Read Hadiyya Maatiwoos Mishiraachcha 22 Bible Online

Maatiwoos Mishiraachcha 22 - Hadiyya bible

Maatiwoos Mishiraachcha 22

¹Odim Yesuus kobi'llishshinne ixxuwwina

²«Iima'n adillan ixxi beetina bollochcho'i maadda gudisu adila kobi'llookko.

³Oo adilim weeshanto'i keen bollochcho'ina waattona kuttam awwaadaano asse'ukko. Ihukkaarem ixxuwwi waatteena hasso'oyyo.

⁴«Oo adil odim mulli awwaadaanom ‹Weeshanto'i keenina «Oono'o, bollochcho'i maadda gudisaammo. Iikki xiikkamu mirgo'uwwii lijjuwwii duramaakko; hundem luwwim gudaakko. Ee bikkina bollochcho'o waallehe» yitakka'a kullehe› yaa asse'ukko.

⁵«Ihukkaarem weeshanto'i keen ee woshsha gadda'a mat abuulli beyyo, mullekim dadda'l beyyo marukko.

⁶Gatto'i keenim ee awwaadaano amadda'a lobakata barche'e issita'a lasage ganta'a shito'o.

⁷Ee bikkina adil lobakata quuqaa ixxi gaadaano asse'aa ee shito'i keeno bi'isukko. Ixxuwwi beero'om shokkiisukko.

⁸«Ee lasage ixxi awwaadaanina ‹Oono'o, bollochcho'i maaddi gudaakko. Ihukkaarem weeshanto'i keen labbambee'i keeno.

⁹Ee bikkina bur hundam mattakka'a siiddakko'oka ayyem bollochcho'i maaddina weeshshehe› yukko.

¹⁰«Oo awwaadaanim bur hundannem siiddo'oka ayyem jor keenom ihukko er keenom wixxaa'llo'o. Ee'isinne bollochcho'i minenne manni wo'mmukko.

¹¹«Adilim weeshanto'i keeno moo'eena mine aagu ammanenne bollochcho'i eddechcha edde'ubee'i mat mancho moo'ukko.

¹²Ixxenam ‹Iyyabbaayyo, bollochcho'i eddechcha edde'lloo'n hinkid ka beyyo aaggitto?› yukko. Ihukkaarem oo manchi maham wocukkoyyo.

¹³ «Adilim awwaadaanina ‹Angaa lokkoo kattakka'a biiranne tuunsonne uunjehe. Eekke'em wi'llimmaa inqe iicimmaa ihookko› yukko.

¹⁴Weeshanto'i keen duta; ihukkaarem doo'llanto'i keen hofqaxa» yukko.

¹⁵Ee lasage Farisaawe'uwwi matta'a Yesuusa wocoo woshshinne digaadda'a amaddeena a'llanto'o.

¹⁶Ee bikkina ixxuwwika losaano Heeroodis manninne maqirem Yesuusa «Losisaancho! At hanqo'ane, Waa'i googom hanqo'isinne losissoohane; ayyenam golo'lloo'n gudaanchoominnem moo'lloo'isa lanqoommo.

¹⁷Hino'o kure, kiina malabookko? Oroo'm adilina gibiro miqimmi hasisoohonnii hasisooyyo?» yita'a xa'mmitona asse'llo'o.

¹⁸Ihukkaarem Yesuus ixxuwwika jor sawwite la'u bikkina «Ki'nnuwwi birammaano, mahina eese keentakkamuulla?

¹⁹Huno'o, gibiro miqakkam diinate iina moo'issehe» yukko. Ixxuwwim mat diinaara eebbo'o.

²⁰Yesuusim ixxuwwina «Ka diinatenne yoo misilii kitaabii ayyane?» yaa xa'mmukko.

²¹Ixxuwwim «Adi'llane» yito'o. Yesuusim dabaraa «Eehaara'i adi'llan ihu luwwa adilinam uwwehe. Waa'an ihu luwwa Waa'inam uwwehe» yukko.

²²Ixxuwwim ee wocu woshsha macceessa'a maalalto'o; ixxi beyyiinsim matto'o.

²³ Ee ballam «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a

²⁴ «Losisaancho! Muse'e ‹Mat manchi ooso qaroo'n lehuta'n ixxi abbaayyi ixxi meentichcho laggassaa lehukkaannina shumo'o fissona› yaakko.

²⁵Niinninne lamar abbaayyuwwi hee'llo'o. Ixxuwwiinsim won meento eebaa ooso qaroo'n lehu bikkina wona awwonaanchi ee lehu manchi meentichcho laggassukko.

²⁶Ee'isinne la'mmekim saxxekim lama'llaannonne afeebe'e kor korinne lago gassamaa lehamukko.

²⁷Hundiinsi lasaanchonne meentichchom leto'o.

²⁸Eehaare hundima'i ee meentichcho eebaakko kichchi ayyaamo hinkannina arette ikkamo?» yita'a xa'mmito'o.

²⁹Ihukkaarem Yesuus ixxuwwina «Ki'nnuwwi Keesammi Kitaabaa Waa'i malaayyee laqqakkambee'i bikkina huushantakko'ookko.

³⁰Mashka'oomim lehiinsi kichchi ayyaamo iimanenne Waa'i asse'amaa'nnisa ihookko bagaan eebooyyoo ladiisooyyoo.

³¹Ihukkaarem lehiinsi kichchi bikkina Waa'i ki'nnuwwina yukkoka qananaa'llakko'oyyonnihe?

³² Ixxi ‹An Abrihaam Waa'a, Yisaaq Waa'aa Yaaqoob Waa'aa› yaakko. Waa'i hee'oo kee'n Waa'a bagaan lehu kee'n Waa'ayyo» yaa dabarukko.

³³Mannim eekka macceesaa ee losanonne maalalukko.

³⁴Saduuqaawe'uwwim Yesuusina dabattam luwwa hooggo'isa Farisaawe'uwwi macceessa'a wixxito'o.

³⁵ Ee Farisaawe'uwwiinsim Seera erisa la'oo mat Yesuusa keeneena hasaa

³⁶«Losisaancho! Ijaaj hundiinsim lophphookkok hinkane?» yaa xa'mmukko.

³⁷ Yesuusim ixxena «Hundiinsim lophphoo luxxi ijaaj ‹Ki Moollanni Waa'a wo'm wodaninne, wo'm foorinnee wo'm tiirinnee iitte› yoohane.

³⁹ Eekka laboo la'm ijaajim ‹Ki beshichcho ki gaqqisa iitte› yoohane.

⁴⁰Seerii hiraagaa'n losishshii hundim shooho'amukkok ee lamem ijaajonnette» yaa dabarukko.

⁴¹Farisaawe'uwwi wixxita'a hee'llo'isam Yesuus

⁴²«Waa'i doo'llaakkoo Kiristoos bikkina maha sawwitakkamo? Ixxi ayyi beeto?» yaa xa'mmukko. Ixxuwwim «Daawiit Beeto» yita'a dabatto'o.

⁴³Yesuusim «Eehaare Daawiit Keesammi Ayyaa'n malaayyinne ‹I Moollanna› yukkok mahinatte? Ee'isam

⁴⁴ ‹Waa'i i Moollannina Ki diina'a ki lokkiinsi woroon isseembe'e i makkanne afuure› yaakko.

⁴⁵Daawiit ‹I Moollanna!› yaa weeshulas eehaare Kiristoos hinkid Daawiitina beet iheena xanookko?» yaa xa'mmukko.

⁴⁶Ee lasage ayyi manchim Yesuusina matem sagaram dabareena xanukkoyyo. Ee balliinsi ki'isaa ayyim ixxo od mulli xa'mmichcha xa'mmeena iggukkoyyo.