Read Hadiyya Maarqoos Mishiraachcha 16 Bible Online

Maarqoos Mishiraachcha 16 - Hadiyya bible

Maarqoos Mishiraachcha 16

¹Usheexxaxxi Ayyaam higaa lasage Magda'l Maaraame, Yaaqoob ama Maaraamee Saloomee matta'a Yesuus leeshanne labbeena shitto'o bitaa'llo'o.

²Ixxuwwim Abba'i balla[12] soodaraar daram eelliinchi firukkuuyyi waammi beyyo matto'o.

³Mattu'uuyyim ixxuwwina'i ixxuwwim «Waammi suumiinsi kina niina ayyi onkoroollisookko?» yito'o.

⁴Ee'isa yito'i mashka'i oo kin lobakata geejji hee'u bikkinatte. Ihukkaarem daaphphita'a moo'llo'i ammanenne kin onkoroollaa hee'ukko.

⁵Ixxuwwim waammi woro aaggo'i ammanenne qadaalli eddechcha edde'aakkoo mat woraadichchi ee waammi woronne makki kollinne afuuraakkoo moo'lla'a muggito'o.

⁶Ixxim ixxuwwina «Muggitakkotte! Saqalamaa hee'u Naazireexxi Yesuusa hassakkamisa la'oommo. Ixxi ka beyyonne bee'e; ixxi lehiinsi ki'aakko. Waammamu beyyim ka beyyo; moo'llehe.

⁷ Kabadem mattakka'a ixxi losaaninaa Pheexiroosinaa ‹Ixxi ki'nnuwwa gaassaa Galiila afookko; ki'nnuwwina kurukkisam eekke'enne ixxo moo'llakkamo› yi'llehe» yukko.

⁸Ixxuwwi baddita'a huxe'llam hee'llo'i bikkina waammi beyyiinsi gibba'a fitta'a matto'o. Lobakata baddita'a hee'llo'i bikkina ayyenam matem luchchom kutto'oyyo.

⁹Saantiinsi luxxi balli soodukkuuyyi Yesuus lehiinsi ki'aa lasage gaassaa lamar habusa fissaa hee'u Magda'l Maaraamena moo'amukko.

¹⁰Isem matta'a Yesuusinne maqire hee'llo'i keen kichche'llu'uuyyii wi'llitu'uuyyii hee'llonam ka woshsha kutto'o.

¹¹Ihukkaarem ise «Yesuus lehiinsi ki'aakko; anim moo'aammo» yita'a kutto'oka macceesso'i ammanenne ixxuwwi amma'nnito'oyyo.

¹²Ee lasage Yesuus ixxuwwi uulla mattu'uuyyi hee'llo'i lam losaanina annannisinne moo'amukko.

¹³Ixxuwwim daba'llita'a gatto'i losaanina kutto'o. Ihukkaarem oo keen kutto'okam amma'nnito'oyyo.

¹⁴Ee lasage odim ixxi losaa'nnek tommii matii hurbaata itteena afuutto'oohaannonne moo'amukko. Moo'amaa ixxi lehiinsi ki'aa lasage moo'llo'i keen kutto'i woshsha ixxuwwik wodan duudaa amma'nnitobee'i bikkina ixxuwwa acceeqasukko.

¹⁵ Ee lasage ixxuwwina «Uulli hundam mattakka'a mishiraachchi sagara qooccanchi hundinam alallaattehe.

¹⁶Amma'nnukkokii xammaqamukkokii hundim gatookko. Ihukkaarem amma'nnubee'aannonne oogatamookko.

¹⁷Eesenne amma'nnito'i keen hundim ka mare'uwwa issiteena xantamo. I summinne habusa fissitamo. Laqqambee'i suuminnem woccamo.

¹⁸Hamashsham amaddota'n te'im shoo qaraarem aggota'n ixxuwwa hawwodooyyo. Jabbu keenonnem ixxuwwi anga issitamaare jabbaan fayye'ookko» yukko.

¹⁹ Moollanni Yesuus ixxuwwina kaka wocaa lasage iimane maraa Waa'i makkanne afuurukko.

²⁰Ixxi losaanim matta'a beyyi hundannem mishiraachchi sagara alallaatto'o. Moollannim ixxuwwinne maqire baxam hee'ukko. Ixxuwwi losissam losishshi hanqi ihukkisam ixxuwwi kollinne issam hee'u mare'inne la'isam hee'ukko[13].