Read Hadiyya Maarqoos Mishiraachcha 11 Bible Online

Maarqoos Mishiraachcha 11 - Hadiyya bible

Maarqoos Mishiraachcha 11

¹Yesuusii ixxi losaanii Yerusaaleemanne hincita'a Wee'l Duu'n gadanonne yoo Beetafaagaa Biitaanaa affo'o. Ee lasage Yesuus ixxi losaa'nneka lamo

²«Ki'nnuwwi higgakka'a illagenne yoo gatte mallehe. Eekke'e affakko'isam ayyim saa'llubee'i hallichchi wotar karamaakkoo siiddakkamo. Ee wotaram tittakka'a amaddakka'a waallehe.

³Ayyim ‹Mahina tittakkamuulla?› yulas ‹Moollannina hasisu bikkinatte; ixxim qaqqisom dabaraa asse'ookko› yi'llehe» yaa asse'ukko.

⁴Ixxuwwim matta'a mi'n nafaranne gooqqi inqenne karamaakkoo wotara moo'lla'a titto'o.

⁵Ee ammane ee beyyonne uullito'i kee'nnek mat mat «Ka wotara mahina tittakkamuulla?» yito'o.

⁶Ixxuwwim Yesuus yukkoka ee mannina kutto'o. Oo mannim massitona cawwito'o.

⁷Losaanim Yesuus beyyo wotara eebba'a ixxuwwi eddechcha wota'l afarenne issito'aare Yesuus ee wotaranne saa'llukko.

⁸Dut mannim ixxuwwi gaqqi eddechcha googonne dakko'o. Mulli keenim haqqi buyya iiqqu'uuyyi googonne dakkam hee'llo'o.

⁹ Ixxi illaginnee lasinnee yo'i keenim «Hosaana![8] Moollanni summinne waarookkok maasse'amaakkoohane!

¹⁰Moollanni summinne waaroo niyyanni Daawiit adillan maasse'amaakkoohane. Hosaana, iimaniinsi iimanenne!» yitu'uuyyi shuuttam hee'llo'o.

¹¹Yesuusim Yerusaaleema afaa Keesammi Mine aagukko; kululleetanne yoo luwwi hundam moo'aa lasage uulli hiimaa hee'u bikkina tomminnee lamem losaaninnee maqirem Biitaana marukko.

¹²La'm balla Biitaaniinsi daba'llitu'uuyyim Yesuus sibaarukko.

¹³Ixxim buyyi lataakkoo oda'a qee'llonne moo'aa «Ayyi la'ukko mish hee'ooda'e» yaa ee haqqichchi beyyo marukko. Ihukkaarem hincu ammanenne ammanoom oda'i mishoobee'i amman ihu bikkina xale'i buyyiinsi bagaan misha maham siidukkoyyo.

¹⁴Ee bikkina ee haqqichchina «Kanniinsi eehid heer heerinam kiinniinsi ayyim misha itoone!» yukko. Ixxi losaanim eekka ixxi wocukkuuyyi macceesso'o.

¹⁵Ixxuwwim Yerusaaleema affo'i ammanenne Yesuus Keesammi Mine aagaa Keesammi Minenne biteessam keenoo bitaa'llam keenoo fissaa hollukko. Diinate dabassitam hee'llo'i kee'n xaraphpheeza, handare'e biteessam hee'llo'i kee'n barcumam qubbaa'ukko.

¹⁶Odim Keesammi mi'n qash worinne ayyi manchim ayyi luwwam iyyaa daba'llamoobee'isa hoorukko.

¹⁷ Ixxuwwinam « ‹I min minaadab hundinam uunxaxxi mine yamamookko› yoo sagar kitaabamukkoyyonnihe? Ihukkaarem ki'nnuwwi gamaa'n ma'n issitakko'o» yaa losisukko.

¹⁸Qeessa awwonsaanii Seera losisaanii eekka macceesso'i bikkina ixxo shitam googo hasso'o. Ihukkaarem dut manni ixxi losishshanne maalalam hee'u bikkina baddito'o.

¹⁹Yesuus ixxi losaaninnem uulli hiimukkisam beero'iinsi firukko.

²⁰La'm balla daram googinne higgu'uuyyi oo odakkichchi xaph afeebe'e gogaakkoo moo'llo'o.

²¹Pheexiroosim Yesuus wocu woshsha tiiraa «Losisaancho! Moo'e; at duuntitti ku odakkichchi gogaakko!» yukko.

²²Yesuusim ixxuwwina dabaraa «Waa'anne amma'nnehe!

²³ Hanqinam an ki'nnuwwina kuroommo; ayyi manchim ixxi wodanonne maloo'n yukkok ihoo'isa amma'nnimminne ka duunam ‹Ka beyyiinsi ki'llaa dambalaqanne darabame› yuta'nnim darabamookko.

²⁴Ee bikkina an ki'nnuwwina kuroommo; mat luwwina Waa'a uunxitakkam ammane ee luwwa aa'llakko'aannisa issitakka'a amma'nnitakkolas Waa'i eekka ki'nnuwwina uwwookko.

²⁵ Odim Waa'a uunxitakkeena Waa'i illage hincitakkam ammane mannanne amaddakko'i jolle ‹Haafaammo› yi'llehe. Ee'isamdu issitakkolas iimanenne yoo ki'nnuwwi annim ki'nnuwwi baaxiilom haafookko.

²⁶Ihukkaarem ki'nnuwwimdu haafitakkobeelas iimanenne yoo ki'nnuwwi annim haafooyyo[9].

²⁷Yesuusii ixxi losaanii odim Yerusaaleema waatto'o. Keesammi Minennem Yesuus taakke'amukkuuyyi yoohaannonne qeessa awwonsaan, Seera losisaanii lommannii ixxi beyyo waatta'a

²⁸«At ka keeno issitoottok ayyi malaayyinnette? Te'im ka keeno issitona ka malaayye kiina uwwukkok ayyette?» yita'a xa'mmito'o.

²⁹Yesuusim ixxuwwina «Anim ki'nnuwwa mat xa'mmichcha xa'mmoommo. Ki'nnuwwi i xa'mmichcha dabattakkolas anim ka keeno issoommok ayyi malaayyinnetda'e ihukkisa ki'nnuwwina kuroommo.

³⁰Huno'o kullehe, Yohaannis xammaqoo'isa issukkok Waa'annii manna?» yukko.

³¹Ee ammanenne ixxuwwina'i ixxuwwim « ‹Mayyino?› yita'a ‹Waa'a› yinumlas ‹Eehannah ixxi yukkoka mahina amma'nnitakko'oyyo?› yookko.

³²Eehaare ‹ «Manna» yinonnihe?› yita'a» fitanto'o. Ihukkaarem manni hundim Yohaannisa «Hanqo'i hiraagaancho» yitam bikkina manna baddito'o.

³³Ee bikkina «Neese lanqoommoyyo» yita'a dabatto'o. Yesuusim ixxuwwina «Anim ka keeno mah malaayyinne issoommuulda'e ki'nnuwwina kuroommoyyo» yaa dabarukko.