Read Hadiyya Maarqoos Mishiraachcha 6 Bible Online

Maarqoos Mishiraachcha 6 - Hadiyya bible

Maarqoos Mishiraachcha 6

¹Ee lasage Yesuus ee beyyo uraa ixxi uulla daba'llukko. Ixxi losaanim ixxo awwonta'a matto'o.

²Ixxim Usheexxaxxi Ayyaamonnem Ayihuxxi manni wixxixxi minenne losisimma asheerukko. Ee ixxi losishsha macceesso'i dut manni maalalta'a «Ku manchi ka lachcha hundam hanniinsi siixxukko? Ku ixxena uwwamu qooroom hinkido'ane? Odim ka aganna issookkok hinkidette?

³Ixxek ama Maaraametteyyonnihe? Ixdu haqqa cabbaraanchoyyonnihe? Odim ixxi abbaayyuwdu Yaaqoobatte, Yoosa'atte, Yihudattee Simi'oonatteyyonnihe? Ixxi aayyuwdu keyye niinninne maqire yo'i keenoyyonnihe?» yito'o. Ee'isinnem qolanto'o.

⁴ Yesuusim «Hiraagaanchi lomba siixxoobee'ek xale'i ixxi uullanne, qarmanni lambe'ennee ixxi abaroosannettee» yukko.

⁵Yesuus ee beyyonne hofqax jabbaa'n hanennem ixxi anga issaa fayyiisukko bagaan lobakat aganna isseena xanukkoyyo.

⁶Ixxuwwi amma'nnitobee'i bikkinam lobakata maalalukko. Ee lasage gatti hundam marukkuuyyi losisam hee'ukko.

⁷Tommoo lamem losaanoo Yesuus weeshaa lam lam issaa asse'ukko. Ixxuwwinam habusa fissiteena xantam malaayye uwwukko.

⁸ Odim ixxuwwina «Googina bicciinsi bagaan hurbaatam ihukko te'im canam ihukko te'im ladimonne diinatem ihukko amaddakkambee'isa.

⁹Ihukkaarem caamma'a issaqqehe. Lago'i eddechcham amaddakkotte.

¹⁰Hannonnem manni mine koyyinano aaggakkam ammane ee beyyo fittakkeebe'e ee minenne afuullehe.

¹¹ Ayyi beyyonnem manni ki'nnuwwa aa'ubeelasii ki'nnuwwi losishsham macceesubeelasii fittakkam ammane ki'nnuwwi lokkiinsi dira giggissehe. Oohim ki'nnuwwi quuxo yimmi mare'e» yukko.

¹²Losaanim matta'a manni baaxiilo biiraa yihona alallaatto'o.

¹³ Dut manniinsim habusa fissito'o. Dut jabbaanom zayta labbu'uuyyi fayyiisso'o.

¹⁴ Yesuus bikkina manni wocam hee'u er sado adil Heeroodis macceesukko. Mat mat mannim «Xammaqaanchi Yohaannis lehiinsi ki'aakko. Ee bikkina ka aganna issoolla» yito'o.

¹⁵Odim mulli keen «Kuk Eeliyaasatte» yito'o. Mulli keenim «Kuk gaassi doolli hiraagaaniinsi matisam hiraagaancho» yito'o.

¹⁶Ihukkaarem Heeroodis eekka hundam macceesu ammanenne «Kuk gaanje mussiisummi Xammaqaanchi Yohaannisatte. Ixxi lehiinsi ki'aakko» yukko.

¹⁷ Ixxi abbaayyi Filiphphoosina are Heeroodiyaade Heeroodis eebaa hee'u bikkina Yohaannis Heeroodisina «Ni Seera ginditaa kiyyabbaayyi are ki gagina eebbaatto» yaa acceeqasaa hee'ukko. Ee mashka'inne Heeroodis Yohaannisa karaxxi minenne kassiisaa hee'ukko.

¹⁸

¹⁹Heeroodiyaadem nadadda'a Yohaannisa shisiisseena hasso'o; ihukkaarem xanto'oyyo.

²⁰Mashka'oomim Yohaannis xummaanchoo keesammaa ihukkisa Heeroodis la'am hee'u bikkina ixxo baddam hee'ukko. Odim ixxom hawwodoo luchchiinsi egeram hee'ukko. Ixxim Yohaannis wocoo woshsha macceeseena hasam hee'ukko. Ihona bagaan Yohaannis wocoo woshsha macceesu amman hundam u'nnamam hee'ukko.

²¹Heeroodis ixxi qaramu ayyaamo lonsimmina ixxi adillanonne yoo gassaano, gaaxxi awwonsaanoo Galii'l uullanne hee'llam geejji geejji mannaa maadda gudisaa weeshukko. Oo amman Heeroodiyaade Yohaannisa shisiisseena makki amman ihu bikkina

²²is landichcho weeshamu koyyi beyyo aagga'a kajja kaddo'o. Is kajjannem Heeroodisii ixxi koyyii liiranto'o.

²³Ee bikkina landichchona Heeroodis «At hassoo luwwi hundam xa'mme; an kiina uwwoommo. Hore'em i adilla'n kollom ihuta'n at xa'mmittoka uwwoommo» yaa hide'ukko.

²⁴Isem am beyyo matta'a «Maha xa'mmo?» yita'a xa'mmito'o. Amam « ‹Xammaqaanchi Yohaannis horoore› yihe» yito'o.

²⁵Landichchom qaqqissa'a adi'l beyyo daba'llita'a matta'a «Xammaqaanchi Yohaannisika gaanje made'enne issitaa uwwitona hasoommo» yito'o.

²⁶Adilim ee woshshanne lobakata kichche'ukko. Ihukkaarem weeshu koyyi illagenne hide'aa hee'u bikkina wocu sagara lageena xanukkoyyo.

²⁷Ee bikkina ee ammanem Xammaqaanchi Yohaannisika gaanje muraa amadaa waarona gaadaancho ijaajukko. Gaadaanchim maraa karaxxi minenne Yohaannisika gaanje murukko.

²⁸Made'enne issaa eebaa ee landichchona uwwukko. Landichchom amana uwwito'o.

²⁹Yohaannis losaanim eekka macceesso'isam waatta'a ixxi leesha massita'a waammito'o.

³⁰Asse'amaan matto'i beyyi hundiinsim waatta'a Yesuus gadanonne wixxita'a baxxo'okaa losisso'i luwwaa hundam ixxena kutto'o.

³¹Waaroohii maroohii dut hee'u bikkina ixxuwwina hurbaata ittam ammanim hee'ukkoyyo; ee bikkina Yesuus ixxi losaanina «Xale'i ki'nnuwwi iinninne maqirem manni bee'i beyyo mallona waallehe; eehe'em gootto'o usheexxehe» yukko.

³²Ee bikkina Yesuusii ixxi losaanii wongiranne aagga'a manni bee'i beyyo matto'o.

³³Ihukkaarem ixxuwwi mattu'uuyyi dut manni moo'lla'a ayyayyaamda'e ikko'isa laqqo'i bikkina beero'i hundiinsim fitta'a geettu'uuyyi Yesuusaa ixxi losaanoo gaassita'a ee beyyo affo'o.

³⁴ Yesuusim wongiriinsi firu ammanenne wixxaakkoo dut manna moo'ukko. Ixxuwwim allaaraanchi bee'i gereebbisa ikka'a hee'llo'i bikkina qishixxukko. Ixxuwwinam dut luwwa losisimma asheerukko.

³⁵Uulli hiimeena ihaakkoohaannonne ixxi losaan ixxi beyyo hincita'a «Ku beyyi udma'a; uullim hiimaakko.

³⁶Itoo hurbaat bee'i bikkina ku manni ka kululleetanne yoo hegeegguwwa maraa itoo luwwa bita'llona geegeese» yito'o.

³⁷Ihukkaarem Yesuus «Ixxuwwi ittam luwwa ki'nnuwwi uwwehe» yaa dabarukko. Ixxuwwim dabatta'a «Ka mannina ihoo hurbaata mallaa lam xibbi diinaarinne bito aa'nnonannihe?» yito'o.

³⁸Yesuusim «Ki'nnuwwina hinkaa'n qorosho'i hee'aate? Huno'o, mattakka'a moo'llehe» yukko. Ixxuwwim moo'lla'a «Onti xeffo'i qorosho'ii lam qurxumme'ii yookko» yito'o.

³⁹Ee lasage manna muratinne muratinne hixenne afuussitamisina Yesuus ixxi losaano ijaajukko.

⁴⁰Ee bikkina mannik mat mat murat xibbi xibbi ikka'a mat mat murat odim ontayyi ontayyi ikka'a ogoranne afuutto'o.

⁴¹Ee lasage Yesuus ee ontem xeffo'i qorosho'oo lamem qurxumme'ee ki'isaa iimane moo'ukkuuyyi Waa'a galaxxukko. Qorosho'om iiqansaa mannina baxxansiton ixxi losaanina uwwukko. Ee'isam qurxumme'em hundinam baxxansukko.

⁴²Manni hundim itaa goddukko.

⁴³Losaanim manni itukkuuyyi gatu qorosho'ikaa qurxumme'ikaa giggira tommoo lam sanfo ki'isso'o.

⁴⁴Ee hurbaata itu keeniinsi goo'nnek xig onti kum hee'ukko.

⁴⁵Yesuus ee manna geegeesukkuuyyim ixxi losaan wongiranne aagga'a dambalaq eeqido Beetasaayda yakkam beyyo ixxeensi gaassita'a mattona ijaajukko.

⁴⁶Ixxim manna geegeesaa lasage Waa'a uunxeena duunanne firukko.

⁴⁷Uulli hiimu ammanenne wongiroom dambalaq lambe'ennette hee'ukko. Ihukkaarem Yesuus mullam uullanne hee'ukko.

⁴⁸Ixxuwwi illagenne malaayyaam hafachchi hafachcham hee'u bikkina ixxi losaan wongira ushe'lleena yakitu'uuyyi Yesuus moo'ukko. Ixxim luxxi antabaa'i muuneena ihaakkoohaannonne dambalaq haninne taakke'ukkuuyyi ixxuwwi gadaninne higeena waarukko.

⁴⁹Ihukkaarem dambalaqanne Yesuus taakke'ukkuuyyi moo'lla'a wiidda labissa'a laatto'o.

⁵⁰Ixxo moo'llo'i ammanenne hundim baddito'o. Ee ammanem Yesuus «Anette; badditakkotte!» yukko.

⁵¹Wongi'l woronnem aagaa ixxuwwinne maqire ihu ammanenne hafachchi uullukko. Losaanim lobakata maalalto'o.

⁵²Mashka'oomim ixxuwwik wodan duudaa hee'u bikkina onti kum manni itu hurbaaxxeka maalalsiisoo aganna qoossito'oyyi hee'ukko.

⁵³Yesuusii ixxi losaanii dambalaqa fitta'a Gensereexa affa'a dillito'o. Wongiram eehe'enne katto'o.

⁵⁴Ixxuwwi dillito'isam manni Yesuusa inkiinnukko.

⁵⁵Ee bikkina ixxuwwi ee uulli bakkonne yoo gattuwwi hundiinsim geetta'a matta'a jabbaano hallaqqanne iyyita'a «Yesuus yookko» yakko'i beyyi hundam eebbam hee'llo'o.

⁵⁶Yesuus maru gattuwwanne, lob beero'uwwannee hoffi beero'uwwannee hundannem jabbaan ixxi eddechchika kasa nakkitona Yesuusa uunxiteena jabbaano meer hundam massitam hee'llo'o. Nakkito'i keen hundim fayye'llo'o.