Read Hadiyya Maatiwoos Mishiraachcha 26 Bible Online

Maatiwoos Mishiraachcha 26 - Hadiyya bible

Maatiwoos Mishiraachcha 26

¹Yesuus ee hundam losisaa guullaa lasage ixxi losaanina

² «Lam balliinsi lasage Shaashshiqqi ugud yoo'isa laqqakkamo. Manchi Beetom saqalamoo'isina higisakka'a uwwakkamo» yukko.

³Ee ammane qeessa awwonsaanii lommannii hundiinsi lob qeessichchi ihu Qayyaaf minenne dummita'a hee'llo'o.

⁴Hantaarinne Yesuusa amadiisseenaa shisiisseena a'llanto'o.

⁵Ihukkaarem «Minaadab hambalaachchamoobee'isa uguxxi woronne ihoone» yito'o.

⁶Yesuus Biitaana yakkam gattenne oddomachchonne firoo baddisoo jabbi amadaakkoo Simi'oon minenne hee'ukko.

⁷ Ee minenne hurbaata itonam lobakata bito xee'aalli ihaakkoo shitto'i yoo albaasxiroos bilqaaxa amadda'a ixxi beyyo waatto'o. Ee shitto'om ixxi horoorenne dunto'o.

⁸Ihukkaarem ixxi losaan eekka moo'llo'i ammanenne nadadda'a «Kuk qishirchoyyonnihe?

⁹Ku shitto'i lobakat birina biteesamaa diinatooma buxina uwwimmi xansiisam hee'ukko» yito'o.

¹⁰Eekka la'u bikkina Yesuus ixxuwwina «Ki'nnuwwi ka meentichcho mahina hawwissakkamuulla? Ise iina er luwwa issito'ookko.

¹¹ Bux hundi ammanem ki'nnuwwinnette; ihukkaarem an ki'nnuwwinne hundi ammane hee'oommoyyo.

¹²Ise i orachchonne ka shitto'o dunto'ok eese waammina gudisimminatte.

¹³Hanqinam an ki'nnuwwina kuroommo; ku mishiraachchi sagar heer uullanne alallaatamoo beyyi hundannem ku ise issito'ok ise tiirimmina kuramookko» yukko.

¹⁴Ee lasage tommiinsii lam losaaniinsii mat hee'u Asqoroto'i uulli Yihud qeessa awwonsaa'n beyyo maraa

¹⁵ «An Yesuusa ki'nnuwwina higisaa uwwumta'n iina maha uwwitakkamo?» yukko. Ixxuwwim sad kin bira uwwito'o.

¹⁶Ee ammaniinsi ki'isaa Yihud Yesuusa higisaa uwweena makkoo ammane hasam hee'ukko.

¹⁷Qorosho'i uguxxi luxxi ballanne ixxi losaan Yesuus beyyo waatta'a «Shaashshiqqi Uguxxi maadda kiina hannonne gudinsona hassootto?» yita'a xa'mmito'o.

¹⁸Ixxim losaanina «Beero'o aaggakko'isam edantakkam manchi mine mattakka'a ‹Losisaanchi «Iina amman afu bikkina i losaaninne maqirem Shaashshiqqi Uguxxi hurbaata ki minenne iteenatte» yoolla› yitakka'a kullehe» yukko.

¹⁹Losaanim Yesuus ijaajukkisannem uguxxi hurbaata gudisso'o.

²⁰Uulli hiimu ammanenne Yesuus tomminnee lamem losaaninnee maqirem maadda iteena afuurukko.

²¹Ixxuwwim hurbaata ittu'uuyyi Yesuus «Hanqinam an ki'nnuwwina kuroommo. Ki'nnuwwiinsi mat eese higisaa uwwookko» yukko.

²²Ixxuwwim ee woshshanne lobakata kichche'lla'a annannichchim «Moollanna! Anedda'e?» yito'o.

²³ Yesuusim dabaraa «Iinninne maqirem bixxiranne anga aagisookkok eese higisaa uwwookko.

²⁴Manchi Beeta'i ixxi bikkina Keesammi Kitaabanne kitaabamukkisam lehookko. Ihukkaarem Manchi Beeto higisaa uwwoo manchina aayye! Oo manchi qaramubeeta'n e'llam hee'ukko» yukko.

²⁵Yesuusa higisaa uwwoo Yihudim «Losisaancho! Anetda'e?» yukko. Yesuusim «At yittisame!» yukko.

²⁶Hurbaata ittu'uuyyim Yesuus qorosho'o ki'isaa Waa'a galaxxukko. Iiqaatim ixxi losaanina «Hii'nnehe; kuk i maara, ittehe» yaa uwwukko.

²⁷Odim humbullonne yoo woyi'n diqaasam ki'isaa Waa'a galaxxaa lasage «Hundim ka humbulliinsi aggehe.

²⁸ Lobakat kee'n baaxii'l haafitina dunamoo haareechchi hidi'l i xiig kane.

²⁹An ki'nnuwwina kuroommo; Iyyanni adillanonne ki'nnuwwinne maqire haareechchi woyi'n diqaasa agoommi ayyaam afeebe'e ka woyi'n diqaasiinsi od agoommoyyo» yukko.

³⁰Ee lasage mazmuura zammatta'a Wee'l duunanne fitto'o.

³¹ Odim Yesuus ixxi losaanina «Ki'nnuwwi hundim i mashka'inne qolantakkamo; oohim Keesammi kitaabanne ‹Allaaraancho aphphisoommo; allaachchi gereebbim binnookko› yamamu bikkinatte.

³² Ihukkaarem an lehiinsi ki'aa lasage ki'nnuwwiinsi gaassaa Galiila afoommo» yukko.

³³Pheexiroosim Yesuusina «Mulli keen hundim ki mashka'inne qolamuta'nnim an hore'em qolamoommoyyo» yukko.

³⁴Yesuusim «Hanqinam an kiina kuroommo; at kaballi hiimo antabaa'i muunoo'n illageen sas kore eese laggootto» yukko.

³⁵Ihukkaarem Pheexiroos «Kiinninne maqire lehoomta'nnim keese hore'em lagoommoyyo» yukko. Gatto'i losaan hundim ixxi yukkisam yito'o.

³⁶Ee lasage Yesuus ixxi losaaninnem Geeteseemaana marukko. Ixxuwwinam «An ee beyyo maraa Waa'a uunxeembe'e keyye afuullehe» yukko.

³⁷Ixxenne maqire Pheexiroosaa Zabdiwoos lamem oosoo amadaa maraa kichche'immaa u'nnamimmaa asheerukkoo.

³⁸Ixxuwwinam «An lehoomqaxa kichche'aammo. Ki'nnuwwi ka beyyonne egellehe; iinninne maqirem qoxxehe» yukko.

³⁹Ixxuwwiinsim hofqaxam qee'llaa uullanne illillaachcha ubaa «Iyyanna, xanamoohan ihulas ku hawwi humbulli iinniinsi higona. Ihukkaarem an doo'llummis ihoo'n at doo'llittisa ihona» yaa Waa'a uunxukko.

⁴⁰Ee lasage sasem ixxi losaa'n beyyo waaraa diriitto'ookkoka moo'ukko; Pheexiroosinam «Iinninne maqire hofqax ammanem qoxximma hooggakko'onnihe?

⁴¹Keenanchanne aaggakkambee'isa qoxxitakka'a Waa'a uunxehe. Tiir hundi ammanem gudaakkoohane. Ihukkaarem maar hoongaancho» yukko.

⁴²Odim la'mmaagge ixxuwwiinsi annanni ihaa maraa «Iyyanna! Ka hawwi humbulliinsi agoo'n higimmi xanamoobee'an ihulas ki doo'l ihona» yaa uunxukko.

⁴³Odim losaa'n beyyo daba'llaa waaru ammanenne diriir ixxuwwa amadaa hee'u bikkina diriitto'oo moo'ukko.

⁴⁴Odim ixxuwwa uraa maraa illagee'nnisam saxxaaggem uunxukko.

⁴⁵Ee lasage ixxi losaa'n beyyo daba'llaa waaraa «Kabad afeebe'em usheexxitakka'a iinse'llakko'oollannihe? Oono'o! Amman afaakko. Manchi Beeto baaxiilaa'n anganne higisakka'a uwwakkamo.

⁴⁶Ki'llehe, mallona. Oono'o, eese higisaa uwwookkok hincaakko» yukko.

⁴⁷Yesuus eekka wocukkuuyyim tommiinsii lamiinsii mat hee'u Yihud waarukko. Ixxenne maqirem bisa'aa mugaa amaddo'oo lobakat manni hee'llo'o. Oo keenim qeessa awwonsaaniinsii minaadaphphi lommanniinsii asse'anto'oo keen hee'llo'o.

⁴⁸Yihudim ixxenne waaru mannina «An suunqoommi manchi ixxotte; ixxo amaddehe» yaa mare'e kuraa hee'ukko.

⁴⁹Yihud ee ammanem Yesuus beyyo waaraa «Losisaancho! Xummannihe?» yaa suunqukko.

⁵⁰Yesuusim ixxena «I beshichcho, mahina waattitto?» yukko.[19] Ee lasage oo manni hincita'a Yesuusa amaddo'o; katto'ome.

⁵¹Yesuusinne hee'llo'i keeniinsim mat seejjiinsi bisa'a fissaa hundiinsi lob qeessichchi awwaadaanchika macce murukko.

⁵²Yesuusim «Ki bisa'a ki seejjannem dabare. Bisa'a ki'isoo keeno bisa'im guullookko.

⁵³Hasisoohan ihuta'n an iyyanna xa'mmaa 12,000 gogotiinsi lophphoo iima'n asse'amaano asse'eena xanoobee'eka labissaatennihe?

⁵⁴Eehid ihuta'n Keesammi Kitaabanne ‹Ihookko› yamamukkok hinkid wo'mmeena xanookko?» yukko.

⁵⁵ Ee ammanenne Yesuus eehe'e wixxaa hee'u mannina «Fanga amadakkamisa eese amaddakkeena bisa'aa mugaa amaddakka'a waattakko'onnihe? An ballina ballina Keesammi minenne afuuraa losisummuuyyi amaddakko'oyyo.

⁵⁶Ihukkaarem ku hundim ihukkok hiraagaan kitaabbo'ok wo'mmoo'isinatte» yukko. Ee ammanenne losaan hundim ixxo utta'a gibbo'o.

⁵⁷Yesuusa amaddo'i mannim hundiinsi lob qeessichchi hee'u Qayyaaf beyyo massito'o. Ee beyyonnem Seera losisaanii minaadaphphi lommannii wixxita'a hee'llo'o.

⁵⁸Ihukkaarem Pheexiroos hundiinsi lob qeessichchi qash wor afeebe'e qee'llonnette ihaa Yesuusa awwonam hee'ukko. Woshshika lasaancho moo'eena qash wororo aagaa egeraaninne maqirem afuurukko.

⁵⁹Qeessa awwonsaanii Ayihuxxi daannuwwii hundim Yesuusa shisiisseena qophpha'n naqaasha hassam hee'llo'o.

⁶⁰Dut qophpha'n naqaash hincukkaarem lehoo'isa issoo naqaasha siiddo'oyyo. Lasaanchonne lam manchi hincita'a

⁶¹ «Ku manchi ‹Waa'ika Keesammi Mine gindaa sas ballanne dabaraa baxeena xanoommo› yaakko» yito'o.

⁶²Hundiinsi lob qeessichchim ki'aa Yesuusina «Ku manni keesenne naqqassoo'i luwwi hundinam maham dabattooyyonnihe?» yaa xa'mmukko.

⁶³Ihukkaarem Yesuus cawwaaurukko. hundiinsi lob qeessichchi odim Yesuusina «Hee'oo Waa'i summinne an keese xa'mmoommo; at Waa'i Beet Kiristoosatte ikkaattoolas niina kure» yukko.

⁶⁴ Yesuusim dabaraa «At yittisame. An ki'nnuwwina kuroommo; kanniinsi eehid Manchi Beet hundam xanoo Waa'aannonne makkanne afuuraahii iima'n duubinnem waarukkuuyyii moo'llakkamo» yukko.

⁶⁵ Ee ammanenne oo qeessichchi ixxi eddechcha dereeraa «Oono'o, Waa'inne game'llamoolla! Kanniinsi mulli naqaash niina maha issookko? Waa'inne game'llamukkuuyyi ki'nnuwwi gagim macceessakko'ookko.

⁶⁶Kaba ki'nnuwwina maha labookko?» yukko. Ixxuwwim «Ixxena leh hasisookko!» yita'a dabatto'o.

⁶⁷ Ee lasage ixxi illenne anja tuhito'o; tomtoomminnem aphphisso'o. Mat mat keenim oobo'inne aphphissu'uuyyi

⁶⁸«Kiristoosa, keese aphphisukkok ayyette? Huno'o niina hiraago kure!» yitam hee'llo'o.

⁶⁹Pheexiroosim ee qeessichchi qash woronne afuuraakkoohaannonne mat baxaancho ixxi beyyo waatta'a «Atim Galii'l Yesuusinne maqirem hee'llitto» yito'o.

⁷⁰Ihukkaarem Pheexiroos «At yitoottoka an la'oommoyyo» yaa hundi illagennem lagukko.

⁷¹Ixxim fireena ooxxi gooc kollonne marukkuuyyi odim mulli baxaanchom moo'lla'a ee beyyonne hee'u mannina «Ku manchim Naazireexxi Yesuusinne maqirem hee'ukko» yito'o.

⁷²Pheexiroosim «Ka at yitoo mancho an la'oommoyyo» yaa hide'aa la'mmaaggem lagukko.

⁷³Hofqax ammaniinsi lasage ee beyyonne uullita'a hee'llo'i manni Pheexiroos kollonne hincita'a «At woccoo'isim la'isoolla; hanqinam atim ixxuwwiinsi mato» yito'o.

⁷⁴Ee ammanenne Pheexiroos «An ka mancho la'oommoyyo!» yaa ixxi gaga duu'mmimmaa hide'immaa asheerukko. Ee ammanem antabaa'i muunukko.

⁷⁵Pheexiroosim «Antabaa'i muunoo'n illageen eese sasaagge laggootto» yaa Yesuus wocu sagara tiiraa biiranne firaa shikkaa wi'llukko.