Read Hadiyya Maatiwoos Mishiraachcha 28 Bible Online

Maatiwoos Mishiraachcha 28 - Hadiyya bible

Maatiwoos Mishiraachcha 28

¹Usheexxaxxi Ayyaam higaa lasage saantina luxxi balli soodukkuuyyim Magda'l Maaraamee mulli Maaraamee waamma moo'ameena maramukko.

²Dangonnem malaayyaam uulli huxechchi ihukko; Waa'i asse'amaanchim iimaniinsi dillaa waammanne ifiisamu kina onkoroollisaa hanenne afuurukko.

³Ee asse'amaanchikim hagar banqisa belecce'oohan hee'ukko. Ixxi eddechchim baraxxisa qadaalli hee'ukko.

⁴Egeraanim ee asse'amaancho baddito'i bikkina huxe'llo'o; tuude'llo'ome.

⁵Oo asse'amaanchim ee meentina «Ki'nnuwwi badditakkotte! Saqalamu Yesuusa hassakkamisa la'oommo.

⁶Ixxi keyye bee'e; yukkisam lehiinsi ki'aakko. Ixxo waammakko'i beyyo waattakka'a moo'llehe.

⁷Qaqqissakka'a mattakka'a ixxi losaanina ‹Lehiinsi ki'aakko. Ki'nnuwwiinsi gaassaa Galiila maroolla; eekke'em ixxo moo'llakkamo› yitakka'a kullehe. Oono'o! An ki'nnuwwina kuraammo» yukko.

⁸Ee bikkina oo meenti baddimminnee lobakat liiranchinnee waammi beyyiinsi qaqqissa'a ixxi losaanina kutteena geettu'uuyyi matto'o.

⁹Mattu'uuyyim Yesuus dangonnem ixxuwwinne edamaa «Xummi ki'nnuwwina ihona!» yukko. Ixxuwwim ixxi lokko amadda'a otossito'o.

¹⁰Ee ammanenne Yesuus ixxuwwina «Badditakkotte! Mattakka'a iyyabbaayyuwwina Galiila mattona kullehe; eekke'enne eese moo'llamo» yukko.

¹¹Oo meenti mattu'uuyyim waamma egetta'a hee'llo'i egeraa'nnek mat qax beero'o matta'a qeessa awwonsaanina ee ihu luwwa hundam kutto'o.

¹²Qeessa awwonsaanim lommanninne maqirem wixxita'a a'llanta'a lasage ee egeraanina lobakat diinate uwwita'a

¹³«Mannina ‹Neese diriillaammoohaannonne ixxi losaan hiimonne waatta'a ixxi leesha game'lla'a matto'o› yitakka'a kullehe.

¹⁴Ka woshsham gassaanchi macceesulas ki'nnuwwanne matem hawwim afoobee'isa neese axinsoommo» yito'o.

¹⁵Ee bikkina oo egeraan diinate a'llita'a ixxuwwina kurakko'isa issito'o. Oo woshshi kaballi afeebe'em Ayihuxxi manni lambe'enne binnukko.

¹⁶ Tommii mat losaanim Yesuus mattamisina kuraa hee'u Galiilanne yoo duuna matto'o.

¹⁷Ixxuwwim ixxo moo'llo'i ammanenne ixxena otossito'o. Ihukkaarem mat mat keen malanto'o.

¹⁸Yesuusim ixxuwwi kollonne hincaa «Iima'nnekii uullikii hundikim gassimmi malaayyi iina uwwamaakko.

¹⁹ Ee bikkina uulli hundam mattakka'a minaadab hundam Anni summinne, Beet summinnee Keesammi Ayyaa'n summinnee xammaqqakku'uuyyi i losaan issehe.

²⁰An ki'nnuwwa ijaajummi ijaaj hundam egettamisinam losissehe. Oono'o! An doolli beeddichchi afeebe'e hundi ammanem ki'nnuwwinne maqire yoommo» yukko.