Read Hadiyya Maarqoos Mishiraachcha 13 Bible Online

Maarqoos Mishiraachcha 13 - Hadiyya bible

Maarqoos Mishiraachcha 13

¹Keesammi miniinsi Yesuus firukkisam ixxi losaa'nnek mat ixxena «Losisaancho, moo'e; ku Keesammi min baxamukkisii baxamu kinneewwii hinkaa'nna mishisoohane!» yukko.

²Yesuusim ixxena «Kininne baxamaakkoo ka geejji minneewwa moo'lloollannihe? Ku keennuwwi mat mullaanni hanenne ihaa baxamukkisam gindamoo'n hee'ooyyo» yukko.

³Keesammi mi'n illagenne yoo Wee'l duunanne Yesuus afuuraakkoohaannonne xale'i Pheexiroos, Yaaqoob, Yohaannisii Indiraasii ixxena

⁴«Hino'o niina kure; kuk ihookkok hinki ammane? Ku hundim ihoo'isa moo'isoo mare'i maruchcho?» yita'a xa'mmito'o.

⁵Yesuusim dabaraa «Ayyim ki'nnuwwa huushansoobee'isa ege'llehe.

⁶Mashka'oomim dut keen ‹An Kiristoosatte› yitu'uuyyi i summinne waattamo. Ixxuwwim dut keeno huushansitamo.

⁷Odim or waaroo ammane te'im o'l xambo macceessakkam ammane badditakkotte. Mashka'oomim oo luwwi hundim ihimmi hasisoohane. Ihukkaarem doolli beeddichchi afukkoyyome.

⁸Minaadab minaadabanne adilim adilanne ki'ookko. Annanni annanni beyyonnem uulli huxechchii qaanne'ii ihookko. Oo hundim xuuchchina luxxane.

⁹ «Ki'nnuwwi gaga ege'llehe! Oogato'ina ki'nnuwwa higisakka'a uwwakkamo. Wixxixxi minneewwannem ganakkamo. I mashka'inne gassaa'n illagennee adilluwwi illagennee oogato'ina uullitakkam ammane i bikkina kuttakkamo.

¹⁰Ihukkaarem mishiraachchi sagar heer uulli hundinnem alallaatanchi hasisookko.

¹¹Ki'nnuwwa amadakka'a oogato'ina higisakka'a uwwakkam ammane gaassitakka'a ‹Mayyinoommo› yitakka'a u'nnantakkotte. Ihukkaarem ee ammane ki'nnuwwi bikkina wocookkok Keesammi Ayyaan ihu bikkina ki'nnuwwina ixxi uwwookkoka woccehe.

¹²Abbaayyi abbaayyo annim beeto lehina higisaa uwwookko. Oosim amannee annannee ki'ookko; shookkome.

¹³ I mashka'inne manni hundim ki'nnuwwa sabookko. Ihukkaarem lasaanchi afeebe'e xa'nnookkok gatookko.

¹⁴ «Ihukkaarem hiraagaanchi Daani'eelinne kuramu haashaarammi luwwi uullimmi hasisoobee'i beyyonne uullaa moo'llakkam ammane qananaa'oo qoossona; ee ammane Yihuxxi uullanne yo'i keenim duunnuwwi kolli gibbona.

¹⁵ Mi'n iimanenne yookkokim uulla dillaa miniinsi mu'uta fisseena mine aagoone.

¹⁶Abuulli beyyonne baxookkokim eddechcha masseena daba'lloone.

¹⁷«Ee ammane lamfoor meentinaa iicisaaninaa aayye!

¹⁸Ihukkaarem ki'nnuwwik gibimmi hagayyenne ihoobee'isa Waa'a uunxehe.

¹⁹ Oohim luxxeka Waa'i luwwi hundam qooccu ammaniinsi ki'isaa kabad afeebe'em ee'isam ka lasagem ihaa la'oobee'i kee'mmaalli hawwi ihookko.

²⁰Ee ayyaammuwwa Waa'i gundisubeeta'n ayyim gatam hee'ukkoyyo. Ihukkaarem Waa'i ixxi doo'llu kee'n bikkina ee ayyaammuwwa gundisaakko.

²¹«Ee ammane ayyim ki'nnuwwina ‹Oono'o, Kiristoos keyyookko› te'im ‹Oono'o, eekke'e yookko› yuta'nnim amma'nnitakkotte.

²²Mashka'oomim ‹Kiristoos anette› yitam qophphanaanii qophpha'n hiraagaanii ki'llamo. Ixxuwwim xantota'n doo'llanto'i keenom huushisseebe'e mare'ee maalalsiisoo luwwaa issitamo.

²³Ihukkaarem an ki'nnuwwina hundi luwwam gaassaahim kurummi bikkina qoxxitakka'a ege'llehe.

²⁴ «Ee ammane ee u'nniinsi lasage eelliinchi tuunsookko. Aganim caakkisooyyo.

²⁵ Boollaankim iimaniinsi ubookko. Iima'n malaayyuwwim heekke'ookko.

²⁶ Ee ammane Manchi Beet lobakat malaayyinnee lombinnee duubinne waarukkuuyyi manni moo'ookko.

²⁷Ixxi asse'amaanom asse'ookko; soorem qariinsem uulli tochchiinsi tochchi afeebe'e ixxeka doo'llanto'oo keeno wixxaa'ookko.

²⁸«Kobi'llishsha oda'iinsi lossehe. Oda'ik caaffuwwi lataa buyya eeboohaare ee ammane billi hincukkisa laqqakkamo.

²⁹Ee'isam ee mare'uwwa moo'llakkam ammane ixxek waarimmi u'llummanne hincukkisa laqqakkamo.

³⁰Hanqinam an ki'nnuwwina kuroommo; ku luwwi hundim iheebe'e ku qaranchi higooyyo.

³¹Iimanii uullii higookko. Ihukkaarem i sagar higooyyo.

³² «Ihukkaarem ee balli bikkina te'im sa'aaxxi bikkina Anniinsi bagaan Beetom ihukko iima'n asse'amaan ayyim la'ooyyo.

³³Ammanoom hinki ammanda'e laqqakkambee'i bikkina ege'llehe; qoxxehe. Waa'am uunxehe.

³⁴ Oohim ixxi mine uraa qee'l uulla maru manchisa. Oo manchim ixxi awwaadaanina annannichchinam baxika sharada baxxansaa gooca egeraanchom qoxxaa egerona ijaajukko.

³⁵Eehaare ku mi'n annichchi hiimonne te'im baqitenne, antabaa'i muunanne te'im daranne waarooda'e laqqakkambee'i bikkina ege'llehe.

³⁶Dangonne waaraa diriittakka'a siidoobee'isa guddehe.

³⁷Ki'nnuwwina kuroommoka manni hundinam kuroommo; ege'llehe!» yukko.