Read Hadiyya Maatiwoos Mishiraachcha 19 Bible Online

Maatiwoos Mishiraachcha 19 - Hadiyya bible

Maatiwoos Mishiraachcha 19

¹Yesuusim ka woshsha wocaa guullaa lasage Galiiliinsi ki'aa Yoordaanoos daajji eeqidonne yoo Yihuxxi uulla marukko.

²Lobakat minaadabim ixxo awwonto'aare eekke'em ixxuwwa fayyiisukko.

³Mat mat Farisaawe'i ixxi beyyo waatta'a ixxo keenteena hassa'a «Mat manchi ayyi mashka'innem ixxi are hollona seer uwwoohonnihe?» yita'a xa'mmito'o.

⁴ Yesuusim dabaraa «Qooccaanchi gaassaatim goonaa meentoo issaa qooccukko.

⁵ ‹Ee bikkina manchi annaa amaa uraa ixxi arenne mat ihookko. Lamim mat xiigaa mat maaraa ikkamo› yookkoka Keesammi Kitaabanne qananaa'llakko'oyyonnihe?

⁶Lamim mat orachchi ikkamo bagaan lamoyyo. Waa'i mat issukkoka manni annanni issoone» yukko.

⁷ Farisaawe'uwwim «Eehannata'i Muse'e ‹Mat manchi are holloo ammane furma uwwaa hollona› yaa ijaajukkok mahinatte?» yito'o.

⁸Yesuusim dabaraa «Meento hollitakkona Muse'e kuru mashka'i ki'nnuwwik wodan qoxxaalli ihu bikkinatte bagaan luxxeka ee'isayyo.

⁹ Ihukkaarem an ki'nnuwwina kuroommo; mat manchi ixxi are saa'immi mashka'innette ihoo'n mulli mashka'inne hollaa mulleta eebulas saa'aakko. Is aro'i hollukkota eebookkokim saa'aakko[14]» yukko.

¹⁰Ixxi losaanim «Goonchikii meentichchokii duuha'i ka'isa ihulas meento eebakkoo'n hee'immi erane» yito'o.

¹¹Ihukkaarem Yesuus ixxuwwina «Mine issakkoo'n hee'immi xanamookkok xale'i uwwamu keeninatte bagaan hundina ihoobee'ane.

¹²Mashka'oomim muleessa'i ikka'a qaranto'i keen yo'o; manni muleessa'i issu keenim yo'o. Waa'i adillanonne aagimmina yita'a ixxuwwi gaga muleessa'i issito'i keenim yo'o. Ee bikkina kaka aa'eena xanookkok aa'ona» yukko.

¹³Yesuus ixxi anga hanenne issaa maasse'oo'isina ciilluwwa ixxi beyyo eebakko'aare ciilluwwa eebu manna ixxi losaan wocanto'o.

¹⁴Ihukkaarem Yesuus «Waa'i adillanonne hee'llam keen kido'i keen ikko'i bikkina ciilluwwi i beyyo waatteena hoottakkotte» yukko.

¹⁵Ixxi angam ciilluwwi hanenne issaa maasse'aa lasage ee beyyiinsi marukko.

¹⁶Mat ayyaamo mat woraadichchi Yesuus beyyo waaraa «Losisaancho! Heer hee'l heechcha siixxeena er luwwa maha isso?» yaa xa'mmukko.

¹⁷Yesuusim «Er luwwi bikkina mahina eese xa'mmitoolla? Erok mexxo'i Waa'a. Ihukkaarem heer heerina hee'oo heechcha siiddeena hassilas ijaajo egere» yukko.

¹⁸ Oo woraadichchim «Hinki ijaajo?» yukko. Yesuusim «Shititte, saa'llitte, game'llitte, qophphano naqqassitte,

¹⁹ annaa amaa lonsee ki beshichcho ki gaqqisa iittee» yukko.

²⁰Woraadichchim «Ka ijaaja'i egeraammo. Mullek xa'oo luwwi maha?» yukko.

²¹Yesuusim «Muccur ihimma hassilas iimanenne godda siixxiteena mattaa kiina yoo luwwa biteessaa diinatooma buxina uwwitaa waattaa eese awwone» yukko.

²²Ihukkaarem oo woraadichchi ixxena lobakat amaxxi hee'u bikkina eekka macceesu ammanenne kichche'ukkuuyyi marukko.

²³Ee lasage Yesuus ixxi losaanina «Hanqinam an ki'nnuwwina kuroommo; goddaanchi manchina Waa'i adillanonne aagimmi kee'mmaalla.

²⁴Odim an ki'nnuwwina kuroommo; goddaanchi manchi Waa'i adillanonne aagimmiinsi gaameelakkichchi marfi afo'inne firimmi sholle'ookko» yukko.

²⁵Ixxi losaanim eekka macceesso'i ammanenne lobakata maalalta'a «Eehannata'i ayyi gateena xanookko?» yito'o.

²⁶Yesuusim ixxuwwa moo'ukkuuyyi «Kaka manni xanooyyo. Ihukkaarem Waa'i hundi luwwam isseena xanookko» yukko.

²⁷Ee ammanenne Pheexiroos «Oono'o! Neese hundi luwwam ullaa keese awwonnaammo. Eehannata'i maha siindoommo?» yukko.

²⁸ Yesuusim ixxuwwina «Hanqinam an ki'nnuwwina kuroommo; haareechchi uullanne Manchi Beet lombinne adilla'n barcumanne afuuroo ammane i losaan ikkakko'i ki'nnuwwim tommonnee lam adilla'n barcumannee afuuttakkamo. Tommonnee lamem Isra'ee'l sullonnem oogattakkamo.

²⁹Ayyi manchim i summi mashka'inne ixxeka mine, abbaayyuwwa, aayyuwwa, anna, ama, oosoo uullaa urookkok xibbi qinxite a'llookko; heer heerina hee'oo heechcham siixxookko.

³⁰ Ihukkaarem illag hee'llo'i kee'nnek lobakat keen lasaanchi ikkamo. Lasaanchi hee'llo'i kee'nnekim lobakat keen illag ikkamo» yukko.