Read Hadiyya Maarqoos Mishiraachcha 1 Bible Online

Maarqoos Mishiraachcha 1 - Hadiyya bible

Maarqoos Mishiraachcha 1

¹4 Kuk Waa'i Beet Yesuus Kiristoos mishiraachchi asheera.

² Hiraagaanchi Issaayyaas «Oono'o, kiina googo gudisoo i asse'amaancho an gaassaa asse'oommo. Oohim ‹Moollannina googo gudissehe; googguwwam shiraashillehe› yukkuuyyi udma'anne laaroo sagara» yaa kitaabukkisannette.

⁴Ee bikkina Xammaqaanchi Yohaannis udma'anne «Baaxiil haafamoo'isina baaxiilo biiraa yitakka'a xammaqammehe» yaa alallaatukkuuyyi waarukko.

⁵Ee bikkina Yihuxxi uullikii Yerusaalee'm beero'ikii dut manni ixxi beyyo maraa baaxiilo biiraa yukkuuyyi Yoordaanoos daajjenne Yohaannis anganne xammaqamukko.

⁶ Yohaannis edde'am hee'u eddechchi gaameela'i oddiinsi baxamaakkoohan hee'ukko. Ixxi lamadom omachchiinsi baxamu saqqinne lade'am hee'ukko. Itam hee'u hurbaatim qawwaawwaa udma'i uulli maraboo hee'ukko.

⁷Ixxi alallaatim «An ixxeka caamma'i fatiram heeshaa tireena laboombee'ek iinniinsi hore'em lophphookkok i lasonne waaroolla.

⁸An ki'nnuwwa wo'inne xammaqoommuulla; ihukkaarem ixxi Keesammi Ayyaaninne xammaqookko» yoohan hee'ukko.

⁹Ee ammane Galii'l uullanne yoo Naazireetiinsi Yesuus waarukkaare Yoordaanoos daajjenne Yohaannis ixxo xammaqukko.

¹⁰Yesuusim wo'i woriinsi firukkisam iiman fooqaa Keesammi Ayyaan handarekkichchi kobi'llanne ihaa ixxi hanenne afuurukkuuyyi Yoohannis moo'ukko.

¹¹ Ee ammanem «An iittoommi i Beet atette; anim keesenne liiramoommo» yoo sagar iimaniinsi waarukko.

¹²Ee ammanem Keesammi Ayyaan Yesuusa udma'i uulli kolli awwonsukko.

¹³Ee udma'annem Sheexaanchi ixxo sor ballina keenukko. Ixxennem bii'l moochchi hee'ukko; Waa'i asse'amaanim ixxena awwaaddo'o.

¹⁴Yohaannis karamaa lasage Yesuus Waa'ika mishiraachchi sagara alallaatukkuuyyi Galiila waarukko.

¹⁵ Ixxim «Amman afaakko; Waa'i adillanim waaraakko; baaxiilo biiraa yi'llehe; mishiraachchi sagarannem amma'nnehe!» yam hee'ukko.

¹⁶Yesuus Galii'l Dambalaq gadaninne higukkuuyyi Simi'oonii ixxi abbaayyi Indiraasii qurxumme'e qaashsham hee'llo'i bikkina dambalaqanne shikka ubbussu'uuyyi moo'ukko.

¹⁷Ixxuwwinam «Eese awwonnehe! Manna qaashaan ikkakkamisa issoommo» yukko.

¹⁸Ixxuwwim ee ammanem shikka utta'a ixxo awwonto'o.

¹⁹Ixxim ee beyyiinsi hofqaxam maraa Zabdiwoos ooso Yaaqoobaa Yohaannisaa moo'ukko. Ixxuwwim wongiranne afuutta'a shikka axissam hee'llo'o.

²⁰Ee ammanem ixxuwwa weeshukko. Ixxuwwim ixxuwwika anna Zabdiwoosa ixxi baxaaninne maqirem wongiranne utta'a Yesuusa awwonto'o.

²¹Yesuusii ixxenne maqire hee'llo'i keenii Qifirinnaahooma matto'o. Yesuusim Usheexxaxxi Ayyaam aagukkisam Ayihuxxi manni wixxixxi mine aagaa losisimma asheerukko.

²² Ixxi losisam hee'ukkok seera losisaa'nnis ihoo'n gassaa'nnis ihu bikkina macceesso'i keen ee losanonne maalalto'o.

²³Habus amadaakkoo mat manchi ee ammane ee wixxixxi minenne hee'ukko.

²⁴Ixxim «Naazireexxi Yesuusa! Niina kiinninne mah hee'aate? Neese bi'isseenattennihe? At ayyetda'e ikkittisa an la'oommo; at Waa'i keesamma» yaa laarukko.

²⁵Yesuusim habusina «Sa'itaa ka manchiinsi fire!» yaa ijaajukko.

²⁶Habusim mancho fitifitaa'aa lasage laaraa firukko.

²⁷Ee beyyonne hee'llo'i manni hundim maalalta'a «Kuka'i aganna; kuk haareechchi losishshayyonnihe? Malaayyinne habusa ijaajoolla; ixxuwwim ixxena ijaajantamuulla» yita'a ixxuwwina'i ixxuwwim wocco'o.

²⁸Ee ammanem Yesuusik sad Galii'l kululleetanne yoo uulli hundannem macceesamukko.

²⁹Ayihuxxi manni wixxixxi miniinsi firukkisam Yaaqoobinnee Yohaannisinnee maqirem Simi'oonii Indiraasii hee'llam mine aaggo'o.

³⁰Eekke'em Simi'oonik ballo xissita'a iinse'lla'a hee'llo'o. Ixxuwwim is bikkina Yesuusina kutto'o.

³¹Ee bikkina iinse'llo'i beyyo maraa is anga amadaa ki'isukko; xissim ise fatakukko. Ki'lla'atim ixxuwwina koyyinano issito'o.

³²Eelliinchi aagukkisam hiimonne Yesuus beyyo jabbaanoo habus amadaakkoo keenoo eebakko'o.

³³Ee beero'i manni hundim u'llummanne wixxaa hee'ukko.

³⁴Ixxim annanni annanni xissinne jabbu dut manna fayyiisukko; dut habusam fissukko. Ixxi ayyetda'e ihukkisa habus la'aa hee'u bikkina ixxi bikkina woccambee'isa Yesuus hoorukko.

³⁵Uulli soodeena ihaakkoohaannonne Yesuus ki'aa Waa'a uunxeena manni bee'i beyyo marukko.

³⁶Simi'oonii ixxenne hee'llo'i keenii ixxo hasimma asheetto'o.

³⁷Ixxuwwim ixxo siiddo'i ammanenne «Manni hundim keese hasoolla» yito'o.

³⁸Yesuusim ixxuwwina «Massehe; ka kululleetanne yoo gattuwwa mallona. Eehe'enne alallaatoommo; an waarummokim eehanninatte» yukko.

³⁹ Ee bikkina Ayihuxxi manni wixxixxi minneewwanne Waa'i sagara alallaatukkuuyyii habusa fissukkuuyyii Galii'l uulli hundannem do'am hee'ukko.

⁴⁰Oddomachchonne baddisoo jabbi[1] firaakkoo mat manchi ee ammane Yesuus beyyo waaraa ixxi illagenne guruphphaa «At iittittaare eese fayyiisseena xantootto» yaa uunxukko.

⁴¹Yesuusim qishixxaa ixxi anga biddiqaa'aa ee mancho nakkaa «Iittoommo; muccure» yukko.

⁴²Ixxim ee ammanchom oddomachchonne yoo baddisoo jabbiinsi fayye'aa muccurukko.

⁴³ Ee lasage Yesuus ixxena

⁴⁴«Macceese; at kaka ayyenam kuttoobee'isa. Ihukkaarem mattaa ki orachcho qeessichchina moo'ise. Odim at muccuttittisa hundim la'ona Muse'e ijaaju kitimam kitime» yaa qoxxisaa ijaajaa geegeesukko.

⁴⁵Ihukkaarem manchoom maraa ee woshsha beyyi hundam afisukko. Ee bikkina Yesuus hinki beero'om la'amaakkoo'isinne aageena xanukkoyyo. Ihona bagaan beero'iinsi tochchonne manni bee'i daphphit beyyuwwanne hee'am hee'ukko. Ihukkaarem manni beyyi hundiinsim ixxi beyyo waaram hee'ukko.