Read Hadiyya Maatiwoos Mishiraachcha 3 Bible Online

Maatiwoos Mishiraachcha 3 - Hadiyya bible

Maatiwoos Mishiraachcha 3

¹Ee ammane Xammaqaanchi Yohaannis Yihuxxi uullanne yoo udma'anne alallaatukkuuyyi waarukko.

² Ixxim «Waa'ik adillan hincu bikkina baaxiilo biiraa yitakka'a daba'llehe» yaa alallaatimma asheerukko.

³ Oohim Waa'i hiraagaanchi Issaayyaasinne Yohaannis bikkina « ‹Moollannina googo gudissehe; googguwwam shiraashillehe› yukkuuyyi udma'anne laaroo manchi sagara» yaa wocukkane.

⁴ Yohaannisim edde'am hee'u eddechchi gaameela'i oddiinsi baxamaakkoohan hee'ukko. Ixxi lamadom omachchiinsi baxamu saqqinne lade'am hee'ukko. Itam hee'u hurbaatim qawwaawwaa udma'i uulli maraboo hee'ukko.

⁵Ee ammane Yerusaalee'm beero'iinsi, Yihuxxi uulliinsii Yoordaanoos daajji gadanonne yoo uulliinsii hundiinsim manni ixxi beyyo waaram hee'ukko.

⁶Ixxuwwim baaxiilo biiraa yito'aare Yoordaanoos daajjenne Yohaannis xammaqukko.

⁷ Lobakat Farisaawe'ii Saduuqaawe'ii xammaqanteena ixxi kollonne waattamisa Yohaannis moo'u ammanenne ixxuwwina «Ki'nnuwwi hamashshi ooso! Waaroo Waa'i quunqiinsi gibbakkamisina ki'nnuwwina ayyi kurukko?

⁸Baaxiiliinsi daba'llitakko'isa moo'isoo danaam baxo baxxehe.

⁹ ‹Neese Abrihaamina ooso› yitakku'uuyyi huushantakkotte. An ki'nnuwwina kuroommo; Waa'i ka kiniinsim Abrihaamina ooso ki'iseena xanookko.

¹⁰ Oono'o! Meesaan haqqi lugumonne gudaakko. Kabadem danaam misha mishoobee'i haqqi hundim muramaa giiranne edamookko.

¹¹Baaxiiliinsi daba'llitakko'isina mare'i ihona an ki'nnuwwa wo'inne xammaqoommo. Ihukkaarem iinniinsi lasage waarookkok Keesammi Ayyaaninnee giirinnee xammaqookko. Ixxim iinniinsi hore'em lobane; an ixxeka caamma'oomam iyyeena laboombee'ane.

¹²Hurbaata muccusseena axuruunsoo maanshim ixxi angannette; hurbaatooma annanni issaa muccussaa lasage gootaranne issookko. Ihukkaarem bura'ooma xoo'oobee'i giiranne shokkiisookko» yukko.

¹³Ee ammane Yohaannis ixxo xammaqoo'isina Galiiliinsi Yohaannis beyyo Yoordaanoos daajje Yesuus waarukko.

¹⁴Ihukkaarem Yohaannis «At eese xammaqimmi hasisookko bagaan at hinkid i beyyo waattitto?» yaa hooreena hasukko.

¹⁵Ihukkaarem Yesuus Yohaannisina «Muccuroo'm baxo hundam neese baximmi hasisoo bikkina kaba ure» yaa dabarukko. Yohaannisim Yesuus wocu woshshanne iittamu bikkina Yesuusa xammaqukko.

¹⁶Yesuus xammaqamaa wo'i woriinsi firukkisam iiman fooqukko. Waa'ik Keesammi Ayyaanim handarekkichchi kobi'llanne dillaa Yesuusanne afuurukkuuyyi moo'ukko.

¹⁷ Ee ammanem «An iittoommi eese liiransoo i beet kane» yoo sagar iimaniinsi waarukko.