Read Hadiyya Maatiwoos Mishiraachcha 21 Bible Online

Maatiwoos Mishiraachcha 21 - Hadiyya bible

Maatiwoos Mishiraachcha 21

¹Yesuusii ixxi losaanii Yerusaalee'm beero'onne hincita'a lasage Wee'l Duu'n gadanonne yoo Beetafaage yakkam gatte affo'isam Yesuus ixxi losaa'nneka lamo

²«Ki'nnuwwi illagenne yoo gatte mallehe. Mattakka'a affakko'isam mat karamaakkoo hallichcho wotarinnem siiddakkamo. Ee hallichcho tittakka'a wotarinnem i beyyo eebbehe.

³Ayyim maham woculas ‹Moollanni ixxuwwa hasaakko› yi'llehe. Eehid yitakkam ammane ixxim wottakkona cawwookko» yaa asse'ukko.

⁴Oohim hiraagaanchi

⁵ «Yerusaaleemina ‹Oono'o! Ki adil ixxi gaga hoffiisaa hallichchonne oohim hallichchi wotaranne saa'llaa ki beyyo waarookko› yitakka'a kullehe» yaa wocukkok wo'mmoo'isinatte.

⁶Losaan matta'a Yesuus «Issehe» yaa ijaajukkisam issito'o.

⁷Ixxuwwim hallichcho wotarinnem eebba'a ixxuwwika eddechcha ee halli hanenne issito'aare Yesuus saa'llukko.

⁸Minaadaphphekim lophphoo kolli ixxo lonsimmina ixxuwwika eddechcha googonne dakko'o. Mulli keenim haqqi buyya iiqqa'a googonne dakkam hee'llo'o.

⁹ Ixxi illagenne mattam hee'llo'i keenii lasonne ikka'a awwontam hee'llo'i keenii «Daawiit Beetina lombi ihona! Moollanni summinne waarookkok maasse'amaakkoohane. Waa'ina iimanenne galat ihona» yitu'uuyyi sagara iimaa'lla'a wocco'o.

¹⁰Yesuus Yerusaaleema aagu ammanenne ee beero'i manni hundim «Kuk ayyette?» yaa maalalukko.

¹¹Minaadabim «Kuk Galii'l uullanne yoo Naazireexxi beero'iinsi waaru hiraagaanchi Yesuusatte» yukko.

¹²Keesammi Mine Yesuus aagaa ee beyyonne biteessam keenoo bitaa'llam keenoo hundam fissaa hollukko. Odim diinate dabassitam hee'llo'i kee'n xaraphpheezaa handare'e biteessam hee'llo'i kee'n barcummuwwaa qubbaa'ukko.

¹³ Odim ixxuwwina «Keesammi Kitaabanne Waa'i ‹I min eese uunxakkam min ihookko› yaakko yamamaa kitaabamaakko. Ihukkaarem ki'nnuwwi gamaa'n ma'n issitakko'o» yukko.

¹⁴Keesammi Minenne Yesuus hee'ukkisam illi qooqquwwii shiihuwwii ixxi beyyo waatto'aare Yesuusim ixxuwwa fayyiisukko.

¹⁵Ihukkaarem qeessa awwonsaanii Seera losisaanii Yesuus baxu maalalsiisoo luwwa moo'llo'i bikkinaa oosim Keesammi Minenne «Daawiit Beetina lombi ihona» yita'a sagara iimaa'lla'a woccu'uuyyi macceesso'i bikkinaa quuqqo'o.

¹⁶ Ixxuwwim Yesuusina «Ku keen yitam luwwa macceessaatennihe?» yita'a xa'mmito'o. Ixxim «Eeyya, macceesoommuulla. Keesammi Kitaabanne ‹Oos suumiinsii anuuna iicoo ciilluwwi suumiinsii galata gudissootto› yookkoka hore'em qananaa'llakko'oyyonnihe?» yukko.

¹⁷Yesuusim ixxuwwa uraa beero'iinsi firaa Biitaana yakkam gatte maraa ee hiimo eekke'e garukko.

¹⁸Yesuus daram beero'o daba'llaa waarukkuuyyi sibaaraa hee'u bikkina

¹⁹gooqqi inqenne mat odakkichchi moo'aa ee haqqichchi beyyo marukko.[15] Ihukkaarem buyyiinsi bagaan mishika maham siidukkoyyo. Ee bikkina «At hore'em od misha mishshitte» yukko. Ee ammanem oo odakkichchi gogukko.

²⁰Losaanim ee odakkichcho moo'llo'i ammanenne «Ku odakkichchi matemaaggem hinkid gogukko?» yita'a maalalto'o.

²¹ Yesuusim ixxuwwina dabaraa «Hanqinam an ki'nnuwwina kuroommo; ki'nnuwwina amma'nnat hee'uta'nnii hore'em malantakkobeeta'nnii an ka odakkichchonne issummis xale'e ihoo'n ka duunam ‹Ka beyyiinsi xoqolantaa dambalaqanne darabame› yitakkota'nnim darabamookko.

²²Amma'nnatinne maham Waa'a uunxitakko'aare siixxitakkamo» yukko.

²³Yesuus Keesammi Minenne aagaa losisam hee'ukko. Losisukkuuyyim qeessa awwonsaanii minaadaphphi lommannii ixxi beyyo waatta'a «Ka hundam issitoottok mah malaayyinnette? Ka malaayye kiina uwwukkok ayyette?» yita'a xa'mmito'o.

²⁴Yesuusim dabaraa «Anim ki'nnuwwa mat xa'mmichcha xa'mmoommo. Ki'nnuwwimdu ee xa'mmichcha dabattakkolas anim ka keeno maha malaayyinne issoommuulda'e ki'nnuwwina kuroommo.

²⁵Yohaannis xammaqoo'isa issukkok Waa'annii manna?» yukko. Ee bikkina ixxuwwina'i ixxuwwim «Mayyino? ‹Waa'a› yinumlas ‹Eehaare ixxi yukkoka mahina amma'nnitakko'oyyo?› yookko.

²⁶‹Manna› yinumlas minaadab hundim hiraagaanchi issita'a Yohaannisa aa'llo'i bikkina baddinoommo» yita'a fitanto'o.

²⁷Ee ikkina «Neese lanqoommoyyo» yita'a dabatto'o. Yesuusim ixxuwwina «Anim ka keeno mah malaayyinne issoommuulda'e kuroommoyyo» yaa dabarukko.

²⁸Ee lasage Yesuus «Mat manchina lam oos hee'ukko. Annim lob beet beyyo maraa ‹I beeto, kaballa woyi'n kaashshi beyyo mattaa baxe› yukko.

²⁹Beetim ‹Sabummo; maroommoyyo› yukko. Ihukkaarem lasonne saxxaa maraa baxukko.

³⁰Odim la'm beet beyyo maraa illaqqaannisam baxoo'isina ijaajukko. Ixxim annina ‹Ihona, iyyanna; maroommo› yukko. Ihukkaarem marukkoyyo.

³¹Ee lamem oosiinsim anni yukkoka issukkok hinkane?» yukko. Ixxuwwim «Lob beeto» yita'a dabatto'o. Yesuusim ixxuwwina «Hanqinam an ki'nnuwwina kuroommo; qaraxaanii saa'aanii ki'nnuwwiinsi gaassita'a Waa'i adillanonne aaggamo.

³² Mashka'oomim Xammaqaanchi Yohaannis xabbee'n googo ki'nnuwwina moo'iseena waarukkaare qaraxaanii saa'aanii amma'nnito'o bagaan ki'nnuwwi amma'nnitakko'oyyo. Ki'nnuwwi eekka moo'llakkaahim baaxiilo biiraa'a yitakka'a amma'nnitakko'oyyo» yukko.

³³ Odim Yesuus «Mulli kobi'llishsham macceessehe. Mat uullanne mat manchina uulli hee'ukko. Ixxim woyi'n kaashsha kaasaa ootukko. Ee woyi'n kaashshi misha ciinsakkam barem hinukko. Woyina egerakkam godo'om baxukko. Ee lasage ee woyi'n kaashshi beyyo abuullaanina uwwaa mulli uulla marukko.

³⁴Misha feerakkam amman afukkaare ixxi qooda eebbona ee abuullaa'n beyyo ixxi awwaadaano asse'ukko.

³⁵Ihukkaarem oo abuullaan ixxi awwaadaano amadda'a matooma ganto'o. Mullekam shito'o. Odim mullekam kininne aphphisso'o.

³⁶Oo manchi odim luxxaanniinsi lonsaa dut awwaadaano asse'ukko. Abuullaanim ixxuwwam luxxi kee'nnisam issito'o.

³⁷Lasaanchonne ‹I beeto hayditamo› yaa ixxi beeto asse'ukko.

³⁸Ihukkaarem abuullaan beeto moo'lla'a ixxuwwina'i ixxuwwim ‹Lagaanchi kanena'e; waallehe! Ixxom shinaa ixxi aa'oo lago a'llinona!› yito'o.

³⁹Ee bikkina ixxo amadda'a woyi'n kaashshi beyyiinsi biiranne fissita'a shito'o.

⁴⁰«Eehaare woyi'n kaashshi annichchi waaroo ammane ee abuullaano maha issookko?» yaa xa'mmukko.

⁴¹Ixxuwwim Yesuusina «Ee jor manna jorisa issaa shookko; sharada laboo'isinne dabaroo mulli abuullaaninam ee woyi'n kaashshi beyyo uwwookko» yito'o.

⁴² Yesuus ixxuwwina «Keesammi Kitaabanne ‹Kininne mine baxxam keen awwaadooyyo› yita'a uunjito'i kinchi hundiinsim lobakata lophphaa awwaadoo kinchi ihukko. Oohim Waa'i baxo. ‹Neesem ni illinnem moo'nnaa maalallummo› yamamaa kitaabamukkoka qananaa'llakko'oyyonnihe?

⁴³«Ee bikkina an ki'nnuwwina kuroommo; Waa'ik adillan ki'nnuwwiinsi hooramaa Waa'i adilla'n misha mishoo minaadabina uwwamookko.

⁴⁴Ka kinanne ubukkok hundim xaamookko; ihukkaarem ku kin ixxonne ubookkok liitamookko» yukko.[16]

⁴⁵Qeessa awwonsaanii Farisaawe'uwwii Yesuus wocu kobi'llishshuwwa macceesso'i ammanenne ixxuwwi bikkina wocukkisa qoossito'o.

⁴⁶Ee bikkina ixxo amaddeena hasso'o. Ihukkaarem minaadab hiraagaanchi issita'a Yesuusa moo'llo'i bikkina minaadaba baddito'o.