Read Hadiyya Maatiwoos Mishiraachcha 6 Bible Online

Maatiwoos Mishiraachcha 6 - Hadiyya bible

Maatiwoos Mishiraachcha 6

¹ Odim Yesuus «Manni moo'ona yitakka'a er baxo manni illagenne issimmiinsi ege'llehe. Ege'llitakkobeelas iimanenne yoo ki'nnuwwina anni beyyiinsi matem irifo'om siiddakkamoyyo.

²Ee bikkina at buxina tasbo'o uwwitoo ammane birantam keen manniinsi galata siidimminaa yita'a wixxixxi minneewwannee googguwwannee issitamisa mannina moo'anteena issititte. Hanqinam an ki'nnuwwina kuroommo; birantam keen ixxuwwika irifo'o a'llito'ookko.

³Ihukkaarem at buxina uwwitoo luwwa maaxaqqanne uwwimmi hasisoo bikkina buxina uwwitoo ammane makki anginne uwwittoka qeddi angi la'oobee'isa maaxxaa uwwe. Mashka'oomim daphphanne moo'oo kiyyanni ki er baxina irifo'o uwwookko» yukko.

⁵ Odim Yesuus «Waa'a uunxitakkam ammane birantam kee'nnisa ikkakkotte. Mashka'oomim manni moo'ona yita'a wixxixxi minneewwannee gooqqi inqennee uullita'a Waa'a uunximma iittitamo. Hanqinam an ki'nnuwwina kuroommo; ixxuwwika irifo'o gaassita'ahim a'llito'ookko.

⁶Ihukkaarem at Waa'a uunxitoo ammane ki mine aaggaa u'llumma xuffaa daphphanne yoo kiyyanna uunxe. Daphphanne baxamukkoka moo'oo kiyyannim kiina irifo'o uwwookko» yukko.

⁷Odim Yesuus «Waa'a uunxitakkam ammane mulli minaadab awwaad bee'i sagara dabaransita'a wocimminne ixxuwwi uunxat macceesamoo labissamisa uunxato qeeraa'llissakkotte.

⁸Ihukkaarem ki'nnuwwi ixxuwwisa ikkakkotte; mashka'oomim ki'nnuwwik anni ki'nnuwwina mah hasisooda'e xa'mmitakkoo'nnim gaassaahim la'ookko.

⁹Ee bikkina ki'nnuwwi ‹Iimanenne hee'lloo Niyyanna, ki summi keesamaakkoohan ihona.

¹⁰Ki adillan waarona; ki doo'l iimanenne ihukkisam uullannem ihona.

¹¹Niina kaballina hasisoo hurbaata uwwe.

¹²Neese hawwodu kee'n jolle haafinummisam ni jollem haafihe.

¹³Neese joriinsi gatise bagaan keenanchanne aagissitte. Adillan, malaayyii lombii doolli hundinam kiina ihona! Aameen[3]› yitakka'a uunxehe.

¹⁴ «Mannika jolle haafitakkolas ki'nnuwwi jollem iimanenne yoo ki'nnuwwik anni haafookko.

¹⁵Mannika jolle haafitakkobeelas ki'nnuwwi annim ki'nnuwwi jolle haafooyyo» yukko.

¹⁶Odim Yesuus «Soommantakkam ammane birantam keen issitamisa xiddaano labbakkotte. Soommanaan ikko'isa manni la'ona xiddaano labbamo. Hanqinam an ki'nnuwwina kuroommo; ixxuwwi irifo'o a'llito'ookko.

¹⁷Ihukkaarem at soommantoo ammane ille aanshaqqe; horoorennem lii'llisoo luwwa laphphe.

¹⁸At soommantittisa maaxaqqanne moo'oo Waa'iinsi bagaan mulli manni ayyim moo'oone. Maaxaqqanne moo'oo Waa'im kiina irifo'o uwwookko» yukko.

¹⁹ Odim Yesuus «Ki'nnuwwi gagina ka uullanne amaxxa wixxaa'llakkotte. Mashka'oomim ka uullanne bil itaatii ci'llaatii bi'ookko; gamaanim game'ookko.

²⁰Ihukkaarem bil itaa te'im ci'llaa bi'oobee'i beyyonnee gamaanim game'eena xanoobee'i beyyonnee iimanenne ki'nnuwwi gagina amaxxa wixxaa'llehe.

²¹Mashka'oomim ki amaxxi yoo beyyonne ki wodanim eekke'enne ihookko» yukko.

²²Odim Yesuus «Illi orachchina caakka; ee bikkina ki illi fayya'i ihulas ki orachchi hundim caakkaakkoohan ihookko.

²³Ihukkaarem ki illi fayya'i ihubeelas ki orachchi hundim tuunsaakkoohan ihookko. Keesenne yoo caakki tuunsaakkoohan ihulas tuunsoom hinkaa'nna lophphaakkoohan ihookko» yukko.

²⁴Odim Yesuus «Mat manchi lam moollanno'ina ijaajameena xanooyyo. Mato sabaa mato iittookko; mato lonsaa mato gadookko. Ee'isam ki'nnuwwim Waa'inaa amaxxinaa laminam ijaajantakkeena xantakkamoyyo.

²⁵Ee bikkina ki'nnuwwi ‹Maha intoommo? Maha angoommo? Maha edde'nnoommo?› yitakku'uuyyi ki'nnuwwi heechchina hasisoo luwwi bikkina kichche'llakkotte. Hurbaatiinsi foor eddechchiinsim orachchi lophphooyyonnihe?

²⁶Huno'o, bararoo cii'a moo'llehe! Hurbaata wixxamoyyo; muttamoyyo; gootarannem wixxaa'llamoyyo. Ihukkaarem iimanenne yoo Waa'i ittam luwwa uwwookko. Cii'iinsi ki'nnuwwi lobakata e'llitakkamoyyonnihe?

²⁷Ki'nnuwwiinsi u'nnanchinne ixxi heechchi doollenne mat balla exxeena xanookkok ayyette?

²⁸Odim eddechchi bikkina mahina kichche'llakkamuulla? Haqqo'l fiit hinkid li'ooda'e moo'llehe! Badarooyyo; te'im ixxi gagina eddechcha dadooyyo.

²⁹ Ihukkaarem an ki'nnuwwina kuroommo; adil Salamoonim ixxi lombinne hundinnem ee fiitiinsi matisam mishisoo eddechcha edde'ukkoyyo.

³⁰Kaballa moo'amaa soodina giiranne darabamoo hixe Waa'i ka'isa wereeggisaa eddeesoohan ihukkaa'lleensi ki'nnuwwina hinkid lonsaa eddeesooyyo? Ki'nnuwwik amma'nnat hinkaa'nna gootto'o?

³¹Ee bikkina ki'nnuwwi ‹Maha intoommo? Maha angoommo? Maha edde'nnoommo?› yitakku'uuyyi u'nnantakkotte.

³²Mulli minaadab ee keen hundinam u'nnantamo. Ki'nnuwwina oo hundim hasisoohan ihukkisa iimanenne yoo ki'nnuwwi anni Waa'i la'ookko.

³³Ihukkaarem gaassitakka'a Waa'ika adillanoo muccuroomaa hassehe; mulli luwwi hundim ki'nnuwwina uwwamookko.

³⁴Soodina sooxxi kichchechchim ihoo bikkina soodina sawwitakku'uuyyi u'nnantakkotte. Ballina ballina ee balli u'nnim ihookko» yukko.