Read Hadiyya Maatiwoos Mishiraachcha 7 Bible Online

Maatiwoos Mishiraachcha 7 - Hadiyya bible

Maatiwoos Mishiraachcha 7

¹Odim Yesuus «Ki'nnuwwannem oogatamoobee'isa ayyennem oogattakkotte.

² Mashka'oomim ki'nnuwwi mulli keenonne oogattakko'isam ki'nnuwwannem oogatamookko. Mulli keenina keentakkam keennaanchonne ki'nnuwwinam keenamookko.

³Ki illenne yoo gudeera laqqoo'nnim mahina kiyyabbaayyi illenne yoo haccichcho moo'lloolla?

⁴Ki illenne gudeer hee'ukkuuyyim kiyyabbaayyina ‹Huno'o, ki illiinsi haccichcho fissoommo› yiteena hinkid xantootto?

⁵Ate, ka birammaancho! Gaassitaa ki illenne yoo gudeera fisse. Ee lasage kiyyabbaayyi illenne yoo haccichcho fissiteena danaamisa moo'llootto.

⁶Keesammi luwwa wishina uwwitakkotte; ki'nnuwwika worqam boonke'i illagenne darabbakkotte. Darabbakkolas boonke'i ki'nnuwwika worqa lokkinne hance'ookko; wishim ki'nnuwwa daba'llaa ga'mmookko» yukko.

⁷Odim Yesuus «Xa'mmehe, ki'nnuwwina uwwamookko. Hassehe, siiddakkamo. Goocanne uullitakka'a weeshshehe, ki'nnuwwinam fooqookko.

⁸Mashka'oomim xa'mmukkaannina ayyenam uwwamookko; hasookkokim siixxookko; u'llummanne uullaa weeshoohaanninam fooqookko.

⁹Ki'nnuwwiinsi mat manchi ixxek beet qorosho'o xa'mmuta'n kina uwwoohonnihe?

¹⁰Te'im maara xa'mmuta'n hamashsha uwwoohonnihe?

¹¹Eehaara'i ki'nnuwwi jor keen ikkakko'isam ki'nnuwwi oosina er luchcho uwwimma laqqakkolas iimanenne yoo Waa'i ixxo uunxoo keenina hinkid lonsaa er luwwa uwwooyyo?

¹² Manni ki'nnuwwina issona hassakkam luwwi hundam ki'nnuwwim mulli keenina issehe. Seerii hiraagaa'n losishshii kurookkok eehane» yukko.

¹³Odim Yesuus «Xuqqi goocinne aaggehe. Mashka'oomim bichchina massoo gooc haraara; googoomim hawwisoobee'ane. Ee googinne aagoo keenim duta.

¹⁴Ihukkaarem heechchi kollonne massoo gooc xuqqa; taakke'imminam googoom hawwisoohane. Ee bikkina ee googo siixxoo keenim hofqaxa» yukko.

¹⁵Odim Yesuus «Qophpha'n hiraagaaniinsi ege'llehe. Haninne gereebba labba'a ki'nnuwwi beyyo waattamo. Ihukkaarem ixxuwwik wor sibaaru oro'isa.

¹⁶Ixxuwwam laqqakkamok baxxam baxinnette; uttiinsi woyi'n misha feerakkeena xanakkamonnihe? Te'im qaccabbiinsi oda'i misha feerakkamonnihe?

¹⁷Er haqqi hundim er misham mishookko; ihukkaarem jor haqqi jor misham mishookko.

¹⁸Er haqqi jor misha misheena xanooyyo; jor haqqim er misha misheena xanooyyo.

¹⁹ Er misha mishoobee'i haqqi hundim muramaa giiranne edamookko.

²⁰ Ee bikkina qophpha'n hiraagaano baxxam baxinne laqqakkamo.

²¹‹Moollanna! Moollanna!› yaa weeshoo hundim Waa'i adillanonne aagooyyo. Ihukkaarem Waa'i adillanonne aagookkok iima'n iyyanni yu luwwa wonshoo keen xale'e.

²²Oogaxxi balla lobakat keen ‹Moollanna, Moollanna, ki summinne hiraangummoyyonnihe? Ki summindu habusa fissinummoyyonnihe? Ki summinne lobakata maalalsiisoo luwwa banxummoyyonnihe?› yitamo.

²³ Anim ixxuwwina ‹Ki'nnuwwa hore'em la'oommoyyo. Ki'nnuwwi boqqi keeno; iinniinsi qee'llehe!› yoommo» yukko.

²⁴Odim Yesuus «Ayyi manchim an yummi luwwa macceesaa baxonne hosisookkok ixxi mine kinanne baxu qoor mancho labookko.

²⁵Xeen ga'nnaa, diris dirisaahii hafachchi hafachchaahii ee mine malaayyaamisa gafe'ukko. Ihukkaarem ki'n hanenne baxamu bikkina oo min ubukkoyyo.

²⁶Ayyi manchim an yummi luwwa macceesaa baxonne hosisoobee'ek ixxi mine shashsharanne baxu qawwi mancho labookko.

²⁷Xeen ga'nnaa, diris dirisaahii hafachchi hafachchaahii ee mine malaayyaamisa gafe'ukko; oo minim ee ammanem ubukko. Ee mi'nnek ubimmim jorisa» yukko.

²⁸ Yesuus ka woshsha wocaa guullukkisam ixxi losisu losishshanne lobakat minaadab maalalto'o.

²⁹Mashka'oomim ixxi losisukkok lobakat lachchinnetti hee'ukko bagaan Seera losissam hee'llo'i kee'nnisayyi hee'ukko.