Read Hadiyya Maatiwoos Mishiraachcha 24 Bible Online

Maatiwoos Mishiraachcha 24 - Hadiyya bible

Maatiwoos Mishiraachcha 24

¹Yesuus Keesammi Miniinsi firaa marukkuuyyim ixxi losaan Keesammi Min baxamukkisa moo'isseena Yesuus beyyo waatto'o.

²Ihukkaarem Yesuus «Ka hundam moo'llakka'ahinnihe? Hanqinam an ki'nnuwwina kuroommo; ka moo'llakkam kin ki'n hanenne tuubamukkisam gindamoo'n hee'ooyyo» yukko.

³Wee'l duunanne Yesuus afuuraakkoohaannonne ixxi losaan mullam ixxi beyyo hincita'a «Niina kure; kuk hundim ihookkok hinki ammane? Ki waarimmikii lasaanchi doollikii mare'i maha?» yita'a xa'mmito'o.

⁴Yesuusim ixxuwwina dabaraa «Ayyim ki'nnuwwa huushisoobee'isa qoxxitakka'a ege'llehe.

⁵Dut keen ‹Waa'i doo'llaakkoo Kiristoos anette› yitu'uuyyi i summinne waattamo; dut keenom huushissamo.

⁶Oraa o'l xamboo macceessakkamo; oo luwwi hundim ihimmi hasisoohaneme. Ihukkaarem lasaanchi afubee'i bikkina badditakkotte.

⁷«Minaadab minaadabanne adilim adilanne ki'ookko. Qaanne'ii uulli huxechchii annanni annanni beyyonne ihookko.

⁸Oo hundim xuuchchina asheero'o.

⁹ «Ee ammane manni ki'nnuwwa hawwina higisaa uwwookko. Shakkamome. I mashka'inne minaadab hundim ki'nnuwwa sabookko.

¹⁰Ee ammane dut keen amma'nnatiinsi ubbamo. Ixxuwwina'i ixxuwwim wocanta'a mat mato higisaa uwwookko.

¹¹Dut qophpha'n hiraagaan ki'llamo; dut keenom huushissamo.

¹²Jolli lophphimmiinsi ki'ukkok lobakat mannik iitti siggookko.

¹³ Ihukkaarem lasaanchi afeebe'e xa'nnookkok gatookko.

¹⁴Minaadab hundinam naqaash ihoo'isina ku iima'n adilla'n mishiraachchi sagarim uulli hundannem alallaatamookko. Ee lasage doolli lasaanchi ihookko.

¹⁵ «Ee bikkina hiraagaanchi Daani'eelinne kuramu haashaarammi luwwi keesammi beyyonne uullaa moo'llakkamo. Eekka qananaa'ookkok qoossona.

¹⁶Ee ammane Yihuxxi uullanne yoo keen duunnuwwanne gibona.

¹⁷ Iima'n fooqanne yookkokim uullanne yoo luwwa aa'eena dilloone.

¹⁸Abuulli beyyonne yoo manchim eddechcha masseena laso daba'lloone.

¹⁹Ee ammane lamfoor meentinaa iicisaaninaa aayye!

²⁰Ihukkaarem ki'nnuwwik gibimmi hagayyenne te'im Usheexxaxxi Ayyaamonne ihoobee'isina Waa'a uunxehe.

²¹ Ee ammane uulli qooccamukkaanniinsi ki'isaa kabad afeebe'e ihubee'ek odim ee lasagem hore'em ihoobee'i kee'mmaalli hawwi ihookko.

²²Oo ayyaammuwwi gundubeeta'n ayyim gatam hee'ukkoyyo. Ihukkaarem doo'llanto'i kee'n bikkina oo ayyaammuwwi gundookko.

²³«Ee ammane ayyim ki'nnuwwina ‹Oono'o, Kiristoos keyye yookko› te'im ‹Eekke'e yookko› yuta'n ee woshsha amma'nnitakkotte.

²⁴Mashka'oomim ‹Kiristoos anette› yitam keenii qophpha'n hiraagaanii ki'llamo. Ixxuwwim xantota'n doo'llanto'oo keenom huushisseebe'e maalalsiisoo mare'uwwaa agannuwwaa issitamo.

²⁵Oono'o, an ka hundam ki'nnuwwina gaassaahim kuraammo.

²⁶ «Ee bikkina manni ki'nnuwwina ‹Oono'o, udma'anne yookko› yuta'nnim mattakkotte. Te'im ‹Oono'o, jagaranne yookko› yulasim ee woshsha amma'nnitakkotte.

²⁷Banqi elliinchi firiinsi ki'isaa eelliinchi aaggi afeebe'e beleloo'isam Manchi Beetikim waar ee'isa ihookko.

²⁸ Leesh yoo beyyonne ammar dummookko» yukko.

²⁹ Odim Yesuus «Oo hawwi ayyaammuwwi higukkisam eelliinchi tuunsookko. Aganim caakkisooyyo. Boollaankim iimaniinsi ubookko. Iima'n gogotim heekke'ookko.

³⁰ Ee ammane Manchi Beetik mare'i iimanenne moo'amookko. Uulli minaadab hundim aayye yookko. Manchi Beetim duubinne malaayyinnee lophphaakkoo lombinnee waarukkuuyyi moo'ookko.

³¹Ixxi asse'amaanom kee'mmaalli xurumbi sagarinne asse'ookko. Ixxuwwim uulli tochchiinsi tochchi afeebe'e soorem qariinsim doo'llanto'i keeno wixxaa'llamo» yukko.

³²Odim Yesuus «Odakkichchi ki'nnuwwina kobi'llishshi ihona. Ee haqqichchik caaffuwwi li'aa buyyi latoo ammane billi hincukkisa laqqakkamo.

³³Ee'isam ki'nnuwwim ee hundam moo'llakkam ammane Manchi Beetik waar u'llummanne hincukkisa laqqehe.

³⁴Hanqinam an ki'nnuwwina kuroommo; ku hundim iheebe'e ku qaranchi higooyyo.

³⁵Iimanii uullii higookko; ihukkaarem i sagar hore'em higooyyo» yukko.

³⁶Odim Yesuus «Ihukkaarem ee balli bikkinaa amma'n bikkinaa Anniinsi bagaan iima'n asse'amaanom ihukko, beetom ihukko ayyim la'ooyyo.

³⁷ Nohe'i doollenne ihukkisam Manchi Beet waa'l ammanem ee'isam ihookko.

³⁸Wo'i bi'iseena illageen Nohe'i markabanne aageebe'i afeebe'e manni itukkuuyyii agukkuuyyii, eebukkuuyyii ladiisukkuuyyii hee'ukkisam

³⁹ bichchi wo'i waaraa hundi luwwam bi'iseebe'e la'ubee'isam Manchi Beet waarim ee'isam ihookko.

⁴⁰Ee ammane lam manchi maqire abuullitu'uuyyi mat massamookko la'mmekim gatookko.

⁴¹Lam meenti maqire liittu'uuyyim mate massantamo la'mmetem gattamo.

⁴²«Ee'isam ki'nnuwwik Moollanni hinki ammane waarooda'e laqqakkambee'i bikkina guddakka'a egellehe.

⁴³ Ihukkaarem kaka laqqehe; mi'n annichchi gamaan ixxi mine hiimonne hinki ammane waarooda'e la'uta'n baqaa egerookko bagaan ixxi mine hinona cawwaa urooyyo.

⁴⁴Ee'isam Manchi Beetim sawwitakkobee'i ammanenne waaroo bikkina guddakka'a ege'llehe!» yukko.

⁴⁵Odim Yesuus «Eehan ihulas ixxi mi'n abaroosina ammaninne hurbaata uwwona mi'n annichchi doo'llu amma'nnamaakkoo qoor awwaadaanchi ayyette?

⁴⁶Moollanni waaroo ammane eehid issukkuuyyi siidamoo awwaadaanchi maasse'amaakkoohane.

⁴⁷Hanqinam an ki'nnuwwina kuroommo; ee mancho ixxi moollanni ixxena yoo luwwi hundannem gassaanchi issookko.

⁴⁸Ihukkaarem oo jor awwaadaanchi ixxi tiironne ‹I moollanni qaqqiso waarooyyo› yaa

⁴⁹ixxenne maqire baxxam besha ganimma, dimbaaninne maqirem itimmaa agimmaa asheerookko.

⁵⁰Ee awwaadaanchik moollannim ixxi egerubee'i ayyaamonnee la'ubee'i ammanennee waaraa

⁵¹guzumo'ookko; ixxi saamom birantam keeninnette issookko. Ee beyyonnem wi'llookkoo inqe iicookkoo» yukko.