti bikkina an ee luwwi badano hundam urummo.

³³An kiina urummisam ki beshichchonne yoo badano at urimmi hasisooyyonnihe?›

³⁴yaa lobakata quuqaa ixxonne hee'u badano hundam miqeebe'i afeebe'e hawwisoo keenina higisaa uwwukko.

³⁵Ki'nnuwwim ki'nnuwwi abbaayyina wodaninne haafitakkobeelas iimanenne yoo Iyyanni ki'nnuwwinam haafooyyo» yukko.