Read Hadiyya Maatiwoos Mishiraachcha 2 Bible Online

Maatiwoos Mishiraachcha 2 - Hadiyya bible

Maatiwoos Mishiraachcha 2

¹Heeroodis adilla'n doollenne Yihuxxi uullanne Beeteelihee'm beero'onne Yesuus qaramukko. Ee ammane boollaanka moo'lla'a luwwa laqqam mareesaanim eelliinchi firiinsi Yerusaaleema waatto'o.

²Oo mannim «Qaramu Ayihuxxi adil hannonnette? Eelliinchi firinne ixxi boollaankichcho moo'nnaa ee adilina otossineena waallaammo» yita'a xa'mmito'o.

³Adil Heeroodisim ee woshsha macceesaa lobakata muggukko. Yerusaalee'm beero'onne hee'llam manni hundim ixxesam muggito'o.

⁴Ee bikkina qeessa awwonsaanoo seera losisaanoo Heeroodis wixxaa'aa «Waa'i doo'llaakkoo Kiristoos qaramookkok hannonnette?» yaa xa'mmukko.

⁵Ixxuwwim «Kiristoos qaramookkok Yihuxxi uullanne Beeteelihee'm beero'onnette. Mashka'oomim hiraagaanchi

⁶ ‹Yihuxxi uullanne siidantoo Beeteeliheema, i minaadab Isra'eela gassoo awwonsaanchi kiinniinsi firoo bikkina Yihuxxi uullanne la'amu beero'uwwiinsi hore'em hoffe'llooyyo› yaa kitaabaakko» yita'a dabatto'o.

⁷Heeroodisim eelliinchi firiinsi waatto'i qoor manna ayyim la'oobee'isa weeshisaa boollaankichchi ixxuwwina moo'amu ammane xa'mmaa qoossukko.

⁸Ixxim ee mannina «Mattakka'a ciilichchooma qoxxitakka'a hassehe; hassakka'a siiddakkam ammane anim maraa ixxena otossoommisina iinam kullehe» yaa Beeteelihee'm beero'o asse'ukko.

⁹Ixxuwwim ee woshsha macceessa'a lasage fitta'a matto'o. Mattam googonnem luxxeka eelliinchi firinne moo'llo'i boollaankichchi mattam kollo awwonsukkuuyyi odim moo'llo'i ammanenne lobakata liiranto'o. Oo boollaankichchim ciilichchi yoo beyyo afaa uullukko.

¹¹Ixxuwwim mine aagga'a ciilichchi ixxi am Maaraamenne maqirem yoo'isa moo'lla'a guruphphita'a ciilichchina otossito'o. Ixxuwwi saaxinnuwwam fooqaa'lla'a worqa, aduruusaa karbe'e yakkam enjaa iriffo'o.

¹²Ixxuwwim la'mmaagge Heeroodis beyyo daba'llitambee'isa haqaawwonne Waa'i kurukkaare mulli googinne ixxuwwi uulla daba'llita'a matto'o.

¹³Oo qoor manni matta'a lasage Waa'i asse'amaanchi haqaawwonne Yooseefina moo'amaa «Ciila sheena Heeroodis hasoo bikkina ka beyyiinsi ki'llaa ciilaa amaa amaddaa Gibxi uulla gibbaa an kureembe'i afeebe'e eekke'enne afuure» yukko.

¹⁴Ee bikkina Yooseef hiimonne ki'aa ciilaa amaa amadaa Gibxi uulla maraa

¹⁵ Heeroodis leheebe'i afeebe'e ee beyyonne afuurukko. Eehid ihukkokim hiraagaanchinne Waa'i «I beeto Gibxi uulliinsi weeshummo» yukkok wo'mmoo'isinatte.

¹⁶Heeroodisim oo qoor manni qawwiisso'isa qoossaa la'u ammanenne lobakata nadadukko. Ee bikkina gaadaano asse'aa Beeteeliheemannee Beeteelihee'm kululleetannee yoo gattuwwi hundannem qaramukkaanniinsi lam hiincho ihu ciilluwwikaa lam hiinchiinsi woroon yoo ciilluwwikaa goo'n ooso hundam shisiisukko. Eeham isseena xanukkok boollaanka moo'lla'a luwwa laqqam mareesaano xa'mmaa ammane qoossukkisinnette.

¹⁷Hiraagaanchi Ermiyaas

¹⁸ «Wi'llikii lobakat laachchikii sagar Raama'i beero'onne macceesamukko; Raaheelem is oos bikkina wi'llito'o; ee lehu oos kichchechcham iyyaqqiteena xanto'oyyo» yaa wocu woshshi wo'mmukko.

¹⁹Heeroodis lehaa lasage Waa'i asse'amaanchi Yooseefina Gibxanne haqaawwonne moo'amaa

²⁰«Ciila shiteena hassam manni leto'i bikkina ki'llaa ciilaa amaa amaddaa Isra'ee'l uulla daba'lle» yukko.

²¹Yooseefim diriiriinsi baqaa ciilaa amaa amadaa Isra'ee'l uulla daba'llukko.

²²Ihukkaarem adil Heeroodis lehaa lasage Heeroodis beet Arkeeliwoos Yihuxxi uullina adil ihukkisa Yooseef macceesu ammanenne ee kollo marimma baddukko. Odim Waa'iinsi haareechchi sawwit Yooseefina haqaawwonne uwwamu bikkina Galiila marukko.

²³ Ee uulla maraa Naazireeta yakkam beero'onne afuurukko; oohim ihukkok hiraagaan «Naaziraawekkichcho yamamaa weeshamookko» yito'ok wo'mmoo'isinatte.