Read Hadiyya Maatiwoos Mishiraachcha 25 Bible Online

Maatiwoos Mishiraachcha 25 - Hadiyya bible

Maatiwoos Mishiraachcha 25

¹ Odim Yesuus «Ee ammane iima'n adillan kuraaza amadda'a idaayyichcho aa'lleena fitto'i tommi baajaammuwwa labookko.

²Ixxuwwiinsim ontii qawwuwwa ontii odim qoolluwwi hee'llo'o.

³Oo qawwuwwi kuraaza amadda'a hee'llo'o bagaan kuraazina gaaza edda'a amaddo'oyyi hee'llo'o.

⁴Ihukkaarem qoolluwwi kuraazinne maqirem gaaza edda'a amadda'a hee'llo'o.

⁵Idaayyichchi dasu ammanenne hundam diriir amadu bikkina iinse'llo'o.

⁶«Ihukkaarem luxxi baqitenne ‹Oono'o, idaayyichchi waaraakko! Fittakka'a aa'llehe!› yakkam corochchi macceesamukko.

⁷Ee ammanenne oo baajaammuwwi hundim ki'lla'a ixxuwwi gaqqi kuraazzuwwa caakkisso'o.

⁸Oo qawwuwwi qoolluwwina ‹Ni kuraaz xoo'eenatte. Ki'nnuwwi gaaziinsi niina uwwehe› yita'a uunxito'o.

⁹«Ihukkaarem oo qoolluwwi dabatta'a ‹Niinaa ki'nnuwwinaa ihoo zayti bee'e. Ee'isiinsi daddaraa'n beyyo mattakka'a ki'nnuwwi gagina bitaa'llehe› yito'o.

¹⁰Ee bikkina oo qawwuwwi gaaza bitaa'lleena matto'o. Ixxuwwi bitaa'lleena matto'isam idaayyichchi afukkaare guddo'i ontem qoolluwwim ixxenne maqirem bollochcho'i mine aagga'a lasage u'llummi xufamukko.

¹¹ «Ee lasage oo qawwuwwi waatta'a ‹Moollanna, moollanna, niina fooqaa'e!› yita'a uunxito'o.

¹²Ihukkaarem idaayyichchi dabaraa ‹Hanqinam an ki'nnuwwina kuroommo; an ki'nnuwwa la'oommoyyo› yukko.

¹³«Ee bikkina ki'nnuwwim balla te'im ammane laqqakkambee'i bikkina qoxxitakka'a egellehe» yukko.

¹⁴ Odim Yesuus «Iima'n adillan mat manchi ixxi awwaadaano weeshaa ixxena yoo amaxxa hundam yabo uwwaa mulli uulla mareena gudu mancho labookko.

¹⁵Oo manchi annanchinam ixxuwwi malaayyisanne matina onto, matinam lamo, matina odim mat makiliita uwwaa marukko[18].

¹⁶Onti makiliita aa'ukkok ee ammanem maraa daddaraa lasage mulli onti makiliita tirfisukko.

¹⁷Lamo aa'ukkokim ee'isam lamo tirfisukko.

¹⁸Ihukkaarem mato aa'ukkok maraa bare hinaa ixxi moollannika diinate waammukko.

¹⁹«Lobakat ammaniinsi lasage ee awwaadaa'nnek moollanni waaraa ixxuwwina uwwu diinate shallagukko.

²⁰Onti makiliita aa'u awwaadaanchi mulli onto edaa amadaa ‹Moollanna, onti makiliita iina yabo uwwitaa hee'llitto. Oono'o, mulli onto edaa tirfisaammo› yukko.

²¹Ixxi moollannim ‹Erane, at amma'nnantaattoo er awwaadaancho. Hoffi luwwanne amma'nnantaattoohan ikkitti bikkina lob luwwanne gassaanchi issoommo. Waare, ki moollanninnem liirame› yukko.

²²Lam makiliita aa'ukkokim hincaa ‹Moollanna, lam makiliita iina yabo uwwitaa hee'llitto. Oono'o, lamo edaa tirfisaammo› yukko.

²³Ixxi moollannim ‹Erane, at amma'nnantaattoo er awwaadaancho. Hoffi luwwanne amma'nnantaattoohan ikkitti bikkina lob luwwanne gassaanchi issoommo. Waare, ki moollanninnem liirame› yukko.

²⁴Mat makiliita aa'ukkokim hincaa ‹Moollanna, at wixxitbee'i luwwa muttoo, binnaa'llibee'i hurbaatam wixxaa'lloo mogaalli manchi ikkittisa la'oommo.

²⁵Ee bikkina an keese baddummo; maraahim bare hinaa waammummi ki diinat kuno'o› yukko.

²⁶«Ixxi moollannim dabaraa ‹At jor ceemmaalli awwaadaancho! Wixumbee'i beyyiinsi muroommisaa binnaa'umbee'i beyyiinsim wixxaa'oommisaa laqqoohonnihe?

²⁷Eehaare an waaraa i diinate tirfinnem a'llona daddaraanina uwwiteenahe?

²⁸Kaba ee diinate ixxeensi aa'llakka'a tommi makiliit yoo manchina uwwehe.

²⁹ Yoohaannina ayyenam edakka'a uwwakkamaare eraa'llaanniinsim ixxena lobakata lophphookko. Ihukkaarem bee'aanniinsi ayyeensim ixxena yooqaxoomam massakkamo.

³⁰ Ka awwaad bee'i awwaadaancho biiranne yoo tuunsonne fissitakka'a uunjehe. Eekke'em wi'llookkoo inqe iicookkoo› yukko» yaa kurukko.

³¹ Odim Yesuus «Manchi Beet iima'n asse'amaaninne hundinnem kibbamaa lombinne waaroo ammane adilla'n barcumanne afuurookko.

³²Minaadab hundim ixxi illagenne wixxookko; ixxim allaaraanchi gereebba fella'iinsi annanni issoo'isa mat minaadaba mullaanniinsi annanni issookko.

³³Gereebba ixxi makkanne fella'am qeddanne uullisookko.

³⁴«Ee ammane adilim ixxi makkanne yo'i keenina ‹Iyyanni maassaammuwwa, waallehe! Heer uulli qooccamukkaanniinsi ki'isaa ki'nnuwwina gudu adillano lago aa'llehe.

³⁵Mashka'oomim an sibaarummaare itissakko'ookko; xeebe'ummaarem agissakko'ookko; koyyiinchi ihaa waarummaare koyyinano aa'llakko'ookko.

³⁶Habiillummaare eddeessakko'ookko; xissummaare moo'llakko'ookko; karamummaarem xa'mmitakko'ookko› yookko.

³⁷«Xummaanim ixxena dabatta'a ‹Ni Moollanna! Hinki balla sibaattaa moo'nnaa itinsummo? Hinki balla xeebe'llaa moo'nnaa aginsummo?

³⁸Hinki balla koyyiinchi ikkaa moo'nnaa koyyinano aa'nnummo? Hinki balla habiillitaattoo moo'nnaa eddeensummo?

³⁹Ee'isam xissitaa te'im karantaa moo'nnaa hinkammane xa'mminummo?› yitamo.

⁴⁰Adilim dabaraa ‹Hanqinam an ki'nnuwwina kuroommo; ka hoffi iyyabbaayyuwwiinsi matina issitakko'ok iinam issitakko'aannisa› yookko.

⁴¹«Ee lasage odim qeddi kollonne yo'i keenina ‹Ki'nnuwwi duumantakko'oo keeno, i illagiinsi qee'llehe! Sheexaanchinaa ixxi asse'amaaninaa gudu heer heerinam xoo'oobee'i giiranne mallehe!

⁴²Mashka'oomim an sibaaraa itissakko'oyyo. Xeebe'aahim agissakko'oyyo.

⁴³Koyyiinchi ihaa koyyinano aa'llakko'oyyo. Habiillaahim eddeessakko'oyyo. Xissaatii karamaatii xa'mmitakko'oyyo› yookko.

⁴⁴«Ixxuwwim dabatta'a ‹Ni Moollanna! Neese at sibaattaa te'im xeebe'llaa te'im koyyinano waattaa te'im habiillitaa te'im xissitaa te'im karantaa moo'nnaa hinki balla hara'mmimma sambummo› yitamo.

⁴⁵Adilim dabaraa ‹Hanqinam an ki'nnuwwina kuroommo; ka hoffi iyyabbaayyuwwiinsi matina issitakkobee'ek iinam issitakkobee'aannisa› yookko.

⁴⁶ Ee lasage oo keen heer heerinam hee'oo bichchina mattamo. Ihukkaarem xummaan keen heer heerina hee'oo heechchina mattamo» yukko.