Read Hadiyya Maatiwoos Mishiraachcha 8 Bible Online

Maatiwoos Mishiraachcha 8 - Hadiyya bible

Maatiwoos Mishiraachcha 8

¹Yesuus duuniinsi dillu ammanenne lobakat minaadab ixxo awwonto'o.

²Oddomachchonne baddisoo jabbi firaakkoo mat manchim Yesuus beyyo waaraa ixxi illagenne uullanne aad heeshaa «Moollanna! Iittittaa'lleensi eese fayyiissaa muccussiteena xantootto» yukko.

³Yesuusim ixxi anga biddiqaa'aa ee mancho nakkaa «Iittoommo; fayye'llaa muccure!» yukko. Ixxim oddomachchonne firu baddisoo jabbiinsi ee ammanem fayye'aa muccurukko.

⁴ Ee lasage Yesuus ixxena «At macceese, kaka ayyenam kuttoobee'isa. Ihukkaarem mattaa ki gaga qeessichchina moo'ise. Odim at fayye'llaa muccuttittisa manni la'oo'isina Muse'e ijaaju kitima hincaa'e» yukko.

⁵Yesuus Qifirinnaahooma yakkam beero'o aagu ammanenne Oroo'm uulliinsette hee'u xibbi halaqichchi Yesuus beyyo hincaa

⁶«Moollanna, i awwaadaanchi shiihaa lobakat hawwi woronne ihaa minenne iinse'aakko» yaa fayyiisoo'isina uunxukko.

⁷Yesuusim «An waaraa fayyiisoommo» yukko.

⁸Ihukkaarem xibbi halaqichchi «Moollanna, at i mine waatteena an laboombee'i mancho. Ihukkaarem ki suuminne mat luwwa woce; i awwaadaanchim fayye'ookko.

⁹An i gagim mulli keenina ijaajamoomman ihummuuyyi odim iinniinsi woroon an ijaajoommi gaadaan yo'o. Ixxuwwiinsim mato ‹Mare› yoommaare marookko. Odim mullaanninam ‹Waare› yoommaare waarookko. I awwaadaanchom ‹Kaka isse› yoommaare issookko» yukko.

¹⁰Yesuusim eekka macceesu ammanenne maalalaa ixxo awwonu minaadabina «Hanqinam an ki'nnuwwina kuroommo; kido'i qoxxaalli amma'nnat yoo mancho Isra'ee'l minaadabannem siidummoyyo.

¹¹ An ki'nnuwwina kuroommo; lobakat keen eelliinchi firiinsii eelliinchi aaggiinsii waattamo. Ixxuwwim Abrihaaminne, Yisaaqinnee Yaaqoobinnee maqirem Waa'i adilla'n maaddanne afuuttamo.

¹² Ihukkaarem Waa'i adillanonne aagimmi hasisoo keen biiranne yoo tuunsonne uunjantamo. Eekke'em wi'llitamoo inqe iiccamoo» yukko.

¹³Ee xibbi halaqichchinam «At mine elle'e; ki amma'nnaxxisa ihona» yukko. Oo awwaadaanchim ee ammanem fayye'ukko.

¹⁴Yesuusim Pheexiroos mine maraa Pheexiroosik ballo xissita'a iinse'llo'ookkoka moo'ukko.

¹⁵Ixxim iseka anga nakkukkaare ee ammanem fayye'llo'o. Isem iimita'a ixxo koyyinano aa'llo'o.

¹⁶Habus amadaakkoo lobakat manna uulli hiimukkisam Yesuus beyyo eebakko'o. Ixxim xale'i sagarinne habusa fissukko; jabbu manni hundam fayyiisukko.

¹⁷ Eekkam issukkok hiraagaanchi Issaayyaas «Ni hoonga ixxi massukko; ni jabbom ixxi fayyiisukko» yukkok wo'mmoo'isinatte.

¹⁸Lobakat minaadab ixxi kululleetanne wixxito'isa moo'aa Yesuus dambalaq eeqidonne higgamisina ixxi losaano ijaajukko.

¹⁹Seera losisaa'nnek mat manchi Yesuus beyyo waaraa «Losisaancho! At mattoo beyyi hundam keese awwonaa maroommo» yukko.

²⁰Yesuusim ixxena dabaraa «Wengereellina bar yookko; iimaninne bararoo cii'inam do'n yookko. Ihukkaarem Manchi Beetina aagaa usheexxoo beyyim bee'e» yukko.

²¹Odim ixxi awwonaa'nnek mat «Moollanna! Gaassaa maraa iyyanna waammoommo» yukko.

²²Ihukkaarem Yesuus ixxena «Lehu keeno lehu keenim waammona; at uttaa eese awwone» yukko.

²³Ee lasage Yesuus ixxi losaaninne maqirem wongiranne aagaa marukko.

²⁴Dangonnem malaayyaam hambu'llam dambalaqanne ki'ukkaare wongir xuuxameena ihukko. Ee ammane Yesuus diriiraa hee'ukko.

²⁵Losaanim Yesuus beyyo matta'a diriiriinsi baqaa'lla'a «Moollanna! Neese beeddinummo; gatise!» yito'o.

²⁶Yesuusim «Mahina badditakkamuulla? Ki'nnuwwik amma'nnat hanqataakkoo keeno» yukko. Ee lasage Yesuus ki'aa hambu'llamii womoorii uulloo'isina ijaajukko; ee ammanem hundem luwwim cawwukko.

²⁷Losaanim lobakata maalalta'a «Hambu'llamii dambalaqii ijaajamookkok kuk hinkido'i mancho?» yito'o.

²⁸Yesuusim Galii'l Dambalaq eeqidonne yoo Geeraaseena[4] yakkam uulla waaru ammanenne habus amadaakkoo lam manchi waammi woriinsi waatta'a ixxenne edanto'o. Ixxuwwim lobakata malaayyaammuwwi ikko'i bikkina ayyi manchim ee googinne higeena xanam hee'ukkoyyo.

²⁹Ixxuwwim ee ammanem «Waa'i Beeto, ni woshshanne keese mah aagisaate? Amman afoo'nnim neese barche'e issiteena waattittonnihe?» yitu'uuyyi laatto'o.

³⁰Ixxuwwiinsi hofqaxam qee'l beyyonne lobakat boonke'i allaachchi hee'ukko.

³¹Habusim Yesuusina «Atimdu neese ka manniinsi fissitoohan ihulas ee boonke'i allaachchi beyyo malloommisa isse» yita'a uunxito'o.

³²Yesuusim «Mallehe» yukko; ee bikkina ixxuwwim fitta'a boonke'i allaachchanne aaggo'o. Boonke'i allaachchi hundim didiyaa maraa baalli woronne yoo dambalaqanne ubaa itamukko.

³³Boonke'i allaaraanim gibba'a beero'o matta'a habus amadaa hee'u manni woshshaa ee ammane ihu woshshaa hundam kutto'o.

³⁴Ee lasage ee beero'onne hee'llam manni hundim Yesuusa moo'lleena waatto'o. Ixxom moo'llo'i ammanenne ixxuwwi uulliinsi maroo'isina uunxito'o.