Read Hadiyya Maatiwoos Mishiraachcha 20 Bible Online

Maatiwoos Mishiraachcha 20 - Hadiyya bible

Maatiwoos Mishiraachcha 20

¹Odim Yesuus «Iima'n adillan ixxi woyi'n kaashshi beyyonne baxoo baxaano qaxxareena soodaraar daram firu mancho labookko.

²Ixxim annannichchinam ballanne mat diinaara miqeena iittamaa baxaano woyi'n kaashshi beyyo asse'ukko.

³Sas sa'aaxxi lambe'enne firaa mulli keenim baxo hoogga'a meeranne uullito'oo moo'aa

⁴‹Ki'nnuwwim i woyi'n kaashshi beyyonne mattakka'a baxxehe. Baxxakko'i malaayyika miqoommo› yukko. Ixxuwwim woyi'n kaashshi beyyo matto'o.

⁵Odim loh sa'aaxxi lambe'ennee honsi sa'aaxxi lambe'ennee firaa illagee'nnisam qaxxarukko.

⁶Odim tommonnee mat sa'aatannee firaa mulli keenim baxo hoogga'a uullito'oo moo'aa ‹Balli hundoomam baxo hooggakka'a keyye uullitakko'ok mahinatte?› yaa xa'mmukko.

⁷Ixxuwwim ‹Baxisoo manna hoongaatette› yito'o. Ixxim ‹Eelas ki'nnuwwim mattakka'a i woyi'n kaashshi beyyonne baxxehe› yukko.

⁸ «Maaro'i ballanne woyi'n kaashshi annichchi waaraa diinate miqaanchina ‹Baxaano weeshshaa lasaanchonne qaxxaranto'i keeniinsi ki'issaa luxxeka qaxxaranto'i keenonne afeebe'e baxxo'i malaayyika miqe› yukko.

⁹Ee bikkina tommonnee mat sa'aatannee qaxxaranto'i keen hincita'a annannichchim mat mat diinaara a'llito'o.

¹⁰Luxxeka qaxxaranto'i keenim hincito'i ammanenne ee keeniinsi lobakata siiddamoka labisso'o. Ihukkaarem ixxuwwim annannichchim mat mat diinaara a'llito'o.

¹¹Bira a'llita'a lasage ee woyi'n kaashshi annichchina

¹²‹Ku keen lasaanchonne waatta'a xale'i mat sa'aata baxxo'o. Ihukkaarem balli hundoomam eelliinchonne shokkinummuuyyi baxonne hoongaa honsummi niinninne maqire gudissaa miqqaatto› yita'a quunquunto'o.

¹³«Woyi'n kaashshi annichchim awwaadaaniinsi matina ‹I beshichcho, an keese maham hawwodummoyyo. At iinninne iittantittok ballanne mat diinaara miqoommisinayyonnihe?

¹⁴Ee bikkina kiikka amaxxitaa mare. Kiina uwwummi qaxa lasaanchonne qaxxarummaanninam uwweena hasoommo.

¹⁵An i luwwa hasummisa isseena xanoommoyyonnihe? Te'im i gaqqi diinatenne biijaalli ihummi bikkina to'achchitaatennihe?› yukko.

¹⁶ Ee'isam illagee'n keen lasaanchi ikkamo. Lasaanchi keenim illag ikkamo» yukko.

¹⁷Ee lasage Yesuus Yerusaaleema maram hee'ukko. Marukkuuyyim tommoo lam ixxi losaanoo mullam ixxi kollonne hincaa'aa

¹⁸«Oono'o! Kaba Yerusaaleema maalloommuulla. Eekke'em Manchi Beeto amadakka'a qeessi awwonsaaninaa Seera losisaaninaa higisakka'a uwwakkamo. Ixxuwwim ixxonne leh oogato'o oogattamo.

¹⁹Ixxom mulli minaadab game'llitamisina, gantamisinaa saqaltamisinaa higissa'a uwwitamo. Ixxim saxxi ballina lehiinsi ki'ookko» yukko.

²⁰Ee lasage Zabdiwoos oosik ama is oosinne maqirem Yesuus beyyo hincita'a ixxi illagenne guruphphita'a mat luwwa uunxito'o.

²¹Ixxim «Maha hassootto?» yukko. Isem «Ku lamem i oosim ki adillanonne matii ki makki kollinne matii ki qeddi kollinne afuuttamisa isse» yito'o.

²²Ihukkaarem Yesuus dabaraa «Uunxitakkam luwwa laqqakkamoyyo. An aa'oommi hawwo aa'llakkeena xantakkamonnihe?» yukko. Ixxuwwim «Eeyya, xannoommo» yito'o.

²³Ixxim «An aa'oommi hawwo aa'llakkamo. Ihukkaarem i makki kollonnee qeddi kollonnee afuurimmi uwwamookkok Iyyanni gudisu keeninatte bagaan uwwoommok aneyyo» yukko.

²⁴Tommem losaanim eekka macceesso'i ammanenne lamem abbaayyuwwannem quuqqo'o.

²⁵ Ihukkaarem Yesuus hundam ixxi beyyo weeshaa «Ka uulli minaadaba gassitam keen minaadabina moollanno'i ikko'isa laqqakkamo. Minaadaphphi awwonsaanim minaadaba hasso'isa issitamo.

²⁶ Ihukkaarem ki'nnuwwi eehid ihimmi hasisooyyo. Ki'nnuwwiinsi lophpheena hasookkok ayyim ki'nnuwwina awwaadaanchi ihona.

²⁷Ki'nnuwwiinsi awwonsaanchi iheena hasookkok ayyi manchim ki'nnuwwina awwaadaanchi ihona.

²⁸Manchi Beetim awwaadeenaa ixxi foore lobakat mannina tissi issaa higisaa uwweenaa waarukko bagaan ixxena awwaadakkona waarukkoyyo» yukko.

²⁹Yesuusim ixxi losaaninne maqirem Iyyaarko'i beero'iinsi firaa marukkuuyyi lobakat minaadab ixxo awwonukko.

³⁰Gooqqi inqennem afuutto'oo lam qooqquwwi Yesuus ee googinne higoo'isa macceesso'i ammanenne «Daawiit Beeto, niina qishixxe!» yitu'uuyyi laatto'o.

³¹Minaadabim ee qooqquwwa «Sa'i'llehe!» yita'a wocanto'o. Ihukkaarem ixxuwwi «Daawiit Beet Moollanna! Niina qishixxe!» yita'a lonsita'a laatto'o.

³²Yesuusim uullaa ixxuwwa weeshaa «An ki'nnuwwina maha issona hassakkamo?» yukko.

³³Ixxuwwim «Moollanna! Niikka ille fooqaa'e» yito'o.

³⁴Yesuusim qishixxaa ixxuwwika ille nakkukko. Ee ammanem ixxuwwik illi fooqukkaare ixxo awwonto'o.