Read Hadiyya Maatiwoos Mishiraachcha 27 Bible Online

Maatiwoos Mishiraachcha 27 - Hadiyya bible

Maatiwoos Mishiraachcha 27

¹Soodaraar daram qeessa awwonsaanii minaadaphphi lommannii hundim Yesuusanne leho oogatisseena a'llanto'o.

²Ee lasage Yesuusa katta'a massita'a gassaanchi Philaaxoosina higissa'a uwwito'o.

³ Higisaa uwwu Yihudim Yesuusanne oogatamukkisa moo'aa saxxukko; massaa hee'u sadem kin biram qeessa awwonsaaninaa lommanninaa dabaraa uwwaa

⁴«Muccur mancho higisaa uwwimminne an hawwodaammo» yukko. Ihukkaarem ixxuwwi «Neese mah hawwisaate; ookki ki quuxo» yito'o.

⁵Ixxim sadem kin biram Keesammi Mininne darabaa firukko; maraahim xaga'llaa lehukko.

⁶Qeessa awwonsaanim ee bira ki'issa'a «Xiiqqi diinat ihu bikkina Keesammi Mi'n diinatenne edimmi hasisooyyo» yito'o.

⁷Ee bikkina a'llanta'a lasage mulli uulli manni waammamoo beyyo mat buchchi mu'uta baxaanchiinsi bitaa'llo'o.

⁸Ee bikkina oo uulli kaballi afeebe'em Xiiqqi Uulla yamamookko.

⁹ Ee'isinne hiraagaanchi Ermiyaasinne «Isra'ee'l oos ixxena miqqeena iittanto'i sadem kin biram massito'o.

¹⁰Waa'i eese ijaajukkisannem buchchi mu'uta baxaanchi uullina miqqo'o» yukkok wo'mmukko.

¹¹Yesuusim gassaanchi illagenne hincukko. Gassaanchim ixxena «At Ayihuxxi adilannihe?» yaa xa'mmukko. Yesuusim «At yittisame» yaa dabarukko.

¹²Ihukkaarem qeessa awwonsaanii lommannii kasasso'i woshshina maham dabarukkoyyo.

¹³Odim Philaaxoos «Keesenne mee'i luwwinne keese kasasakkamulda'e macceessooyyonnihe?» yukko.

¹⁴Ihukkaarem gassaanchi lobakata maalaleebe'e Yesuus matem sagaram dabarukkoyyo.

¹⁵Gassaanchi Shaashshiqqi Ugudanne karatiinsi tiramona minaadab xa'mmoo mat mancho tirimmi losamaakkoohan hee'ukko.

¹⁶Ee ammane boqqoominne la'amaakkoo Barbaana yakkam mat manchi karamaa hee'ukko.

¹⁷Minaadab wixxukkaare Philaaxoos «Barbaanannii Kiristoosa yamamoo Yesuusa fatakihona hassakkamo?» yaa xa'mmukko.

¹⁸Eehid yukkokim Yesuusa to'achchinne higissa'a uwwito'isa la'oo bikkinatte.

¹⁹Oogaxxi barcumanne Philaaxoos afuuraakkoohaannonne ixxi mi'n ama «Ee manchi mashka'inne hii'mmo'o haqaawwonne lobakata hawwummuuyyi garummi bikkina ee muccur manchonne maham issitoobee'isa» yita'a asse'llo'o.

²⁰Ihukkaarem ee ammane qeessa awwonsaanii lommannii «Barbaan tiramaa Yesuus lehona!» yita'a Philaaxoosa xa'mmitona minaadab soggo'o.

²¹Gassaanchi la'mmaaggem «Lamiinsim ayye fatakihona hassakkamo?» yaa minaadaba xa'mmukko. Ixxuwwim «Barbaana!» yito'o.

²²Philaaxoosim ixxuwwina «Eehaare Kiristoosa yamamoo Yesuusa maha isso?» yaa xa'mmukko. Hundim «Saqalamona!» yito'o.

²³Gassaanchim «Mahinatte? Ku manchi hawwodu luwwi maha?» yaa xa'mmukko. Ihukkaarem ixxuwwi «Ixxi saqalamona!» yita'a lobakata shuutto'o.

²⁴ Philaaxoosim oo woshshi dambaqa qooccimmiinsi bagaan awwaad bee'an ihukkisa la'aa «Ki'nnuwwi quuxo; an ka manchi xiigiinsi muccura» yaa wo'o eebisaa minaadaphphi illagenne anga aanshaqqukko.

²⁵Minaadab hundim «Ixxi xiiga niinniinsii ni oosiinsii Waa'i miqisona» yito'o.

²⁶Ee ammanem Philaaxoos Barbaana ixxuwwina fatakukko. Ihukkaarem Yesuusa gansiisaa lasage saqalamoo'isina ixxuwwina higisaa uwwukko.

²⁷Ee lasage gassaanchik gaadaan Yesuusa ee gassaanchi qashoro massito'o. Dut gogotam Yesuus kululleetanne wixxaa'llo'o.

²⁸Yesuusika eddechcha sheelatta'a kashar eddechcha eddeesso'o.

²⁹Adilla'n mare'e uttinne baxxa'a ixxi horoorenne issito'o. Ixxi makki angannem shomboqo'i bicco amadiisso'o. Ixxi illagennem heeshtu'uuyyi «Ayihuxxi adila, xummi kiina ihona!» yitu'uuyyi naacanto'o.

³⁰Anjam tuhito'o; shomboqo'i biccom ixxi angiinsi aa'lla'a horoore aphphisso'o.

³¹Ixxonne naacca'a lasage kashar eddechcha sheelatta'a ixxi eddechcha eddeessa'a saqalteena massito'o.

³²Ee qash woriinsi fittu'uuyyim Qaaree'n uulli Simi'ooninne edanto'o; masqalam iyyona giddisso'o.

³³Ee lasage «Horoo'l Qooma» yamamoo Golgota affo'o.

³⁴ Ee beyyonnem Yesuusina dambi hamaaramaakkoo woyi'n diqaasa agona uwwito'o. Ihukkaarem suuminne gubbukko bagaan ageena hasukkoyyo.

³⁵ Yesuusa saqalta'a lasage saamo fissita'a ixxeka eddechcha baxxanto'o.

³⁶Eekke'ennem afuutta'a egettam hee'llo'o.

³⁷Ixxo kasasso'i woshsham «Kuk Ayihuxxi manni adil Yesuusatte» yita'a kitaabba'a Yesuus horoo'l aganne masqalanne issito'o.

³⁸Ee ammane Yesuusinne maqirem lam fanguwwa matoo makkinne matoo qeddi kollinne saqalto'o.

³⁹ Eeheen higoo araatim ixxo gadda'a horoore heekkeessu'uuyyi

⁴⁰ «Ku Keesammi Mine ginditaa sas ballanne baxxoo at huno'o, ki gaga gatise! Waa'i Beet ikkaattoolas huno'o, masqaliinsi dille!» yitam hee'llo'o.

⁴¹Odim qeessa awwonsaan, Seera losisaanii lommannii

⁴²«Ixxi mulli keeno gatisukko; ihukkaarem ixxi gaga gatiseena xanukkoyyo. Ixxi Isra'ee'l adil ihulas kaba masqaliinsi dillona; neesem ixxonne amma'nninoommo.

⁴³ Waa'anne amma'nnamaakko. Odim ‹An Waa'i Beeto› yam hee'u bikkina, huno'o, Waa'i ixxo iittoohan ihulas kaba gatisona» yita'a naaccam hee'llo'o.

⁴⁴Ixxenne maqire saqalanto'i fanguwwim game'llitam hee'llo'o.

⁴⁵Loh sa'aatiinsi ki'isaa honsi sa'aat afeebe'e hundem uullim tuunsukko.

⁴⁶ Honsi sa'aata ihoo ammanenne Yesuus «Eeloohee! Eeloohee! Lamaa Sabaqtaanii?» yaa laarukko. Ee'isa yimmim «I Waa'a! I Waa'a! Eese mahina uttitto?» yimma.

⁴⁷Ee beyyonne uullita'a hee'llo'i mannik mat mat keen eekka macceessa'a «Ku manchi Eeliyaasa weeshoolla» yito'o.

⁴⁸ Ee ammanem ixxuwwiinsi mat geeraa maraa hallaammi'nnoo'i luwwa eebaa shiishaakkoo woyi'n diqaasanne cefaa shomboqo'i bicconne issaa Yesuusina agisukko.

⁴⁹Ihukkaarem mulli keen «Huno'o, ure! Eeliyaas waaraa gatisooda'e moo'nnoommo» yito'o.

⁵⁰Odim Yesuus sagara iimaa'aa laaraa lasage ixxi foore higisaa uwwukko.

⁵¹ Keesammi Minenne hee'u du'm eddechchim ludiinsi lugum afeebe'e lam beyyonne dereeramukko. Uullim huxe'ukko. Kinneewwim anamukko.

⁵²Waammuwwim fooqukko. Leto'i xummaan kee'nnekim dut lehiinsi ki'llo'o.

⁵³Waammuwwiinsim fitta'a Yesuus lehiinsi ki'aa lasage keesammi beero'o Yerusaaleema aagga'a dut mannina moo'anto'o.

⁵⁴Xibbi halaqichchii ixxenne maqirem Yesuusa egettam hee'llo'i gaadaanii uulli huxechchaa ee ammane ihu luwwaa moo'llo'i ammanenne lobakata baddita'a «Hanqinam kuk Waa'i Beet hee'ukko!» yito'o.

⁵⁵ Eekke'em qee'llonne ikka'a dut meenti moo'llam hee'llo'o. Ixxuwwim Galiiliinsi ki'issa'a Yesuusina hara'mmitu'uuyyi awwontam keen hee'llo'o.

⁵⁶Ixxuwwi lambe'enne Magdala yakkam beero'i Maaraame, Yaaqoobinaa Yooseefinaa ama hee'llo'i Maaraamee Zabdiwoos oos amaa hee'amukko.

⁵⁷Uulli hiimu ammanenne Armaate'i beero'ik Yooseefa yakkam goddaanchi ee beyyo waarukko. Ixxim Yesuusa awwonaanchi hee'ukko.

⁵⁸Yooseefim Philaaxoos beyyo maraa Yesuusika leesha uunxukko. Philaaxoosim uwwakkona ijaajukko.

⁵⁹Yooseefim leesha massaa talbiinsi dadamaakkoo muccur eddechchinne keefanukko.

⁶⁰Ixxi gagina kininne fere'aa gudisaakkoo haareechchi barenne waammaa geejji kina onkoroollisaa ifiisaa marukko.

⁶¹Magda'l Maaraamee mulli Maaraamee ee beyyonne waammi illagenne afuuramaa hee'ukko.

⁶²La'm balla daram Usheexxaxxi Ballanne qeessa awwonsaanii Farisaawe'uwwii mat ikka'a Philaaxoos beyyo matta'a

⁶³ «Moollanna, oo huushisaanchi leheena illageen ‹Saxxi ballanne lehiinsi ki'oommo› yukkoka tiillaammo.

⁶⁴Ee bikkina ixxi losaan hiimonne matta'a leesha game'lla'a minaadabina ‹Oono'o! Lehiinsi ki'aakko› yitambee'isina ixxek waammi sas balli afeebe'e egeramoo'isina ijaaje. Eehid ihubeelas lasaqqi huushanchi luxxaanniinsi baasaakkoohan ihookko» yito'o.

⁶⁵Philaaxoosim ixxuwwina «Ki'nnuwwinam egeraan yookko; laqqakkamisinne mattakka'a egessiissehe» yukko.

⁶⁶Ee bikkina matta'a waamma koobo'inne ifiissa'a egeraaninne egessiisso'o.