Read Hadiyya Maatiwoos Mishiraachcha 4 Bible Online

Maatiwoos Mishiraachcha 4 - Hadiyya bible

Maatiwoos Mishiraachcha 4

¹ Ee lasage Sheexaanchi keenoo'isina Keesammi Ayyaan Yesuusa udma'i uulla massukko.

²Yesuusim sor ballaa sor hiimoo soommanaa lasage sibaarukko.

³Sheexaanchim ixxi kollonne hincaa «At Waa'ina Beet ikkaattoolas huno'o, ku kin hurbaat ihoo'isina ijaaje» yukko.

⁴ Ihukkaarem Yesuus ixxena dabaraa «Keesammi Kitaabanne ‹Manni hee'ookkok Waa'i suumiinsi firoo sagarinnette bagaan xale'i hurbaata itimminneyyo› yamamaa kitaabamaakko» yukko.

⁵Odim Sheexaanchi Yesuusa keesammi Yerusaalee'm beero'o massaa Keesammi mi'n ludonne fissaa uullisaa

⁶ Yesuusina «At Waa'ina Beet ikkaattoolas huno'o, aad ube. Mashka'oomim Keesammi Kitaabanne ‹Keese egettona Waa'i ixxi asse'amaano ijaajookko; ixxuwwim kinanne ki lokki qolamoobee'isa ixxuwwi anginne qoltamo› yamamaa kitaabamaakko» yukko.

⁷ Yesuusim Sheexaanchina «Odim Keesammi Kitaabanne ‹Ki Moollanni Waa'a keentitte!› yamamaa kitaabamaakko» yaa dabarukko.

⁸Ee lasage odim Sheexaanchi Yesuusa lob duunanne fissaa heer uulli adillanoo ixxuwwi lombaa hundam moo'isaa

⁹«At iina uullanne aad heeshtaa otossitlas ka hundam kiina uwwoommo» yukko.

¹⁰ Yesuusim «Sheexaancho, iinniinsi qee'lle! Keesammi Kitaabanne ‹Ki Moollanni Waa'ina otossihe; xale'i ixxenam awwaade!› yamamaa kitaabamaakko» yaa dabarukko.

¹¹Ee lasage Sheexaanchi Yesuusiinsi annanni ihaa marukko. Waa'i asse'amaanim Yesuus beyyo waatta'a ixxena awwaaddo'o.

¹² Yohaannis amadamaa karaxxi minenne aagukkisa Yesuus macceesu ammanenne Galiila marukko.

¹³ Naazireetam uraa Galii'l Dambalaq gadanonne yoo Qifirinnaahoom beero'onne afuureena marukko. Qifirinnaahoomim hee'oo Niftaalee'mmaannonnee Zaabiloo'n uullannettee.

¹⁴Oohim ihukkok hiraagaanchi Issaayyaas

¹⁵ «Zaabiloo'n uullanne, Niftaalee'm uullannee Yoordaanoos daajji eeqidonne dambalaq kollonne massoo gooqqi gadanonne yo'i mulli minaadaphphi Galiilannee

¹⁶tuunsonne hee'oo minaadab lophphaakkoo caakka moo'ukko. Leh haf woronne hee'u keeninam caakki firukko» yu sagar wo'mmoo'isinatte.

¹⁷ Ee lasage Yesuus «Waa'ik adillan hincu bikkina baaxiilo biiraa yitakka'a daba'llehe» yukkuuyyi alallaatimma asheerukko.

¹⁸Galii'l Dambalaq gadaninne Yesuus higukkuuyyim lam abbaayyuwwa moo'ukko. Ixxuwwim Pheexiroosa yamamu Simi'oonattee ixxi abbaayyi Indiraasattee hee'llo'o. Pheexiroosii Indiraasii qurxumme'e qaashsham keen hee'llo'i bikkina dambalaqanne shikka ubbuussam hee'llo'o.

¹⁹Yesuusim ixxuwwina «Waallehe, eese awwonnehe. Qurxumme'e qaashshakkamisam mannam qaashshakkamisam issoommo» yukko.

²⁰Ixxuwwim ee ammanem qurxumme'e amaddam shikka utta'a ixxo awwonto'o.

²¹Yesuus ee beyyiinsi hofqaxam shiqukkisam mulli keenom lam abbaayyuwwa Zabdiwoos oos Yaaqoobaa Yohaannisaa ixxuwwi anninne maqirem wongiranne afuutta'a shikka axissu'uuyyi moo'aa weeshukko.

²²Ixxuwwim ee ammanem wongiraa ixxuwwi annaa utta'a Yesuusa awwonto'o.

²³ Yesuus Ayihuxxi manni wixxixxi minneewwanne losisukkuuyyii Waa'i adilla'nneka mishiraachchi sagara alallaatukkuuyyii Galii'l uulli hundam marukko. Ee beyyuwwannem annanni annanni ihaakkoo hoongiinsii jabbiinsii hundiinsim manna fayyiisukko.

²⁴Ee bikkina Yesuusik sad Sooriy uulli hundannem macceesamukkaare annanni annanni jabbinne hawwoo manni hundam ixxi beyyo eebakko'o. Ee jabbaa'n lambe'ennem habus amadu keen, xafanni amadu keenii shiihuwwii hee'llo'o; ixxim fayyiisukko.

²⁵Galii'l uulliinsi, Tommi Beero'o yamamoo uulliinsi, Yerusaalee'm beero'iinsi, Yihuxxi uulliinsii Yoordaanoos daajji eeqidonne yoo uulliinsii waatto'oo lobakat manni Yesuusa awwonto'o.