Read Hadiyya Maarqoos Mishiraachcha 14 Bible Online

Maarqoos Mishiraachcha 14 - Hadiyya bible

Maarqoos Mishiraachcha 14

¹ Shaashshiqqi Ugudinaa Qorosho'i Ugudinaa lam balli gataakkoohaannonne qeessa awwonsaanii Seera losisaanii hantaarinne Yesuusa amadda'a shitam googo hassam hee'llo'o.

²Ihukkaarem «Minaadab hambalaachcha ki'isoobee'isa Ugudanne ihoone» yaqqanto'o.

³ Yesuusim Biitaananne oddomachchonne firoo baddisoo jabbi yoo Simi'oon minenne maaddanne afuuraakkoohaannonne mat meentichcho lobakata bito xee'aalli Naardoos shitto'i yoo albaasxiroos bilqaaxa amadda'a waatto'o. Isem ee bilqaaxa iiqqa'a shitto'ooma Yesuus horoorenne dunto'o.

⁴Ee ammane ee beyyonne hee'llo'i keeniinsi mat mat oo meentichcho issito'i luwwanne nadadda'a «Ku shitto'i mahina korabeyyonne bi'oohane?

⁵Sas xibbi diinaariinsi hanaan biteesamaa diinate buxina uwwimmi xansiisam hee'ukko» yaqqanto'o. Ee meentichchom gaddo'o.

⁶Ihukkaarem Yesuus ixxuwwina «Ullehe; ise mahina hawwissakkamuulla? Ise iina danaamisa issito'ookko.

⁷ Bux hundi ammanem ki'nnuwwinnette; hassakko'i ammane ixxuwwa hara'mmitakkeena xantakkamo. Ihukkaarem an hundi ammane ki'nnuwwinne hee'oommoyyo.

⁸Ise issiteena xantamqaxa issito'ookko. An waammina gudona i orachchonne gaassita'ahim shitto'o labbo'ookko.

⁹Hanqinam an ki'nnuwwina kuroommo; heer uullanne mishiraachchi sagar alallaattamoo beyyi hundannem ku ise issito'i luwwi isena tiissiishshi ihoo'isina kuramookko» yukko.

¹⁰Ee lasage tommiinsii lamem losaaniinsim mat hee'u Asqorotokkichchi Yihud Yesuusa higisaa uwweena qeessa awwonsaa'n beyyo marukko.

¹¹Ixxuwwim ee woshsha macceesso'i ammanenne liiranta'a ixxena diinate uwwiteena sagara aaggo'o. Yihudim ee ammaniinsi ki'isaa Yesuusa higisaa uwweena makki ammane hasam hee'ukko.

¹²Shaashshiqqi Uguxxi geex ambula durakkam Qorosho'i Uguxxi luxxi ayyaamonne Yesuusik losaan «Uguxxi hurbaata kiina hannonne gudinsona hassootto?» yita'a xa'mmito'o.

¹³Yesuusim ixxi losaa'nneka lamo «Beero'o mallehe. Eekke'em wo'i harachcho iyyaakkoo manchinne edantakkamo; ixxom awwonnehe.

¹⁴Ixxi aagoo mine aaggakka'a mi'n annichchina ‹Losisaanchi «I losaaninnem uguxxi hurbaata itoommi koyyi min hannonnette?» yoolla› yi'llehe.

¹⁵Ixxim hundem luwwim gudaakkoo geejji fooq mine moo'isookko. Eekke'e gudissehe» yukko.

¹⁶Lamem losaanim beero'o matta'a hundem luchchom Yesuus kurukkisam ihaa siiddo'o. Eekke'em uguxxi hurbaata gudisso'o.

¹⁷ Uulli hiimu ammanenne Yesuusim tomminnee lamem losaaninnee maqirem waarukko.

¹⁸Hurbaata ittu'uuyyim Yesuus ixxuwwina «Hanqinam an ki'nnuwwina kuroommo; iinninne maqire ittakkam ki'nnuwwiinsi mat eese higisaa uwwookko» yukko.

¹⁹Ixxuwwim ee woshshanne lobakata kichche'lla'a annannichchim «Anettennihe?» yitu'uuyyi xa'mmito'o.

²⁰Yesuusim ixxuwwina «Iinninne maqire bixxiranne anga aagissakkam tommiinsii lamiinsii mat eese higisaa uwwookko.

²¹Manchi Beeta'i ixxi bikkina Keesammi Kitaabanne kitaabamukkisam lehookko. Ihukkaarem Manchi Beeto higisaa uwwoo manchina aayye! Oo manchi qaramubeeta'n e'llam hee'ukko» yukko.

²²Ixxuwwi ittu'uuyyim Yesuus qorosho'o ki'isaa Waa'a galaxxukko. Iiqaatim «Hii'nnehe; kuk i maara» yaa ixxuwwina uwwukko.

²³Odim humbullonne yoo woyi'n diqaasam ki'isaa Waa'a galaxxukko. Diqaasam uwwukkaare hundim aggo'o.

²⁴ Yesuusim ixxuwwina «Dut keenina dunamoo haareechchi hidi'l i xiig kane.

²⁵Hanqinam an ki'nnuwwina kuroommo; Waa'i adillanonne haareechchi woyi'n diqaasa agoommi ayyaam afeebe'e ka woyi'n diqaasa od agoommoyyo» yukko.

²⁶Ee lasage mazmuura zammatta'a Wee'l duuna matto'o.

²⁷ Yesuus ixxi losaanina «Keesammi Kitaabanne ‹Allaaraancho aphphisoommo; allaachchi gereebbim binnookko› yamamaa kitaabamu bikkina ki'nnuwwi hundim eese laggakkamo.

²⁸ Ihukkaarem an lehiinsi ki'aa lasage ki'nnuwwiinsi gaassaa Galiila afoommo» yukko.

²⁹Pheexiroos ee ammane Yesuusina «Mulli keen hundim keese laggota'nnim an hore'em lagoommoyyo» yukko.

³⁰Yesuusim Pheexiroosina «Hanqinam an kiina kuroommo; kaballi hiimo antabaa'i lam kore muunoo'n gaassitaa eese sas kore laggootto» yukko.

³¹Ihukkaarem Pheexiroos «Kiinninne maqire lehoomta'nnim keese hore'em lagoommoyyo» yukko. Gatto'i losaan hundim ixxi yukkisam yito'o.

³²Ee lasage Yesuusii ixxi losaanii Geeteseemaana yakkam beyyo matto'o. Yesuusim ixxuwwina «An Waa'a uunxeembe'e keyye afuullehe» yukko.

³³Ixxim Pheexiroosa, Yaaqoobaa Yohaannisaa ixxenne maqire amadaa marukko. Eekke'em Yesuus lobakata kichche'ukko; u'nnamukkome.

³⁴Ixxuwwinam «An lehoomqaxa kichche'aammo; ki'nnuwwi keyyenne egellehe; qoxxehe» yukko.

³⁵Ixxuwwiinsim hofqaxa qee'llaa maraa uullanne illillaachcha ubaa «Iyyannaa! Iyyannaa! Kiina hundi luwwim xanamoohane. Ki doo'l ihulas ka hawwi humbullo iinniinsi higise. Ihukkaarem i doo'llis ihoo'n at doo'llittisa ihona» yaa Waa'a uunxukko.

³⁶

³⁷Ee lasage sasem losaa'n beyyo daba'llaa waaraa diriitto'ookkoka moo'aa Pheexiroosina «Simi'oona, diriittaatennihe? Hofqax ammanem baqitaa egetteena xantooyyonnihe?

³⁸Kabadem keenanchanne aaggakkambee'isa baqitakka'a Waa'a uunxehe. Tiir hundi ammanem gudaakkoohane. Ihukkaarem maar hoongaancho» yukko.

³⁹Odim maraa illagee'n sagaram wocukkuuyyi Waa'a uunxukko.

⁴⁰Ee lasage losaa'n beyyo daba'llaa waarukko. Diriir ixxuwwa amadaa hee'u bikkina diriitto'oo moo'ukko. Ixxuwwim ixxena woccam luchcho laqqo'oyyo.

⁴¹Saxxaaggem ixxuwwi beyyo waaraa «Kabad afeebe'em iinse'llakka'a usheexxitakka'atennihe? Kaba ihookko. Manchi Beet baaxiilaa'n anganne higaa uwwamoo amman afaakko.

⁴²Ki'llehe! Mallona. Eese higisaa uwwookkok kuno'o afaakko» yukko.

⁴³Yesuus wocukkuuyyim tommiinsii lamiinsii mat hee'u Yihud waarukko. Bisa'aa mugaa amaddo'oo dut mannim ixxenne maqire hee'llo'o. Ixxuwwim qeessa awwonsaaniinsi, Seera losisaaniinsii lommanniinsii asse'anto'oo keen hee'llo'o.

⁴⁴Higisaa uwwoo Yihudim ixxuwwina «Ki'nnuwwi hassakkam manchi an suunqoommane. Ixxo qoxxissakka'a amaddakka'a massehe» yaa mare'e uwwaa hee'ukko.

⁴⁵Ixxim ee ammanem Yesuus beyyo maraa «Losisaancho!» yaa suunqukko.

⁴⁶Oo waatto'i mannim Yesuusa qoxxissa'a amaddo'o.

⁴⁷Ee ammane Yesuusinne hee'llo'i kee'nnek mat seejjiinsi bisa'a fissaa hundiinsi lob qeessichchina awwaadaancho aphphisaa macce murukko.

⁴⁸Yesuusim ixxuwwina «Fanga amadakkamisa eese amaddakkeena bisa'aa mugaa amaddakka'a waattakko'onnihe?

⁴⁹ Ballina ballina Keesammi Minennee ki'nnuwwi lambe'ennee ihaa losisummuuyyi amaddakko'oyyo. Ihukkaarem kuk ihukkok Keesammi Kitaabanne kitaabamukkok wo'mmoo'isinatte» yukko.

⁵⁰Ixxi losaan hundim ixxo utta'a gibbo'o.

⁵¹Ee ammane xale'i weyyakka edde'aakkoo mat woraadichchi Yesuusa laseesaa maram hee'ukko.

⁵²Ixxom amaddeena yakito'o. Ihukkaarem weyyakka uraa umba'adam gibukko.

⁵³Ee lasage hundiinsi lob qeessichchi mine Yesuusa massito'o. Eekke'em qeessa awwonsaan, lommannii Seera losisaanii wixxita'a hee'llo'o.

⁵⁴Pheexiroosim qee'llonnette ihaa hundiinsi lob qeessichchi qash wor afeebe'e laseesukkuuyyi maraa egeraaninne maqirem afuuraa giira iibbixxam hee'ukko.

⁵⁵Ee ammane qeessi awwonsaanii daannuwwii Yesuusa shisiisseena naqaasha hassam hee'llo'o. Ihukkaarem siiddeena xanto'oyyo.

⁵⁶Dut keen Yesuusanne qophphaninne naqqassam hee'llo'o. Ihukkaarem hundik woc mat ihukkoyyo.

⁵⁷Mat mat keenim uullita'a «Ixxi ‹An manni anginne baxamu Keesammi Mine gindaa manni anginne baxamubee'i mulli mine sas ballanne baxoommo› yukkuuyyi macceensaammo» yita'a qophphaninne naqqasso'o.

⁵⁸

⁵⁹Ee'isa naqqasso'aarem kabadem ixxuwwi woc mat ihukkoyyo.

⁶⁰Hundiinsi lob qeessichchim ixxuwwi lambe'enne uullaa Yesuusa «At maham dabattooyyonnihe? Ku manni keesenne naqqassam luwwi maruchcho?» yaa xa'mmukko.

⁶¹Ihukkaarem Yesuus maham dabaroo'n cawwaa urukko. La'mmaaggem hundiinsi lob qeessichchi Yesuusina «Maasse'amaakkoo Waa'i Beet Kiristoos atettennihe?» yaa xa'mmukko.

⁶² Yesuusim ixxena «Eeyya, anette. Manchi Beet hundam xanoo Waa'aannonne makkanne afuuraakkoo moo'llakkamo. Iima'n duubinnem waarukkuuyyi moo'llakkamo» yukko.

⁶³Ee ammanenne hundiinsi lob qeessichchi nadadaa edde'u eddechcha dereeraa «Od mulli naqaash niina maha hasisookko?

⁶⁴ Waa'inne game'llamukkuuyyi macceessakko'ookko. Ki'nnuwwi sawwit maruchcho?» yukko. Hundim mat ikka'a «Ixxi lehona!» yita'a oogatto'o.

⁶⁵Mat mat keenim ixxonne anja tuhito'o. Ixxi illem katta'a «At hiraagaanchi ikkilas keese aphphisukkok ayyetda'e huno'o, la'e» yitu'uuyyi aphphissam hee'llo'o. Egeraanim oobo'inne aphphissu'uuyyi massito'o.

⁶⁶Hundiinsi lob qeessichchi qash woronne woroo'n kollinne Pheexiroos hee'ukkisam ee qeessichchi awwaadaaniinsi mate waatto'o.

⁶⁷Isem Pheexiroos giira iibbixxukkuuyyi qoxxissa'a moo'lla'a «At Naazireexxi Yesuusinne maqire hee'llittoyyonnihe?» yito'o.

⁶⁸Ihukkaarem Pheexiroos «An la'oommoyyo; at yitoo woshshim iina aagukkoyyo» yaa lagukko. Ee'isa yaa gooc kollonne marukkisam antabaa'i muunukko.

⁶⁹Odim oo awwaadaancho Pheexiroosa moo'lla'a ee beyyonne uullito'i keenina «Ku manchi ixxuwwi kollane» yita'a kutto'o.

⁷⁰Ihukkaarem Pheexiroos la'mmaaggem lagukko. Hofqax ammaniinsi lasage ee beyyonne uullito'i keen Pheexiroosa «At Galiiliinsette ikkitti bikkina hanqinam at ixxuwwi kolli mancho» yito'o.

⁷¹Ihukkaarem Pheexiroos «Ka ixxi bikkina woccakkam mancho an la'oommoyyo» yaa ixxi gaga duu'mmimmaa hide'immaa asheerukko.

⁷²Ee ammanem antabaa'i la'mmaaggem muunukko. Pheexiroosim «Antabaa'i la'mmaagge muunoo'n sas kore eese laggootto» yaa Yesuus wocukkoka sawwaa lobakata shikkaa wi'llukko.