Read Hadiyya Maatiwoos Mishiraachcha 9 Bible Online

Maatiwoos Mishiraachcha 9 - Hadiyya bible

Maatiwoos Mishiraachcha 9

¹Yesuusim wongiranne aagaa dambalaqa firaa ixxi hee'am hee'u beero'o marukko.

²Eekke'em mat shiihaakkoo mancho hallaqqanne iyyaa manni ixxi beyyo waarukko. Yesuusim ixxuwwika amma'nnato moo'aa ee shiihu manchina «I beeto, baddititte; ki baaxiil haafamaakko» yukko.

³Eehid yu ammanenne Seera losisaa'nnek mat mat «Ku manchi Waa'inne game'llamoolla» yita'a ixxuwwi wodanonne quunquunto'o.

⁴Yesuusim ixxuwwika sawwite la'aa «Mahina ki'nnuwwi wodanonne ka jor luwwa sawwitakkamuulla?

⁵‹Ki baaxiil haafamaakko› yimmiinsii ‹Iimitaa mare› yimmiinsii hinki sholle'ookko?

⁶Ihukkaarem uullanne baaxiilo haafeena Manchi Beetina malaayyi yoohan ihukkisa laqqehe» yaa ee shiihaa hee'u manchina «Iimitaa ki hallaqqa iyyitaa mine elle'e» yukko.

⁷Oo shiihu manchim iimaa mine elle'ukko.

⁸Ixxenne hee'llo'i mannim eekka moo'llo'i ammanenne baddito'o. Kido'i malaayye mannina uwwu Waa'am galaxxito'o.

⁹Yesuus ee beyyo uraa marukkuuyyi Maatiwoosa yakkam qaraxaanchi qaraxo aa'oo beyyonne afuuraakkoo moo'aa «Eese awwone» yukko. Maatiwoosim ki'aa Yesuusa awwonukko.

¹⁰ Yesuusim Maatiwoos minenne hurbaata iteena afuuraakkoohaannonne lobakat qaraxaanii baaxiilaanii ixxi beyyo waatta'a ixxennee ixxi losaaninnee maqirem maaddanne afuutto'o.

¹¹Farisaawe'uwwi eekka moo'lla'a Yesuus losaanina «Ki'nnuwwik losisaanchi qaraxaaninnee baaxiilaaninnee maqire itookkok mahinatte?» yito'o.

¹²Ihukkaarem Yesuus ixxuwwi wocco'i woshsha macceesaa «Qaraa'l manchi hasisookkok jabbaaninatte bagaan fayya'i manninayyo.

¹³ Keesammi Kitaabanne ‹An hasoommok qishixximma bagaan kitimayyo› yamamaa kitaabamukkok mayyimda'e ihukkisa mattakka'a lossehe. An waarummok baaxiilaano weesheenatte bagaan muccur keeno weesheenayyo» yaa dabarukko.

¹⁴Ee lasage Yohaannis losaan Yesuus beyyo waatta'a «Neesee Farisaawe'uwwii soommannoommo. Ihukkaarem ki losaan soommantam bee'ek mahinatte?» yita'a xa'mmito'o.

¹⁵Yesuusim ixxuwwina «Idaayyichchi ixxuwwinne maqire hee'ukkuuyyi bollochcho'i manni kichche'immi hasisoohonnihe? Ihukkaarem idaayyichcho ixxuwwiinsi annanni issakka'a massakkam ayyaam waarookko; ee ammane soommantamo.

¹⁶Beeddu eddechchanne haareechchi qaafunta edaa gobookkok ayyim bee'e. Mashka'oomim oo haareechchi qaafunti beeddu eddechcha baasisaa dereerookko.

¹⁷Te'im ebeer cananne[5] haareechchi woyi'n diqaasa issookkok bee'e. Issookkokimdu hee'ulas can dereeramaa awwaad bee'an ihookko; diqaasim dunamookko. Ihukkaarem haareechchi woyi'n diqaasa haareechchi cananne issakkolas canim dereeramooyyo; diqaasim dunamooyyo» yukko.

¹⁸Yesuus eekka Yohaannis losaanina woconam wixxixxi mi'n awwonsaanchi waaraa Yesuus illagenne guruphphaa «I landichcho kaba leto'ookko. Ihukkaarem at waattaa ki anga is hanenne issittaare isek foor daba'llookko» yukko.

¹⁹Yesuusim ki'aa ixxi losaaninne maqirem ee mancho awwonaa marukko.

²⁰Ee ammane tommoo lam hiinchoo xiig dunamukkuuyyi hawwita'a hee'llo'oo mat meentichcho lasinne waatta'a Yesuus eddechchika kasa nakkito'o.

²¹Mashka'oomim is wodanonne «Ixxeka eddechcham nakkumta'n fayye'oommo» yita'a sawwita'a hee'llo'o.

²²Yesuusim is kollonne daba'llaa ise moo'u ammanenne «I landichche, baddititte! Ki amma'nnat keese fayyiisaakko» yukko. Ee ammanem oo meentichcho fayye'llo'o.

²³Ee lasage odim Yesuus ee wixxixxi mi'n awwonsaanchi mine marukko. Eekke'em wi'llishoo keenoo diddoo keenoo lobakat manna wi'llukkuuyyi moo'ukko.

²⁴Yesuusim ixxuwwina «Hundim fillehe! Landichcho diriitto'ookko bagaan leto'oyyo» yukko. Ixxuwwim ixxonne osatto'o.

²⁵Ihukkaarem Yesuus oo manni firukkisam landichcho iinse'llo'i beyyo maraa landichchoka anga amadukkaare ki'llo'o.

²⁶Oo woshshim ee uulli hundannem macceesamukko.

²⁷Yesuus ee beyyiinsi uraa marukkuuyyim lam qooqquwwi ixxo awwonta'a «Daawiit Beeto, niina qishixxe!» yitu'uuyyi laattam hee'llo'o.

²⁸Yesuusim mine aagu ammanenne lamem qooqquwwim ixxi kollonne hincito'aare «An ki'nnuwwa fayyiiseena xanoommisa amma'nnitakkamonnihe?» yukko. Ixxuwwim «Eeyya, Moollanna!» yita'a dabatto'o.

²⁹Ee lasage Yesuus ixxuwwika ille nakkaa «Ki'nnuwwi amma'nnaxxisa ihona» yukko.

³⁰Ixxuwwi illim fooqukko. Yesuusim «Ayyi manchinam kaka kuttakkambee'isa» yaa qoxxisaa ijaajukko.

³¹Ihukkaarem ixxuwwi matta'a Yesuus baxu baxo uulli hundinam afisso'o.

³²Habus amadaakkoo duud mancho oo manni matto'isam Yesuus beyyo eebakko'o.

³³Habus ee manchiinsi firukkisam oo duud manchi wocimma asheerukko. Eekke'e wixxita'a hee'llo'i manni eekka moo'llo'i ammanenne «Kido'i luwwi Isra'eelanne hore'em moo'amaa la'ooyyo» yita'a maalalto'o.

³⁴ Ihukkaarem Farisaawe'uwwi «Habusa fissookkok habus adil Sheexaanchi uwwu malaayyinnette» yito'o.

³⁵ Wixxixxi minneewwanne Yesuus losisukkuuyyi, Waa'i adilla'n mishiraachcha kurukkuuyyii lobakat minaadaba jabbi hundiinsii hoongi hundiinsii fayyiisukkuuyyii beero'uwwaa gattuwwaa hundam do'am hee'ukko.

³⁶ Ixxim minaadab kichche'lla'atii hara'mmaancho hoogga'atii allaaraanchi bee'i gereebbisa ikka'a moo'u ammanenne ixxuwwi bikkina lobakata qishixxukko.

³⁷ Ee bikkina ixxi losaanina «Murakkam hurbaat lobakata. Ihukkaarem muroo keen hoffane.

³⁸Ee bikkina hurbaata muraxxi beyyo baxaano asse'oo'isina hurbaaxxi annichcho uunxehe» yukko.