Read Hadiyya Maarqoos Mishiraachcha 10 Bible Online

Maarqoos Mishiraachcha 10 - Hadiyya bible

Maarqoos Mishiraachcha 10

¹Ee lasage Yesuus ee beyyiinsi ki'aa Yoordaanoos daajje higaa Yihuxxi uulla marukko. Dut mannim odim ixxi beyyo waarukko; ixxi losa'nnisam losisukko.

²Farisaawe'uwwiinsi hofqaxim ixxo keenteena hasso'i bikkina ixxi beyyo waatta'a «Mat manchi ixxi mi'n ama hollona seer uwwoohonnihe?» yita'a xa'mmito'o.

³Yesuusim ixxuwwina «Muse'e mayyaa ijaajaate?» yaa dabarukko.

⁴ Ixxuwwim «Muse'e ‹Mat manchi furma uwwaa ixxi mi'n ama hollona› yaakko» yita'a dabatto'o.

⁵Yesuusim ixxuwwina «Muse'e ka seera ki'nnuwwina kitaabukkok ki'nnuwwik wodan duud ihu bikkinatte.

⁶ Ihukkaarem manna Waa'i qooccu ammane goonchoo meentichchoo issaa qooccaakko.

⁷ Ee bikkina manchi annaa amaa uraa ixxi arenne mat ihookko.

⁸Lamim mat xiigaa mat maaraa ikkamo. Ee lasage lamim mat orachchi ikkamo bagaan lamoyyo.

⁹Ee bikkina Waa'i mat issukkoka manni annanni issoone» yukko.

¹⁰Mine aagga'a lasage ixxi losaan ee woshsha dabatta'a xa'mmito'o.

¹¹ Ixxim ixxuwwina «Ixxi are hollaa mulli meentichcho eebookkok ayyim saa'aanchi ihookko.

¹²Ee'isam is aro'iinsi fitta'a mulli goonchonne affam meentichchom saa'aanchotte ikkamo» yukko.

¹³Mat mat manni Yesuus ixxi anginne nakkaa maasse'ona ciilluwwa ixxi beyyo eebbo'o. Ihukkaarem ixxi losaan eebu keeno quuqqo'o.

¹⁴Ee ammane Yesuus ixxi losaan issito'oka moo'aa quuqukko. Ixxim ixxuwwina «Ciilluwwi i beyyo waatteena hoottakkotte. Waa'i adillan kido'i kee'nnane.

¹⁵ Hanqinam an ki'nnuwwina kuroommo; ayyim ciilluwwisa ihaa Waa'i adillano aa'oobee'ek Waa'i adillanonne hore'em aagooyyo» yukko.

¹⁶Ee lasage ciilluwwa qaaphphaa annannichchonnem ixxi anga issaa maasse'ukko.

¹⁷Yesuus ee beyyiinsi ki'aa odim googo mareena gudukkisam mat manchi geeraa Yesuus illagenne guruphphaa «Er losisaancho! Heer hee'l heechcha siixxeena maha issimmi hasisookko?» yaa xa'mmukko.

¹⁸Yesuusim ixxena «Mahina eese ‹er losisaancho› yitoolla? Matem Waa'iinsi bagaan erok mahim bee'e.

¹⁹ Waa'i ijaajo laqqootto; oohim ‹Shititte, saa'llitte, game'llitte, qophphano naqqassitte, manna qawwiissittee annaa amaa lonsee› yoo keeno» yukko.

²⁰Oo manchim «Losisaancho! Ee hundam oosoommaniinsim ki'isaa egeraammo» yukko.

²¹Yesuusim ee mancho moo'aa iittukko. Ixxenam «Eehaare kiina mat luwwi gataakko. Iimanenne godda siixxiteena mattaa kiina yoo luwwa hundam biteessaa diinatooma buxina uwwitaa waattaa eese awwone» yukko.

²²Ihukkaarem oo manchi lobakata goddaanchi hee'u bikkina eekka macceesu ammanenne ixxi illi heemachchukko. Lobakatam kichche'aa ixxi mine elle'ukko.

²³Ee ammane Yesuus ixxi losaa'n kollonne moo'aa «Goddaan Waa'i adillanonne aagimmi hinkaa'nna kee'mmaalla?» yukko.

²⁴Losaanim ixxi wocanne maalalto'o. Ihukkaarem Yesuus la'mmaaggem ixxuwwina «I ooso, Waa'i adillanonne aagimmi hinkaa'nna kee'mmaalla?

²⁵Goddaanchi Waa'i adillanonne aagimmiinsi gaameelakkichchi marfi afo'inne firimmi sholle'ookko» yukko.

²⁶Ixxuwwim lobakata maalalta'a ixxuwwina'i ixxuwwim «Eehaara'i ayyi gateena xanookko?» yito'o.

²⁷Yesuusim ixxuwwa moo'ukkuuyyi «Kuk xanamookkok Waa'inatte bagaan mannina xanamoobee'ane. Waa'i hundem luchchom isseena xanookko» yukko.

²⁸Pheexiroosim Yesuusina «Oono'o! Neese hundi luwwam ullaa keese awwonnaammo» yukko.

²⁹Yesuusim «Hanqinam an ki'nnuwwina kuroommo; i bikkinaa mishiraachchi saga'l bikkinaa ixxeka mine, abbaayyuwwa, aayyuwwa, ama, anna, oosoo uullaa urookkok ayyim

³⁰ka doollenne hawwinne maqirem minneewwa, abbaayyuwwa, aayyuwwa, amo'o, oosoo uullaa xibbi qinxite siixxookko. Waaroo doollennem heer heerina ihoo heechcha siixxookko.

³¹ Illag hee'llo'i kee'nnek lobakat keen lasaanchi ikkamo. Lasaanchi hee'llo'i keenim illag ikkamo» yukko.

³²Ee ammane Yesuusii ixxi losaanii Yerusaaleema mattu'uuyyi Yesuus ixxi losaa'n illagenne higaa taakke'ukko. Ixxi losaanim maalalto'o. Ixxi losaa'n lasonne ikka'a Yesuusa awwontam hee'llo'i mannim baddito'o. Yesuusim tommoo lamem losaano ixxi gadanonne hincaa'aa

³³«Oono'o! Kaba Yerusaaleema malloommuulla. Eekke'em Manchi Beeto qeessa awwonsaaninaa Seera losisaaninaa higisakka'a uwwakkamo. Ixxuwwim ixxonne leh oogato'o oogattamo. Mulli minaadaphphi angannem higissa'a uwwitamo.

³⁴Oo keenim ixxo game'llitamo; anjam ixxonne tuhitamo; ixxom gantamo; shitamome. Ihukkaarem sas balliinsi lasage lehiinsi ki'ookko» yaa ixxonne afoo luwwi bikkina kurukko.

³⁵Zabdiwoos oos Yaaqoobii Yohaannisii Yesuus beyyo waatta'a «Losisaancho! At niina issitona hansoommi luwwi yookko» yito'o.

³⁶Yesuusim «An ki'nnuwwina maha issona hassakkamo?» yukko.

³⁷Ixxuwwim «At adilla'n lombi barcumanne afuuttoo ammane matii ki makkanne matii ki qeddanne kiinninne maqirem afuulloommisa isse» yito'o.

³⁸ Ihukkaarem Yesuus ixxuwwina «Uunxitakkam luwwa laqqakkamoyyo. An agoommi humbullo ki'nnuwwi aggakkeena xantakkamonnihe? Te'im xammaqamoommi xammaqancha xammaqantakkeena xantakkamonnihe?» yukko.

³⁹Ixxuwwim «Eeyya, xannoommo» yito'o. Yesuusim ixxuwwina «Hanqame; an agoommi humbullo aggakkamo. An xammaqamoommi xammaqancha xammaqantakkamo.

⁴⁰Ihukkaarem i makkannee qeddannee afuurimmi uwwamookkok Waa'i gudisu keeninatte bagaan aneyyo» yukko.

⁴¹Tommem losaanim eekka macceesso'i ammanenne Yaaqoobannee Yohaannisannee quuqqo'o.

⁴² Yesuusim hundam ixxi beyyo weeshaa «Ka uulli minaadaphphi gassaan minaadabanne moollanno'o yamanta'a weeshantamisa laqqakkamo. Minaadaphphi awwonsaanim minaadaba hasso'isa issitamo.

⁴³ Ihukkaarem ki'nnuwwi lambe'enne eehid ihimmi hasisooyyo. Ki'nnuwwi lambe'iinsi lophpheena hasookkok ayyim ki'nnuwwina awwaadaanchi ihona.

⁴⁴Ee'isam ki'nnuwwi lambe'iinsi awwonsaanchi iheena hasookkok ayyim hundinam awwaadaanchi ihona.

⁴⁵Mashka'oomim Manchi Beet ixxi gagim waarukkok manni ixxena awwaadonatte ihoo'n mannina awwaadeenattee ixxi foore mannina tissi issaa higisaa uwweenattee» yukko.

⁴⁶Yesuusii ixxi losaanii Iyyaarko'i beero'o matto'o. Ixxuwwim dut manninne maqirem Iyyaarko'iinsi fitto'i ammanenne Xeemoosa yakkam manchik illi qooq beet gooqqi inqenne afuuraa uunxam hee'ukko. Ixxekim summi Barxeemoosa yakkaman hee'ukko.

⁴⁷Ixxim ee beyyinne Naazireexxi Yesuus higukkuuyyi macceesaa «Daawiit Beet Yesuusa, at iina qishixxe!» yukkuuyyi laarukko.

⁴⁸Ee ammanenne dut manni «Sa'ihe!» yita'a wocanto'o. Ihukkaarem ixxi «Daawiit Beet Yesuusa, at iina qishixxe!» yukkuuyyi lonsaa laarukko.

⁴⁹Yesuusim uullaa «Weeshshehe!» yukko. Ixxuwwim ille qooqina «Kaa ki'ee liirame; Yesuus keese weeshoolla» yito'o.

⁵⁰Illi qooqim hanenne edde'u weyyakka uunjaa xophaa ki'aa Yesuus beyyo marukko.

⁵¹Yesuusim «An kiina maha issona hassootto?» yukkaare «Losisaancho! I ille fooqaa'llaa moo'oommisa isse» yukko.

⁵²Yesuusim ixxena «Mare; ki amma'nnat keese fayyiisaakko» yukko. Ee ammanem ixxek illi fooqukko. Yesuusam awwonaa marukko.