Read Hadiyya Maarqoos Mishiraachcha 2 Bible Online

Maarqoos Mishiraachcha 2 - Hadiyya bible

Maarqoos Mishiraachcha 2

¹Hofqax balliinsi lasage Yesuus Qifirinnaahooma daba'llukko. Minenne Yesuus yoo'isa manni macceesukko.

²Ee bikkina miniinsi higaa nafar xuqqeebe'e dut manni wixxukko. Waa'i sagaram ixxuwwina losisukko.

³Soor manchim mat shiihaakkoo mancho iyyita'a Yesuus beyyo eebbo'o.

⁴Ihukkaarem manni lophphu bikkina ee mancho Yesuus beyyo hincaa'immina xanto'oyyo. Ee bikkina Yesuus hee'u mi'n iimane fitta'a ixxi yoo kollinne fooqaa'lla'a hallaqqinnem aad dilliisso'o.

⁵Yesuusim ixxuwwika amma'nnato moo'aa shiihu manchina «I beeto, ki baaxiil haafamaakko» yukko.

⁶Ee ammane Seera losisaa'nnek mat mat keen eekke'e afuutta'a hee'llo'o. Ixxuwwim ixxuwwi wodanonne

⁷«Ku manchi Waa'a mahina game'lloolla? Matem Waa'iinsi bagaan baaxiilo haafeena ayyi xanookko?» yita'a sawwito'o.

⁸Ee ammanem Yesuus ixxuwwi sawwito'oka la'aa «Ki'nnuwwi kid mahina sawwitakkamuulla?

⁹Ka shiihu mancho ‹Ki baaxiil haafamaakko› yimminnii ‹Iimitaa ki hallaqqa iyyitaa mare› yimmi sholle'ookko?

¹⁰Ihukkaarem ka uullanne baaxiilo haafeena Manchi Beetina malaayyi yoohan ihukkisa laqqehe» yaa shiihu manchina

¹¹«Ki'e, ki hallaqqa iyyitaa ki mine elle'e» yukko.

¹²Ixxim ee ammanem iimaa hallaqqa amadaa ixxuwwi hundim moo'llu'uuyyi firaa marukko. Ee bikkina hundim maalalta'a «Kido'i luchcho hore'em moo'nnummoyyo» yita'a Waa'a galaxxito'o.

¹³Yesuus odim Galii'l Dambalaq gadano marukko; lobakat mannim ixxi beyyo waarukkaare losisukko.

¹⁴Ixxim ee beyyinne higukkuuyyi Ilfiyoos beet Leewi'i qaraxo miqisoo beyyonne afuuraakkoo moo'aa ixxena «Eese awwone» yukko; ixxim ki'aa awwonukko.

¹⁵Ee lasage Yesuus Leewi'i minenne hurbaata iteena afuuraakkoohaannonne ixxo awwontam hee'llo'i dut manni ixxennee ixxi losaaninnee maqirem itto'o. Ixxuwwiinsem dut keen qaraxaanoo baaxiilaanoo hee'llo'o.

¹⁶Farisaawe'uwwiinsi mat mat Seera losisaan qaraxaaninnee baaxiilaaninnee itukkuuyyi moo'lla'a ixxi losaanina «Qaraxaaninnee baaxiilaaninnee mahina itoollaa agoollaa?» yita'a xa'mmito'o.

¹⁷Yesuusim eekka macceesu ammanenne ixxuwwina «Qaraa'l manchi hasisookkok jabbaaninatte bagaan fayya'i manninayyo. An waarummok baaxiilaano weesheenatte bagaan muccur keeno weesheenayyo» yukko.

¹⁸Yohaannis losaanii Farisaawe'uwwii soommantam hee'llo'o. Ee bikkina mat mat manni Yesuus beyyo waatta'a «Yohaannis losaanii Farisaawe'uwwii soommantu'uuyyi ki losaan soommantambee'ek mahinatte?» yita'a xa'mmito'o.

¹⁹Yesuusim ixxuwwina «Idaayyichchi ixxuwwinne hee'ukkuuyyi saawwuwwi soommanimmi hasisoohonnihe? Idaayyichchi ixxuwwinne maqire hee'ukkuuyyi soommantamoyyo.

²⁰Ihukkaarem idaayyichcho ixxuwwiinsi annanni issakka'a massakkam ayyaam waarookko. Ee ayyaamo ixxuwwim soommantamo.

²¹«Beeddu eddechchanne haareechchi qaafunta edaa gobookkok ayyim bee'e. Mashka'oomim ee'isa issaa gobulas oo haareechchi qaafunti beeddu eddechcha baasisaa dereerookko.

²²Ee'isam ebeer cananne haareechchi woyi'n diqaasa issookkok ayyim bee'e. Issookkokimdu hee'ulas can xooqaa awwaad bee'an ihookko; diqaasoomim dunamookko. Ee bikkina haareechchi woyi'n diqaasina haareechchi can hasisookko» yukko.

²³ Ee lasage Yesuusii ixxi losaanii Usheexxaxxi Ayyaamonne hurbaaxxi worinne higgam hee'llo'o. Higgu'uuyyim ixxi losaan hamaama quxxo'o.

²⁴Ee beyyonne hee'llo'i Farisaawe'uwwim Yesuusina «Kaka moo'e! Ku ki losaan Usheexxaxxi Ayyaamonne issakkambee'i luwwa mahina issitamuulla?» yito'o.

²⁵ Yesuusim «Daawiit ixxo awwontam keeninne maqire sibaaraahii hawwaahii hee'u ammane maha issuda'e qananaa'llakko'oyyonnihe?

²⁶Abiyaataar hundiinsi lob qeessichchi hee'u doollenne Keesammi Mine aagaa qeessuwwiinsi bagaan mulli keen itimmi hasisoobee'i keesammi qorosho'o itukko. Ixxenne hee'llo'i manninam uwwukko» yaa dabarukko.

²⁷Odim Yesuus «Usheexxaxxi Ayyaam qooccamukkok manninatte bagaan manni Usheexxaxxi Ayyaamina qooccamukkoyyo.

²⁸Ee bikkina Manchi Beet Usheexxaxxi Ayyaaminam annichchome» yukko.