Read Hadiyya Maarqoos Mishiraachcha 5 Bible Online

Maarqoos Mishiraachcha 5 - Hadiyya bible

Maarqoos Mishiraachcha 5

¹Yesuusii ixxi losaanii dambalaqa fitta'a Geeraaseena yakkam uulla affo'o.

²Yesuusim wongiriinsi firukkisam habus amadaakkoo manchi Yesuusinne edameena waammi beyyiinsi firukko.

³Ixxim hee'am hee'ukkok waammuwwi beyyonnette hee'ukko. Ayyi manchim ixxo chimchiminne karaa egedeena xanam hee'ukkoyyo.

⁴Dut ammane xaarinnee chimchiminnee karakkam hee'akko'o. Ihukkaarem chimchimmuwwa muransamii xaaram iiqansamii hee'u bikkina ayyim ixxo egedeena xanam hee'ukkoyyo.

⁵Ixxim ballaa hiimoo hundi ammanem waammi beyyuwwannee duunnuwwannee ihaa laarukkuuyyi ixxi orachcho kininne muransam hee'ukko.

⁶Ixxim Yesuusa qee'llonnem asi'mmaa moo'aa geeraa waaraa Yesuus lokkonne ubukko.

⁷Yesuusim «Habusichcho, ka manchiinsi fire!» yaa hee'u bikkina habusichchi «Hundam xanoo Waa'i Beet Yesuusa! Iina kiinninne mah hee'aate? Eese barche'e issitoobee'isina Waa'i summinne keese uunxoommuulla?» yaa laarukko.

⁹Yesuusim ixxena «Ki summi ayyette?» yaa xa'mmukko. «Neese dut keen inkummi bikkina i summi Gogototte» yukko.

¹⁰Ixxim Yesuus ixxuwwa ee uulliinsi holloobee'isa worwaatukko.

¹¹Eekke'em lobakat boonke'ik allaachchi duu'n gabonne allaa'llam hee'u bikkina «Neese mallaa ee boonke'i allaachchenne aangonnihe?» yita'a uunxito'o.

¹³Yesuusim «Mattakka'a aaggehe» yukko. Habusim ee manchiinsi fitta'a boonke'enne aaggo'o. Lam kuma ihoo boonke'im didiyaa maraa dambalaqanne ubaa xuuxamukko.

¹⁴Boonke'e allaaraanim gibba'a matta'a ee woshsha beero'onnee ee gattennee kutto'o. Ee beyyi mannim oo woshshi maruchda'e moo'immina matto'o.

¹⁵Ixxuwwim Yesuus beyyo matta'a habusik gogot amadaa hee'u manchi fayye'aa eddechcham edde'aa eekke'e afuuraakkoo moo'lla'a Yesuusa baddito'o.

¹⁶Habusik gogot amadu manchonnee boonke'i allaachchennee ihu luwwa gaassita'a moo'llo'i keenim ixxuwwina kutto'o.

¹⁷Oo mannim ixxuwwi uulliinsi Yesuus maroo'isina uunximma asheetto'o.

¹⁸Oo habus amadaa hee'u manchim wongiranne Yesuus aagukkuuyyi moo'aa «Kiinninnem maroommo» yaa uunxukko.

¹⁹Oo manchi ixxenne marona Yesuus hasukkoyyo. Ihukkaarem «Ki mine mare; ki qarmanninam Waa'i kiina issu maalalsiisoo luwwaa eroommaa kure» yukko.

²⁰Oo manchim maraa Yesuus ixxena issu luwwa «Tommi Beero'o» yakkam uullanne alallaatimma asheerukko; macceesu manni hundim maalalukko.

²¹Yesuus odim dambalaq eeqido wongirinne firu ammanenne dut manni ixxi kululleetanne wixxito'o. Dambalaq gadanonnem yoohaannonne

²²Ayihuxxi manni wixxixxi mi'n awwonsaaniinsi mat hee'u Iyyaa'iiroos Yesuusa moo'aa ixxi lokkonne ubaa

²³«Iikki hoffi landichcho leteena hooggo'ookko. Fayye'lla'a lehiinsi gattona waattaa ki anga is hanenne isse» yaa qoxxisaa uunxukko.

²⁴Yesuusim ixxenne maqirem marukko. Dut mannim ixxenne maqire taakke'llu'uuyyi kolli hundinnem gafe'antam hee'llo'o.

²⁵Tommoo lam hiinchoo hundam xiig dunamukkuuyyi hawwito'oo mat meentichchom eekke'e hee'llo'o.

²⁶Isem qaraa'l manni beyyi hundannem badattu'uuyyi isena yoo diinat hundam guullita'a hee'llo'o. Ihukkaarem xissoom baasukkuuyyi marukko bagaan maham e'llukkoyyo.

²⁷Isem Yesuus bikkina macceessa'a ee manni lambe'inne higga'a ixxeka eddechcha nakkito'o.

²⁸Mashka'oomim «An ixxeka eddechcham nakkumta'n fayye'oommo» yitam amma'nnat hee'u bikkinatte.

²⁹Ixxeka eddechcha nakkito'isam dunamam hee'u is xiig ee ammanem uullukko. Isem jabbiinsi fayye'llo'isa laqqo'o.

³⁰Ee ammanem Yesuus ixxeensi malaayyi firukkisa la'u bikkina manni kollonne daba'llaa «I eddechcha nakkukkok ayyette?» yaa xa'mmukko.

³¹Ixxi losaanim «Ku minaadab kiinninne gafe'amukkuuyyi moo'llittuuyyim ‹Eese nakkukkok ayyette?› yitoohonnihe?» yita'a dabatto'o.

³²Ihukkaarem Yesuus ixxo nakkukkok ayyetda'e ihukkisa moo'eena laso qerephukko.

³³Oo meentichcho ee ammane isenne ihu luchcho laqqo'i bikkina baddita'a huxe'llu'uuyyi ixxi lokkonne ubba'a ihu hanqi woshshi hundam ixxena kutto'o.

³⁴Yesuusim isena «Taa meentichche, ki amma'nnat keese fayyiisaakko. Xumminne mare; ki hawwiinsim usheexxe» yukko.

³⁵Yesuus eehid woconam Iyyaa'iiroos miniinsi waatto'i manni «Ki landichcho leto'ookko; kaba losisaancho mahina hawwissoolla?» yito'o.

³⁶Ihukkaarem Yesuus ixxuwwi kutto'oka gadaa[4] Iyyaa'iiroosina «At amma'nne bagaan baddititte!» yukko.

³⁷Ixxim xale'i Pheexiroosiinsi, Yaaqoobiinsii Yaaqoob abbaayyi Yohaannisiinsii bagaan ayyim ixxo awwonona hasukkoyyo.

³⁸Ixxuwwim Iyyaa'iiroos mine affo'i ammane manni sorukkuuyyii laarukkuuyyii wi'llookkoka Yesuus moo'ukko.

³⁹Ixxim mine aagaa ixxuwwina «Coro'llakkamokii laattakkamokii mahinatte? Landichcho diriitto'ookko bagaan leto'oyyo» yukko.

⁴⁰Ixxuwwim ixxonne osatto'o. Ihukkaarem Yesuus manna hundam miniinsi fissaa landichchoka ama, annaa ixxenne maqire waatto'i ixxi losaanoo amadaa oo landichcho yo'i beyyo aagukko.

⁴¹Ixxim landichchoka anga amadaa «Xaaliitaa, quumii!» yukko. Ee'isa yimmim « ‹Taa hoffi landichche, iimihe!› yoommuulla» yimma.

⁴²Ee ammanem landichchooma ki'lla'a taakke'llo'o. Isem qaranto'aanniinsi tommoo lam hiinchoo ihaa hee'ukko. Mannim eekka moo'aa lobakata maalalukko.

⁴³Eekka mat manchim la'oobee'isa Yesuus qoxxisaa ijaajaa lasage «Ittam luchcho uwwehe» yukko.