Read Hadiyya Maatiwoos Mishiraachcha 5 Bible Online

Maatiwoos Mishiraachcha 5 - Hadiyya bible

Maatiwoos Mishiraachcha 5

¹Yesuusim lobakat minaadaba moo'u ammanenne duunanne firaa afuurukko. Ixxi losaanim ixxi kollonne hincito'o.

²Ixxuwwinam kanniinsi woroon yoo losano losisimma asheerukko.

³Yesuus «Hanqo'i wodaninne ixxuwwi gaga heeshaa'llam keen Waa'ik adillan ixxuwwan ihu bikkina maassaammuwwa.

⁴ Kichche'llam keen Waa'i ixxuwwina qoxximma uwwoo bikkina maassaammuwwa.

⁵ Maashaalluwwi keen uulla lago aa'llam bikkina maassaammuwwa.

⁶ Muccurooma mixxam keenii xeebe'llam keenii godditam bikkina maassaammuwwa.

⁷Mannina haafitam keen Waa'im ixxuwwina haafoo bikkina maassaammuwwa.

⁸ Wodano muccur keen Waa'a moo'llam bikkina maassaammuwwa.

⁹Manna iittansitam keen Waa'i ooso yamantam bikkina maassaammuwwa.

¹⁰ Muccuroo'm bikkina hawwo aa'llam keen Waa'ik adillan ixxuwwan ihu bikkina maassaammuwwa.

¹¹ I mashka'inne manni ki'nnuwwa game'lloohaare, hawwisoohaaree qophphanonnem jora wocukkuuyyi ki'nnuwwika summa bi'isoohaaree maassaammuwwa.

¹² Waa'i adillanonne siixxitakkam irifo'i lobakat ihu bikkina liirammehe; lobakat liiranchinnem heellammehe. Mashka'oomim ki'nnuwwiinsi gaassakka'a hiraagaanom hawwisakko'ookko» yukko.

¹³ Odim Yesuus «Manni hundinam ki'nnuwwi sooqixxisa. Ihukkaarem sooqixxek xee'n bi'uta'n hinkid issakka'a xee'oo'isa issakkamo? Biiranne fissakka'a uunjakkamaare manni hancaacamookko bagaan mahinam awwaadooyyo.

¹⁴ Ki'nnuwwim uullina caakkuwwa. Duu'n hanenne yoo beero'i maaxameena xanooyyo.

¹⁵ Caakka caakkisaa sanfi woronne dissookkok ayyim bee'e. Ihukkaarem minenne yoo manni hundinam caakkisoo'isina qoffit beyyonne dissakkamo.

¹⁶ Ee'isam manni ki'nnuwwika er baxo moo'aa iimanenne yoo ki'nnuwwina Anna galaxxoo'isina ki'nnuwwik caakki manni illagenne caakkona» yukko.

¹⁷Odim Yesuus «Seeraa hiraagaa'n losishshaa gindeena waarummoka labissakkotte; an guulleena waarummo bagaan gindeena waarummoyyo.

¹⁸ Hanqinam an ki'nnuwwina kuroommo; iimanii uullii higeebe'i afeebe'e Seer hundim wo'mmookko bagaan Seeriinsi winxo'im te'im tako'im bi'ooyyo.

¹⁹Ee bikkina ka ijaacceka hundiinsi hoffe'ookkoka matichchom gindookkokii mulli keeninam losisookkokii Waa'i adillanonne hoffan ihookko. Ihukkaarem ijaajo hundam wonshookkokii mulli keeninam losisookkokii Waa'i adillanonne loban ihookko.

²⁰Ki'nnuwwik er bax Seera losisaa'nnaanniinsii Farisaawe'uwwaanniinsii lophphubeelas Waa'i adillano hore'em aaggakkamoyyo» yukko.

²¹ Odim Yesuus «Gaassi doollenne hee'u mannina ‹Shititte, shookkok ayyim oogatamookko› yukkisa macceessakko'ookko.

²²Ihukkaarem an ki'nnuwwina kuroommo; ixxi abbaayyonne kora'am[1] quuqoohaannonne ayyennem oogatamookko. Ixxi abbaayyo game'llookkok ayyim lommanni dummichchanne oogatamookko. Odim ixxi abbaayyo ‹Ka awwaad bee'i gawwa!› yaa game'llookkok ayyim gaanna'm giirinne oogatamookko.

²³Ee bikkina at Waa'ina kitima hincaa'lloo ammane kiyyabbaayyo hawwodditti luwwi yoo'isa tiittilas

²⁴Waa'ina kitim issitaa uwwiteena eebbittoka ee beyyonnem uttaa gaassitaa ee kiyyabbaayyinne iittame. Ee lasage waattaa Waa'ina kitima hincaa'e.

²⁵Keese kasasu ki masokkichchinne maqire oogaxxi mine mattittuuyyi googonne hee'llittuuyyim ixxenne iittame. Ee'isamdu issitbeelas ki masokkichchi keese daannuwwina higisaa uwwookko; daannuwwim fooliisina higisaa uwwoohaare karaxxi minenne aaggootto.

²⁶Hanqinam an kiina kuroommo; guzumo'ika lasaanchi saantiba guullitaa miqqeebe'e ee karaxxi miniinsi fittooyyo» yukko.

²⁷ Odim Yesuus « ‹Saa'llitte› yamamukkisa macceessakko'ookko.

²⁸Ihukkaarem an ki'nnuwwina kuroommo; mat meentichcho moo'aa mixookkok hundim ee ammane ixxi wodanonne isenne saa'aakko.

²⁹ Ee bikkina kiikki makki illi baaxiilina mashka'i ihulas fissitaa uunje. Mashka'oomim ki orachchi hundim xoo'oobee'i giiranne darabamoohaanniinsi ki orachchika matooma hooggittaare e'llookko.

³⁰ Kiikki makki angi baaxiilina mashka'i ihulas muttaa uunje. Mashka'oomim ki orachchi hundim xoo'oobee'i giiranne aagoohaanniinsi ki orachchika matooma hooggita'n kiina e'llookko» yukko.

³¹ Odim Yesuus « ‹Ixxi meentichcho hollookkok ayyim furma uwwona› yamamaakko.

³² Ihukkaarem an ki'nnuwwina kuroommo; saa'immi mashka'innette ihoo'n ixxi mi'n ama hollookkok ayyim ise saa'aanchotte issookko. Hollanto'i meentichcho eebookkokim saa'aancho» yukko.

³³ Odim Yesuus «Gaassi doollenne hee'u mannina ‹ «Waa'ina uwwoommo» yitaa hide'llitti sagara wonshe bagaan woccitti sagara gindititte› yamamukkisa macceessakko'ookko.

³⁴ Ihukkaarem an ki'nnuwwina kuroommo; hore'em hide'llakkotte. Iimanennem hide'llakkotte; mashka'oomim iiman Waa'ina adilla'n barcuma.

³⁵ Uullannem ihukkaare hide'llakkotte; mashka'oomim Waa'ik lokki hancaacoohane. Yerusaaleemannem ihukkaare hide'llakkotte; mashka'oomim Yerusaaleem lob adi'l beero'o.

³⁶Ki gagannem hide'llitte; mashka'oomim ki horoo'l saraaxxeka matom qadaallisseena te'im heemachchisseena xantooyyo.

³⁷Ee bikkina hanqi ihulas ‹hanqa› yi'llehe. Qophphan ihulas ‹qophphano› yi'llehe. Eehanniinsi lophphookkok joriinsette» yukko.

³⁸ Odim Yesuus «Illi bikkina ille; inqi bikkinam inqe» yamamukkisa macceessakko'ookko.

³⁹Ihukkaarem an ki'nnuwwina kuroommo; ki'nnuwwina jora issoo manchina jora issitakkotte. Ihukkaarem makki kolli xabano aphphisoohaannina odim qeddi kolli xabanom uwwe.

⁴⁰Mat manchi ki shamiisa masseena hasaa kasasulas ki kootam eddaa uwwe.

⁴¹Mat manchi « ‹Iinninne maqire hofqax googo mallona›[2] yaa ijaajuta'n ixxi yukkaanniinsi lam suume eddaa mare.

⁴²Mat manchi kiinniinsi mat luwwa uunxulas uwwe. Liqaayyo aa'eena hasoohaanninam hoottitte» yukko.

⁴³Odim Yesuus « ‹Ki beshichcho iitte; ki masokkichchom sabe› yamamukkisa macceessakko'ookko.

⁴⁴Ihukkaarem an ki'nnuwwina kuroommo; ki'nnuwwi maso'o iittehe. Ki'nnuwwa hawwisoo keeninam Waa'a uunxehe.

⁴⁵Ee'isa issitakko'aare iimanenne yoo ki'nnuwwi Annina oos ikkakko'isa moo'issakkamo. Mashka'oomim ixxi jora issoo keeninaa eroka issoo keeninaa ixxeka eelliincho fissookko. Ee'isam xummaaninaa baaxiilaaninaa xeena ga'nnisookko.

⁴⁶Ki'nnuwwa iittoo keeno iittitakko'aare Waa'iinsi maha siiddakkamo? Ee'isa'i qaraxaanim issitamuullayyonnihe?

⁴⁷Ki'nnuwwika abbaayyuwwi xale'e xummaatissakko'aare mulli keeniinsi mahinne e'llitakkamo? Ee'isa'i Waa'a laqqambee'i minaadabim issitamuullayyonnihe?

⁴⁸ Ee bikkina iimanenne yoo ki'nnuwwik anni muccur ihukkisam ki'nnuwwim mucculluwwi ikkehe» yukko.