Read Hadiyya Maarqoos Mishiraachcha 3 Bible Online

Maarqoos Mishiraachcha 3 - Hadiyya bible

Maarqoos Mishiraachcha 3

¹Odim Yesuus Ayihuxxi manni wixxixxi mine aagukko. Eekke'em angi shiihaakkoo mat manchi hee'ukko.

²Yesuusa kasasseena hassam manni hee'llo'i bikkina Usheexxaxxi Ayyaamonne ixxi ee anga shiih mancho fayyiisooda'e egettam hee'llo'o. Ixxim ee angi shiihu mancho «Keyye waattaa ka manni illagenne uulle» yukko.

⁴Ee lasage Yesuus «Usheexxaxxi Ayyaamonne baximmi xanamookkok danaamonnii jora? Te'im foore gatisimmannii shimma?» yaa xa'mmukko. Ihukkaarem ixxuwwi maham dabatto'oyyo.

⁵Ixxuwwi woda'n duudoomanne kichche'aa quuqimminne ixxi kululleetanne yoo manna moo'ukko. Ee angi shiihu manchom «Ki anga biddiqaa'e» yukko. Manchim anga biddiqaa'ukko; ixxi angim fayye'ukko.

⁶Ee ammanem Farisaawe'uwwi ee beyyiinsi fitta'a Heeroodis kolliinsette ikko'i manninne maqirem Yesuusa shitam googo a'llanto'o.

⁷Yesuus ixxi losaaninne maqirem Galii'l Dambalaq gadano marukko. Lobakat mannim Galiiliinsi, Yihudiinsi, Yerusaalee'm beero'iinsi, Eedoomiyaasiinsi, Yoordaanoos daajji eeqidonne yoo uulliinsii ee'isam Xiiroosiinsii Siidoo'n beero'iinsii Yesuus baxukkoka macceessa'a ixxi beyyo matto'o.

⁹Eehe'e wixxaa hee'u manni tu'mmansoobee'isa hoffi wongiram gudissona ixxi awwonaano ijaajukko.

¹⁰Ixxim dut manna fayyiisaa hee'u bikkina jabbinne hawwitam keen hundim ixxo nakkiteena xiibantam hee'llo'o.

¹¹Habusim ixxo moo'llo'i ammanenne ixxi illagenne ubba'a «At Waa'i Beeto» yitu'uuyyi laattam hee'llo'o.

¹²Ihukkaarem Yesuus ixxi ayyetda'e ihukkisa la'issambee'isa qoxxisaa ijaajukko.

¹³Yesuusim duunanne firaa ixxi hasu keeno ixxi beyyo weeshukkaare ixxuwwim ixxi beyyo waatto'o.

¹⁴Ixxenne maqir ikkamisinaa losissonam asse'eenaa ixxuwwiinsi tommoo lam manchoo doo'llaa «Asse'amaano» yaa summa fissukko.

¹⁵Ixxuwwinam habusa fissitamisina malaayye uwwukko.

¹⁶Doo'llanto'i tommii lamem asse'amaanim ka keeno; ixxuwwim Pheexiroosa yu Simi'oonatte,

¹⁷Bo'anergaasa[2] yu Zabdiwoos lamem oosim Yaaqoobattee Yohaannisatte,

¹⁸Indiraasatte, Filiphphoosatte, Bartoloomoosatte, Maatiwoosatte, Toomaasatte, Ilfiyoos beet Yaaqoobatte, Taadiwoosatte, to'achchaanchi Simi'oonattee

¹⁹Yesuusa lehina higisaa uwwu Asqorotokkichchi Yihudattee.

²⁰Yesuus ee lasage mine marukko. Odim dut manni wixxu bikkina Yesuusii ixxi losaanii hurbaatam itteena ammane hooggo'o.

²¹«Yesuus machchaaraakko» yaa manni wocukkuuyyi macceesso'i bikkina ixxi qarmanni Yesuusa amaddeena waatto'o.

²² Yerusaaleemiinsi waatto'i Seera losisaanim «Ixxonne Bi'eelzeebul yoohane. Habusa fissookkokim habus adil Bi'eelzeebul uwwoo malaayyinnette» yito'o.

²³Yesuusim ixxuwwa ixxi beyyo weeshaa kobi'llishshinne «Sheexaan Sheexaana fisseena hinkid xanoo?

²⁴Mat adil ixxina'i ixxim baxxansamulas qoxxaa uulleena xanooyyo.

²⁵Ee'isam mat mi'n abaroosanne annannaat yoohan ihulas qoxxaa hee'ooyyo.

²⁶Ee bikkina Sheexaanim ixxina'i ixxim wocanchinne annanni ihoohan ihulas bi'ookko bagaan hee'eena xanooyyo.

²⁷Ee'isam ayyim mat malaayyaam mancho gaassaa karoo'n mine aageenaa mu'uta bogeenaa xanooyyo. Ixxi mine bogeena xanookkok ee malaayyaamo karaa lasage.

²⁸«Hanqinam an ki'nnuwwina kuroommo, manni baxoo baaxiilii game'llamoo game'llatii hundim haafamookko.

²⁹Ihukkaarem Keesammi Ayyaana game'lloohaannina ayyenam heer heerina baaxii'l badan ihookko bagaan haafamooyyo» yukko.

³⁰Yesuus kaka wocukkok «Ixxonne habus yoohane» yito'i bikkinatte.

³¹Yesuusik amaa ixxi abbaayyuwwii ixxi beyyo waatta'a u'llummanne uullita'a manna asse'lla'a weeshisso'o.

³²Ixxi kululleetanne afuutta'a hee'llo'i mannim «Kiyyummaa kiyyabbaayyuwwii u'llummanne uullita'a keese hassamuulla» yito'o.

³³Yesuusim ee mannina dabaraa «Iyyumma ayyette? Iyyabbaayyuwdu ayyayyaamo?» yukko.

³⁴Odim ixxi kululleetanne afuutta'a hee'llo'i manni kollonne moo'ukkuuyyi «Iyyummaa iyyabbaayyuwwii ka keeno.

³⁵Waa'ika doo'lla wonshookkok ayyim iyyabbaayyo, iyyaayyattee iyyummattee» yukko.