Read Hadiyya Maarqoos Mishiraachcha 15 Bible Online

Maarqoos Mishiraachcha 15 - Hadiyya bible

Maarqoos Mishiraachcha 15

¹Soodaraar daram qeessa awwonsaan lommanninne, Seera losisaaninnee dummichchi daannuwwinnee hundinnem a'llanta'a lasage Yesuusa katta'a massita'a gassaanchi Philaaxoosina higissa'a uwwito'o.

²Philaaxoosim Yesuusa «At Ayihuxxi adilannihe?» yaa xa'mmukko. Yesuusim «At yittisame» yukko.

³Qeessa awwonsaanim dut luwwa woccu'uuyyi ixxo kasassam hee'llo'o.

⁴Odim Philaaxoos Yesuusina «Mee'i luwwanne keese kasassamulda'e macceese. At maham dabattooyyonnihe?» yaa xa'mmukko.

⁵Ihukkaarem Yesuus maham dabarukkoyyo. Ee bikkina Philaaxoos lobakata maalalukko.

⁶Shaashshiqqi Ugudanne karatiinsi tiramona minaadab xa'mmitam mat mancho tirimmi losamaakkoohan hee'ukko.

⁷Ee ammane Oroo'm adilanne bangujjita'a Oroo'm uulli mannika shita'a karanto'oo fanguwwi hee'llo'o. Ixxuwwiinsim mat Barbaana yakkam manchi hee'ukko.

⁸Mannim Philaaxoos beyyo matta'a ixxuwwina issam hee'u losano issoo'isina xa'mmito'o.

⁹Ixxim qeessa awwonsaan Yesuusa ixxena higissa'a uwwito'ok to'achchimminnette ihukkisa la'ukkuuyyim ixxuwwa «Ka Ayihuxxi adila ki'nnuwwina fatakihona hassakkamonnihe?» yaa xa'mmukko.

¹⁰

¹¹Ihukkaarem qeessa awwonsaan «Yesuusayyo; Barbaan fatakamona!» yita'a xa'mmitamisina manna soggo'o.

¹²Philaaxoos ixxuwwa «Eehaare ka Ayihuxxi adila yitakkam Yesuusa maha isso?» yaa la'mmaaggem xa'mmukko.

¹³Ixxuwwim «Saqalamona!» yitu'uuyyi shuutto'o.

¹⁴Ihukkaarem Philaaxoos «Mahinatte? Ku manchi maha bi'isaate?» yaa xa'mmukko. Ixxuwwim «Saqalamona!» yita'a odim shuutto'o.

¹⁵Philaaxoosim manna liiranseena Barbaana ixxuwwina fatakukko. Ihukkaarem Yesuusa gansiisaa saqalakkamisina higisaa uwwukko.

¹⁶Ee lasage gaadaan Yesuusa gassaanchi mine[10] aagisso'o. Odim gatto'i gaadaano hundam weeshsho'o.

¹⁷Yesuusinam adilluwwisam kashar eddechcha eddeessa'atii uttinne adilla'n mare'e baxxa'a ixxi horoorenne issita'atii

¹⁸«Ayihuxxi adila, kiina hechcho!» yitu'uuyyi game'llitam hee'llo'o.

¹⁹Odim shomboqo'inne ixxeka horoore aphphissu'uuyyii anja tuhitu'uuyyii guruphphita'a otossito'o.

²⁰Naacanta'a lasage eddeesso'i kashar eddechcha sheelatta'a ixxi gaqqi eddechcham eddeessa'a saqalteena massito'o.

²¹ Ixxuwwi mattu'uuyyim googonne Iskindirinaa Ruufoosinaa anni hee'u Qaaree'n uulli Simi'oona beero'o waarukkuuyyi edanto'o. Ixxim Yesuusika masqala iyyona giddisso'o.

²²Ee lasage Yesuusa Golgota yakkam beyyo massito'o. Golgota yimmim Horoo'l Qooma yimma.

²³Eekke'em ixxena karbe'e yakkam qaraar hamaaramaakkoo woyi'n diqaasa agona uwwito'o. Ihukkaarem ixxi agukkoyyo.

²⁴ Ee lasage Yesuusa saqalta'a ixxi eddechchi ayyayyena afooda'e moo'lleena saamo fissita'a baxxanto'o.

²⁵Ixxom saqalto'i amman da'l sas sa'aatannette hee'ukko.

²⁶Ixxo kasasso'i woshsham «Kuk Ayihuxxi adila» yita'a kitaabba'a masqalanne issito'o.

²⁷ Ixxenne maqire lam fanguwwa matoo makki kollinne matoo qeddi kollinne saqalto'o.[11]

²⁸

²⁹ Ixxi gadaninne higgam keenim ixxo gadda'a horoore heekkeessu'uuyyi «Ku Keesammi Mine ginditaa sas ballanne baxxoo at

³⁰huno'o, ka masqaliinsi dillitaa ki gaga gatixxe» yitu'uuyyi naaccam hee'llo'o.

³¹Odim qeessa awwonsaanii Seera losisaanii ixxuwwina'i ixxuwwim naaccu'uuyyi «Ixxi mulli keeno gatisookko. Ihukkaarem ixxi gaga gatiseena xanukkoyyo.

³²Isra'ee'l adil Kiristoos ixxotte ihulas huno'o, kaba masqaliinsi dillona. Neesem moo'nnaa amma'nninoommo» yito'o. Odim Yesuusinne maqire saqalanto'i keenim game'llitam hee'llo'o.

³³Balli loh sa'aatiinsi ki'isaa honsi sa'aat afeebe'e uulli hundim tuunsukko.

³⁴ Honsi sa'aatanne Yesuus «Eeloohee! Eeloohee! Lamaa sabaqtaanii?» yaa laarukko. Ee'isa yimmim «I Waa'aa! I Waa'aa! Eese mahina uttitto?» yimma.

³⁵Ee beyyonne uullita'a hee'llo'i mannik mat mat keen ee sagara macceessa'a «Macceessehe! Eeliyaasa weeshoolla» yito'o.

³⁶ Ixxuwwiinsim mat geeraa maraa shiishaakkoo woyi'n diqaasanne hallaammi'nnoo'i luwwa cefaa shomboqo'i bicconne issaa Yesuusina agona uwwaa «Huno'o, Eeliyaas waaraa ixxo dilliisoo'isa moo'nnona uttakka'a ullehe!» yukko.

³⁷Ee lasage Yesuus laaraa lehukko.

³⁸ Lehukkisam Keesammi Minenne hee'u du'm eddechchi ludiinsi lugumonne afeebe'e lam ihaa dereeramukko.

³⁹Yesuus saqalamu masqa'l illagenne uullaa hee'u xibbi halaqichchi Yesuus hinkid lehuda'e moo'aa «Hanqinam ku manchi Waa'i Beet hee'ukko» yukko.

⁴⁰ Eekke'em qee'llonne ikka'a moo'llam meenti hee'llo'o. Ixxuwwinne maqirem Magdala yakkam beero'i Maaraame, hoffi Yaaqoobinaa Yoosa'inaa ama Maaraamee Saloomee hee'llo'o.

⁴¹Yesuus Galiilanne hee'u ammane oo meenti ixxo hara'mmitu'uuyyi awwontam hee'llo'o. Yesuusinne maqire Yerusaaleema waatto'oo dut meentim hee'llo'o.

⁴²Uulli hiimeena ihaakkoohaannonne Armaate'i beero'i Yooseef waarukko. Ixxim Ayihuxxi daannuwwiinsi mat hee'ukko. Mannim ixxo lonsoohane. Ixxim Waa'ik adillan waaroo'isa egeraakkoohan hee'ukko. Oo ayyaamim Usheexxaxxi Ayyaamina gudakkaman hee'u bikkina Yesuusika leesha Philaaxoos uwwoo'isina uunxeena iggimminne Philaaxoos beyyo marukko.

⁴³

⁴⁴Ihukkaarem «Hinkid kaqaxannem lehukko?» yaa Philaaxoos maalalaa xibbi halaqichcho weeshaa «Yesuus lehaatennihe?» yaa xa'mmukko.

⁴⁵Yesuus lehukkisa xibbi halaqichchiinsi macceesaa lasage Yesuusika leesha Yooseef massoo'isa issukko.

⁴⁶Yooseefim talbiinsi baxamaakkoo danaam keefa'n eddechcha bito aa'aa Yesuusika leesha masqaliinsi dilliisaa keefanaa kina feere'akka'a axisakko'oo waammanne waammukko. Geejji kinam onkoroollisaa ee waammanne ifiisukko.

⁴⁷Ee ammane Magda'l Maaraamee Yoosa'i ama Maaraamee Yesuus hannonne waammamuda'e moo'llam hee'llo'o.