Read Hadiyya Maarqoos Mishiraachcha 7 Bible Online

Maarqoos Mishiraachcha 7 - Hadiyya bible

Maarqoos Mishiraachcha 7

¹Mat ayyaamo Farisaawe'uwwii Yerusaaleemiinsi waatto'oo Seera losisaanii Yesuus gadanonne wixxito'o.

²Ixxuwwim Yesuus losaa'nnek mat mat ixxuwwi losa'nnisanne anga aanshaqqitoo'n hurbaata ittu'uuyyi moo'llo'o.

³Farisaawe'uwwii Ayihuxxi mannii ixxuwwi anno'i losa'nnisanne ixxuwwi anga see'llisanne aanshaqqitoo'n hurbaata ittamoyyi hee'llo'o.

⁴Ee'isam meeriinsi daba'llitam ammane aanshaqqita'a muccuttoo'n hurbaata ittamoyyo. Odim humbullo, harachcho, saahinaa ara'aa aanshitam dut losan hee'ukko.

⁵Farisaawe'uwwii Seera losisaanii «Ki losaan anga aanshaqqitoo'n hurbaata itimminne anno'i losano ginditamok mahinatte?» yita'a xa'mmito'o.

⁶ Ihukkaarem Yesuus «Ki'nnuwwi labisaano! Issaayyaas ki'nnuwwi bikkina ‹Ku minaadab eese lonsookkok xale'i suuminnette; ihukkaarem ixxuwwik wodan iinniinsi qee'llaakkoohane.

⁷Mannika losano losissu'uuyyi kora'am iina otossitamo› yukkok hanqame.

⁸«Waa'ika ijaajo sabbakka'a manni losanina ijaajantakkamuulla» yukko.

⁹Odim «Ki'nnuwwi losano egerimmina Waa'ika ijaajo lobakata sabbakkamuulla.

¹⁰ Muse'i ‹Kiyyannaa kiyyummaa lonse. Anna te'im ixxi ama game'lloo ayyim lehona› yaakko.

¹¹Ihukkaarem ki'nnuwwi mat manchi ixxi annina te'im amana ‹Iinniinsi siidimmi hasisoo hara'mmato hundam Waa'ina kitim issaa hincaa'aammo› yulas

¹²ki'nnuwwim oo manchi ixxi anninaa amanaa ee lasage maham hara'mmoobee'isa issitakkamo.

¹³Ki'nnuwwi ee'isinne mulli qaranchina losissakkam losishshinne Waa'i sagara ginditakko'ookko. Eehido'i dut luwwam issitakkamo» yukko.

¹⁴Odim Yesuus manna ixxi kolli weeshaa «Ki'nnuwwi an wocoommi woshsha macceessehe; qoosseheme.

¹⁵Manna haashaassookkok manni woriinsi firoohane bagaan manni godabonne aagoohaneyyo. Macceesoo macci yookkok macceesona» yukko[5].

¹⁷Yesuusim manna uraa mine aagaa lasage ixxi losaan ee kobi'llishshi bikkina xa'mmito'o.

¹⁸Ixxim «Ki'nnuwwim qoossitakkamoyyonnihe? Manni godabonne aagaa haashaassoo luwwi mahim bee'e.

¹⁹Manni godabonne aagoo luwwi shum ihaa firookko bagaan wodanonne aagooyyo» yukko. Yesuus eehid yimminne hurbaat hundim muccur ihukkisa la'isukko.

²⁰Ee'isam «Manniinsi firoo luwwi manna haashaassookko.

²¹Oohim jor sawwit, mine issakkoo'n saa'immi, game'immi, manna shimmi, mine issakka'a saa'immi,

²²gollimmi, boqqimmi, qawwiisimmi, ijaajancha sabimmi, maso'immi, manni summa bi'isimmi, bolximmii la'akku'uuyyi er luwwa issimma sabimmii manni wodaniinsi firoo bikkina manna haashaassookkok ee keeno.

²³Oo keen hundim manni wodaniinsi firoo bikkina manna haashaassookko» yukko.

²⁴Ee lasage Yesuus ee beyyiinsi ki'aa Xiiroosikaa Siidoo'n beero'oo marukko. Eekke'em mat mine aagaa ixxi eekke'e yoo'isa ayyi manchim la'ona hasukkoyyo. Ihukkaarem maaxameena xanukkoyyo.

²⁵Ee ammanem iseka landichcho habus amadaakkoo mat meentichcho Yesuus bikkina macceessa'a waatta'a ixxi lokkonne ubbo'o.

²⁶Meentichchooma Sirofiniiq moollitan ikka'a Giriikichchotte hee'llo'o bagaan Yihuxxi uullitane hee'llo'oyyo. Isem is landichchoonsi habusa fissona Yesuusa uunxito'o.

²⁷Ihukkaarem isena «Oosika hurbaata ki'isakka'a wishina uwwimmi hasisooyyo. Gaassaa oos goddona» yukko.

²⁸Ihukkaarem ise «Moollanna! Hanqame; wishim oos illagiinsi ubu furfuro'o leemaaxxi lugumiinsi feeraa itookko» yita'a dabatto'o.

²⁹Yesuusim isena «At kid yitti bikkina ki landichcho habus fatakaakko; kaba mine elle'e» yukko.

³⁰Isem mine daba'llito'i ammanenne landichcho habus fatakukkaare fayye'lla'a ara'anne iinse'llo'ookkoka moo'llo'o.

³¹Ee lasage Yesuus Xiiroosiinsi ki'aa Siidoona higaa Tommi Beero'o yakkam uullinne Galii'l dambalaq gadano waarukko.

³²Eekke'em mat gawwaa duudaa hee'u mat mancho manni ixxi beyyo eebukko; ixxi hanennem anga issona uunxito'o.

³³Yesuusim ee mancho manniinsi annanni issaa massaa ixxi angika maxxaalluwwa ee manchi maccenne aagisukko. Anjam tuhaa manchika allabo nakkukko.

³⁴Iimane moo'aahim qitinimminne «Efitaah» yukko. Oohim «Fooqihe» yimma.

³⁵Ee ammanem manchik macci macceesukko; ixxi allabim tiramaa danaamisa wocukko.

³⁶Yesuusim ixxuwwina «Kaka ayyenam kuttakkambee'isa» yaa ixxuwwa ijaajukkoka utta'a ee woshsha lonsita'a alallaatto'o.

³⁷Ee woshsha macceesso'i keen hundim lobakata maalalta'a «Ixxi issu luwwi hundim danaamo; oohim gawwi macceesoo'isa issaakko; duudim wocoo'isa issaakko» yito'o.