Read Hadiyya Maarqoos Mishiraachcha 12 Bible Online

Maarqoos Mishiraachcha 12 - Hadiyya bible

Maarqoos Mishiraachcha 12

¹ Odim Yesuus qeessa awwonsaanina, Seera losisaaninaa lommanninaa kobi'llishshinne kurukkuuyyi «Mat ammane mat manchi woyi'n kaashsha kaasukko. Ee woyi'n kaashshi kululleetam ootaa woyina ciinsakkam bare hinukko. Woyi'n kaashsha egerimminam godo'o baxukko. Ee lasage ee woyi'n kaashshi beyyo abuullaanina uwwaa mulli uulla marukko.

²Oo woyi'n kaashshi annichchi woyi'n misha feerakkam amman afukkaare woyi'n mishika eebona abuullaa'n beyyo awwaadaaniinsi mato asse'ukko.

³Ihukkaarem abuullaan ee awwaadaancho amadda'a ganta'a kora'i angam daba'lloo'isa issito'o.

⁴Woyi'n kaashshi annichchim la'mmekam mulli awwaadaancho asse'ukko. Abuullaan ixxom kininne qokkito'o; sholliisso'ome.

⁵Odim mulli awwaadaanchom asse'ukko; eeham shito'o. Ee'isam mulli keenom asse'ukkaare mat mat keeno ganto'o; mat mat keenom shito'o.

⁶Kaba gatukkok iittoo ixxi beeto asse'imma. Ixxim ‹I beeta'i hayditamo› yaa lasaanchonne asse'ukko.

⁷Ihukkaarem oo abuullaan ixxuwwina'i ixxuwwim ‹Lagaanchi kane; waallehe, lag niihan ihoo'isina ixxom shinona!› yaqqanto'o.

⁸Beetom amadda'a shita'a leeshooma woyi'n kaashshi beyyiinsi biiranne fissita'a uunjito'o.

⁹Eehaara'i woyi'n kaashshi annichchi maha issookko? Ixxi gagim waaraa ee abuullaano shookko. Woyi'n kaashshoomam mulli keenina uwwookko.

¹⁰ Hanqinam Keesammi Kitaabanne ‹Kininne mine baxxam keen «Awwaadooyyo» yita'a uunjito'i kinchi lophphaa awwaadoo lamejji kinchi ihukko.

¹¹Oohim Waa'i baxo; ni illinnem moo'nnaa maalallummo› yamamu sagara qananaa'llakko'oyyonnihe?» yukko.

¹²Ka kobi'llishsha wocukkok ixxuwwinatte ihukkisa laqqo'i bikkina ixxo amaddeena hasso'o. Ihukkaarem minaadaba baddito'i bikkina utta'a matto'o.

¹³Ee lasage Farisaawe'uwwiinsii Heeroodis manniinsii matqaxa woshshinne Yesuusa digaaddona asse'llo'o.

¹⁴Asse'anto'i keenim ixxi beyyo matta'a «Losisaancho! At hanqo'ane, mannika miine moo'lloobee'ane, Waa'i googo hanqo'isa losissoohanee manninam golo'lloobee'anee ikkittisa lanqoommo. Oroo'm adilina gibiro miqimmi hasisoohonnii hasisooyyo?» yito'o.

¹⁵Ihukkaarem ixxuwwi labisaan ikko'isa la'aa «Mahina eese keentakkamuulla? Huno'o, moo'oommo mat diinaara eebbehe» yukko.

¹⁶Ixxuwwim mat diinaara eebbo'o. Yesuusim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o.

¹⁷Yesuusim ixxuwwina «Eehaara'i Qeesaaran ihu luwwa Qeesaarinam uwwehe. Waa'an ihu luwwa Waa'inam uwwehe» yukko. Ixxuwwim ixxonne lobakata maalalto'o.

¹⁸ Odim «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a

¹⁹ «Losisaancho! Muse'e niina ‹Mat manchi meentichcho eebaa ooso qaroo'n lehulas ixxi abbaayyi ee meentichcho laggassaa ee lehukkaannina shumo'i ihoo ooso qarimmi hasisookko› yaa kitaabaakko.

²⁰Mat ammane lamar abbaayyuwwi hee'llo'o. Ee abbaayyuwwiinsi won meentichcho eebaa ooso qaroo'nnim lehukko.

²¹Ee lasage wona awwonaanchi ee meentichcho laggassukko. Ixxim ooso qaroo'nnim lehukko. Odim saxxekim laggassukko. Ixxim ooso qaroo'nnim lehukko.

²²Ee'isinne lamarim ee meentichcho eebbo'ookko; ihukkaarem ixxuwwi ooso qattoo'nnim leto'o. Lasaanchonne oo meentichchom leto'o.

²³Eehaare isa'i lamarim eebbo'ookko leto'i keen lehiinsi ki'llam ayyaamo hinkannina arette ikkamo?» yito'o.

²⁴Yesuusim ixxuwwina «Ki'nnuwwi huushantakkamok Keesammi Kitaab yookkokaa Waa'i malaayyee laqqakkambee'i bikkinatte.

²⁵Leto'i keen lehiinsi ki'llam ammane Waa'i asse'amaa'nnisa ikkamo bagaan eebbamoyyoo ladiissamoyyoo.

²⁶ Ihukkaarem giir aphpham hee'u shif aganna kuroo Muse'i kitaabanne leto'i keen lehiinsi ki'llamisa kitaabamukkoka qananaa'llakko'oyyonnihe? Waa'i Muse'ena ‹An Abrihaam Waa'a; Yisaaq Waa'a; Yaaqoob Waa'a› yaakko.

²⁷Waa'i hee'oo kee'n Waa'a bagaan lehu kee'n Waa'ayyo. Ee bikkina ki'nnuwwi lobakata huushantakko'ookko» yukko.

²⁸ Seera losisaa'nnek mat ee beyyo waaraa Saduuqaawe'uwwi fitantam woshsha macceesam hee'ukko. Ixxim Yesuus ixxuwwina danaamisa dabarukkisa macceesaa «Hundiinsim lophphoo ijaaj hinkane?» yaa Yesuusa xa'mmukko.

²⁹ Yesuusim ixxena «Hundiinsi lophphoo ijaaj ‹Isra'eela, macceese; ni Moollanni Waa'i mexxo'i Waa'a.

³⁰Ki Moollanni Waa'a wo'm wodaninne, wo'm tiirinne, wo'm sawwitinnee wo'm malaayyinnee iitte› yoohane.

³¹ La'mmekim ‹Ki beshichcho ki gaqqisa iitte› yoohane. Ka keeniinsi lophphoo mulli ijaaj bee'e» yukko.

³² Seera losisaanchim Yesuusina «Losisaancho hanqame! ‹Waa'i mato; ixxeensi bagaan mulli Waa'i bee'e› yitaa woccittokim hanqa.

³³ Odim wo'm wodaninne, wo'm tiirinne, wo'm sawwitinnee wo'm malaayyinne Waa'a iittimmii beshichchom gaqqisa iittimmii shokkiisakka'a hincaa'akkam kitimiinsii mulli kitimiinsii hundiinsim lophphoohane» yukko.

³⁴Yesuusim oo manchi qooroominne dabarukkisa moo'aa «At Waa'i adillaniinsi qee'llitaattoohaneyyo» yukko. Ee lasage ayyim Yesuusa maham xa'mmeena iggukkoyyo.

³⁵Keesammi Minenne Yesuus losisukkuuyyi «Seera losisaan ‹Kiristoos Daawiit beeto› yitamok mahinatte?

³⁶ Daawiit ixxi gagim Keesammi Ayyaaninne ‹Waa'i i Moollannina Ki diina'a ki lokkiinsi woroon isseembe'e i makkanne afuure› yaakko.

³⁷Eehaara'i Daawiit ixxi gagim Waa'i doo'llaakkoo Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yukko. Ee beyyonne hee'u dut manni Yesuus wocu woshsha liiranchinne macceesam hee'ukko.

³⁸Yesuusim losisukkuuyyi «Seera losisaano ege'llehe. Ixxuwwi qeeraa'l eddechcha edde'lla'a do'immaa meerannem manni ixxuwwa xummaatisonaa hassam keeno.

³⁹Odim wixxixxi minneewwannem hundiinsi e'lloo beyyonne afuuchchaa maadda itteena afuuttam ammanem lombi beyyonne afuurimmaa hassam keeno.

⁴⁰Qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggamo. Ee bikkina ixxuwwanne afoo oogato'i kee'mmaalla» yukko.

⁴¹Keesammi Minenne diinate uwwakkam mu'uxxi gadanonne Yesuus afuuraakkoohaannonne dut manni ee mu'utanne diinate issookkoka moo'ukko. Dut goddaanim lobakat diinate issito'o.

⁴²Aro'i lehaakkoo mat buxichchom waatta'a mat saantima ihoo lam meenzo'o issito'o.

⁴³Yesuusim ixxi losaano ixxi beyyo weeshaa «Hanqinam an ki'nnuwwina kuroommo; aro'i lehaakkoo tu buxichcho ka mu'utanne issito'i diinat mulli keen hundim issito'aanniinsi lobane.

⁴⁴Mashka'oomim mulli keen hundim uwwito'ok ixxuwwina ihaa gatukkaanniinsette. Ihukkaarem ise ma'lluchchimbee'i buxichchotte ikka'a isena yooqaxichchi hundichchom uwwito'ookko» yukko.