Read Hadiyya Maarqoos Mishiraachcha 4 Bible Online

Maarqoos Mishiraachcha 4 - Hadiyya bible

Maarqoos Mishiraachcha 4

¹ Ee'isam Yesuus Galii'l Dambalaq gadanonne losisimma asheerukko. Lobakat mannim ixxi beyyonne wixxu bikkina dambalaq hanenne hee'u wongiranne firaa afuurukko. Manni hundim dambalaq lallabonne hee'ukko.

²Ixxuwwinam dut luwwa kobi'llishshinne losisukko. Oo losanim

³«Macceessehe! Mat ayyaamo mat manchi sire'e wixeena firukko.

⁴Wixukkuuyyim mat mat sire'i googonne ubukko. Cii'im waaraa feeraa itukko.

⁵Odim mat mat sire'i lobakat buchchi bee'i kinaam uullanne ubukko[3]. Lobakat buchchi bee'i bikkinam qaqqisom mutukko.

⁶Ihukkaarem eelliinchi firu ammanenne xaph aad aagubee'i bikkina quubaa gogukko.

⁷Odim mat mat sire'i utti lambe'enne ubukko. Ihukkaarem utti li'aa ee muta xagaru bikkina misha uwwukkoyyo.

⁸Odim mat mat sire'i harish uullanne ubukko. Oo sire'i mutaa li'aa mat sade, mat lohayye, mat xibbe mishukko.

⁹Qoossaa macceesoo macci yookkok macceesona» yukko.

¹⁰Yesuus mullam yoohaannonne tommii lamem losaanii ixxuwwinnem maqire hee'llo'i keenii «Ku kobi'llishshi mayyimma?» yita'a xa'mmito'o.

¹¹Ixxim «Waa'i adilla'n bikkina daphphaakkoo luwwa la'immi ki'nnuwwina uwwamaakko. Ihukkaarem haxonne yo'i keenina luwwi hundim kuramookkok kobi'llishshinnette.

¹² Oohim hiraagaanchi Issaayyaas ‹Ku minaadab Waa'i kollonne daba'llitambee'isinaa ixxuwwik baaxiil haafamoobee'isinaa moo'imma moo'llamo; qoossitamoyyo; macceesimmina macceessamo; hindihitamoyyo› yukkok wo'mmoo'isinatte» yukko.

¹³Odim Yesuus ixxuwwa «Ku kobi'llishshi ki'nnuwwina aagubee'an ihulas mulli kobi'llishsha hinkid laqqakkeena xantakkamo?

¹⁴Abuullaanchi wixu sire'i moo'isookkok Waa'i sagar kobi'llishsha.

¹⁵Mat mat manni googonne ubu sire'e kobi'llookko. Eehido'i manni Waa'i sagara macceesukkisam Sheexaanchi wixamu sagara ixxuwwi woriinsi feeraa massookko.

¹⁶Ee'isam mulli keen kinaam uullanne ubu sire'e kobi'llookko; oo keenim sagara macceesoo ammane liiranchinne aa'oo keeno.

¹⁷Ihukkaarem oo keen xaph bee'i keen ikko'i bikkina lobakata hee'llamoyyo. Ee saga'l mashka'inne hawwi te'im yaayyanchi afoo ammane qaqqisom qolantamo.

¹⁸Mulli keenim uttanne ubu sire'e kobi'llookko; Waa'i sagara macceesimmina macceessamo.

¹⁹Ihukkaarem ka uulli bikkina sawwimmi, amaxxa iittimmii ee'isam mulli luwwi mixanii Waa'i sagara xagarookko; meshbee'em gatoo'isa issookko.

²⁰Mulli keenim harish uullanne ubu sire'inne kobi'llookko; oo keen Waa'i sagara macceessa'a aa'imminne mat sade, mat lohayye, mat xibbi misha mishoo keeno» yukko.

²¹ Odim Yesuus ixxuwwina «Manni caakka caakkisaa sanfi woronne te'im ara'i woronne dissoohonnihe? Caakkooma dissookkok qoffit beyyonnetteyyonnihe?

²² Ee bikkina maaxamaa moo'amoo'n daphphaahim caakkoo'n hee'oo luwwi bee'e.

²³Macceesoo macci yookkok macceesona» yukko.

²⁴ Odim ixxuwwina «Macceessakkamoka qoossehe! Keentakkam keennaanchonne ki'nnuwwinam keenamookko. Hore'em eehanniinsim lophphaa exxookko.

²⁵ Yoohaannina exxookko. Ihukkaarem bee'aanniinsi oo yooqaxichchim massamookko» yukko.

²⁶Odim Yesuus ixxuwwina «Waa'i adillan uullanne sire'e wixoo manchinne kobi'llamookko.

²⁷Ixxim hiimo iinse'ookko; soodoohaarem ki'ookko. Ihukkaarem wixu sire'i ma'ihuda'e la'oo'nnim sire'oom mutaa li'ookko.

²⁸Uulli ixxi gagim gaassaa muta mutisookko. Ee lasage oo mut fiitaa er misha mishookko.

²⁹ Oo mishim afoo ammane oo manchi jajjara gudisaa murimma asheerookko» yukko.

³⁰Odim Yesuus «Waa'i adillano mahinne akeekansoommo? Te'im mah kobi'llishshinne ixxi bikkina tillaa kullo?

³¹Waa'i adillan mat manchi massaa uullanne wixu shaa'n sire'i'nnoo'i gootto'i sire'e labookko. Wixamoo ammane uullanne yoo sire'i hundiinsim hoffane.

³²Ihukkaarem li'oo ammane duubbonne wixakkam luwwi hundiinsim lophphaa geejji geejji caaffuwwa fissookko. Cii'im ixxi caafanne do'nna baxaa usheexxookko» yukko.

³³Manni ixxi woshsha qoosseena xanoo lobakat kobi'llishshinne Yesuus kurukko.

³⁴Kobi'llishshi bee'eka ixxuwwina maham kurukkoyyo. Ihukkaarem manni maraa lasage ixxi losaanina hundem luchchom caakkisaa kurukko.

³⁵Ee balla uulli hiimaakkoohaannonne ixxi losaanina «Massehe; dambalaq eeqido fillona» yukko.

³⁶Ixxuwwim manniinsi annanni ikka'a Yesuus afuuraa hee'u wongiranne aagga'a Yesuusinne maqirem matto'o. Mulli wongilluwwim ee beyyonne hee'ukko.

³⁷Ee lasage dangonnem malaayyaam hambu'llam dambalaqanne ki'aa wongiranne wo'i aagoo'isa issukko. Wongirannem wo'i wo'mmukkuuyyi marukko.

³⁸Ee ammane Yesuus barkuma bakke'aa wongi'l afaree'n kollinne iinse'aa hee'ukko. Ixxi losaanim baqaa'lla'a «Losisaancho! Neese beeddinummuuyyi at qishixxitooyyonnihe?» yito'o.

³⁹Ixxim baqaa hambu'llama ijaajukko. Dambalaqam «Sa'ihe!» yukko. Hambu'llamim ijaajamukko; lophphaakkoo sa'itim ihukko.

⁴⁰Ee lasage Yesuus ixxi losaanina «Mahina badditakkamuulla? Mahindu amma'nnat bee'aate?» yukko.

⁴¹Ixxuwwim lobakata baddita'a ixxuwwina'i ixxuwwim «Hambu'llamii dambalaqii ixxena ijaajamookkok kuk hinkido'i mancho?» yito'o.