Read Hadiyya Maarqoos Mishiraachcha 8 Bible Online

Maarqoos Mishiraachcha 8 - Hadiyya bible

Maarqoos Mishiraachcha 8

¹Mulli ammane odim dut manni wixxukko. Ixxuwwinam ittam luwwi ma'lluchchim hee'ukkoyyo. Ee bikkina Yesuus ixxi losaano ixxi beyyo weeshaa

²«Ku manni iinninne sas balla afuuraakkoo bikkina itoo luwwi bee'e. Ee bikkina an ixxuwwina qishixxoommo.

³Ixxuwwik mat mat keen waatto'ok qee'l beyyiinsette ihu bikkina ka'isa sibaatto'isam ixxuwwi mine elle'llona geegeesummaare googonne hooggamo» yukko.

⁴Ixxi losaanim «Ka udma'anne ka hundem manninam ihoo hurbaat hannonne hee'ookko?» yito'o.

⁵Yesuusim ixxuwwina «Hinkaa'n qorosho'i yookko?» yaa xa'mmukkaare «Lamar xeffo'i qorosho'i yookko» yito'o.

⁶Yesuusim minaadab uullanne afuuroo'isa ijaajaa lamarem xeffo'om amadaa Waa'a galaxxukko. Ixxom iiqansaa mannina baxxansitona ixxi losaanina uwwukko. Ixxuwwim hundinam afisso'o.

⁷Odim goottokkichcha'i qurxumme'ikim hofqaxim hee'ukko. Waa'am galaxxaa mannina baxxansitona ijaajukko.

⁸Mannim itaa goddukko; gatu giggiram wixxaa'lla'a lamar sanfonne wo'mmaakkoo ki'isso'o.

⁹Hurbaata itu mannikim xig soor kum hee'ukko. Ee lasage ee manna geegeesukko.

¹⁰Ixxim losaaninne maqirem wongiranne aagaa Daalmaanuuta[6] yakkam uulla marukko.

¹¹ Ee lasage mat mat Farisaawe'uwwi Yesuus beyyo waatta'a ixxenne fitancha asheetto'o. Keenteenam hassa'a iimaniinsi maalalsiisoo mare'e moo'isona xa'mmito'o.

¹² Ihukkaarem Yesuus ixxi tiironne lobakata kichche'aa «Ku qaranchi mare'e moo'eena hasookkok mahinatte? Hanqinam an ki'nnuwwina kuroommo; ka qaranchina mah mare'im uwwamooyyo!» yukko.

¹³Ee lasage Yesuus ixxuwwiinsi annanni ihaa odim wongiranne aagaa dambalaq eeqido marukko.

¹⁴Ee ammane Yesuusik losaan ixxuwwina ihooqax qorosho'o amadimma xaddo'i bikkina wongi'l woronne xale'i mat xeffo'i qorosho'iinsi bagaan mullek mahim hee'ukkoyyo.

¹⁵ Yesuus ixxuwwina «Farisaawe'uwwaanniinsii Heeroodis ursho'iinsii qoxxitakka'a ege'llehe» yaa ijaajukko.

¹⁶Ixxuwwina'i ixxuwwim «Ayyi la'ukko ka'isa yukkok qorosho'o amandumbee'i bikkinatte ihookko» yito'o.

¹⁷Yesuusim ixxuwwi sawwixxeka la'aa «Mahina qorosho'o amandumbee'i bikkinatte yitakkamuulla? Kabadem qoossitakko'oyyonnihe? Hindihitakkamoyyonnihe? Te'im ki'nnuwwik wodan duudaahinnihe?

¹⁸ Ki'nnuwwina'i illi yookko; moo'llakkamoyyonnihe? Maccima'i yookko; macceessakkamoyyonnihe? Hinkid sawwitakkamoyyo?

¹⁹Onti xeffo'i qorosho'o onti kum mannina baxxansitakkona iiqansaa uwwummi ammane manniinsi gatu giggira ki'issakko'ok mee'i sanfo?» yukko. Ixxuwwim «Tommoo lam sanfo» yito'o.

²⁰Odim «Lamar xeffo'i qorosho'o soor kum mannina baxxansitakkona uwwummi ammane manniinsi gatu giggira ki'issakko'ok mee'i sanfo?» yukkaare ixxuwwim «Lamar sanfo» yita'a dabatto'o.

²¹Ixxim ixxuwwina «Eehannah kabad afeebe'em qoossitakkamoyyonnihe?» yukko.

²²Ixxuwwi Beetasaayda affo'isam hofqax mannim mat illi qooqa Yesuus beyyo eebba'a anginne nakkona uunxito'o.

²³Yesuusim ee qooq manchika anga amadaa masakkukkuuyyi ee gattiinsi tochchonne fissukko. Manchi illennem anja tuhaa ixxi anga manchi hanenne issaa «Kiina moo'amoo luwwi yoohonnihe?» yaa xa'mmukko.

²⁴Oo manchim moo'aa «Manni haqqisa mikmikukkuuyyi moo'oommuulla» yukko.

²⁵Odim Yesuus ee manchi illenne ixxi anga la'mmaaggem issukko. Ee ammanenne manchi qoossaa moo'ukko. Ixxi illim fayye'aa hundem luchchom danaamisa moo'eena xanukko.

²⁶Ee lasage Yesuus «Ka gatte aaggitte; ka gattenne kaka ayyenam kuttitte» yaa mine elle'ona geegeesukko.

²⁷Yesuus ixxi losaaninnem Filiphphoos Qiisaariya yakkam uullanne yoo gattuwwa marukko. Mattu'uuyyim Yesuus «Manni eese ayyette yoolla?» yaa ixxi losaano xa'mmukko.

²⁸ Ixxuwwim «Mat mat keen ‹Xammaqaanchi Yohaannisatte› yitamuulla. Mat mat keen odim ‹Eeliyaasatte› yitamuulla. Mat mat keen odim ‹Hiraagaaniinsi mato› yitamuulla» yita'a dabatto'o.

²⁹ Yesuusim ixxuwwina «Eehaare ki'nnuwdu eese ayyette yitakkamuulla?» yaa xa'mmukko. Ee ammanenne Pheexiroos «At Kiristoosatte» yaa dabarukko.

³⁰Yesuusim ayyenam i bikkina kuttakkambee'isa yaa ijaajukko.

³¹Ee lasage Yesuus ixxi losaanina «Manchi Beet lobakata hawwimmi hasisookko. Ixxom lommanni, qeessa awwonsaanii Seera losisaanii sabbamo; lehinam higissa'a uwwitamo. Ixxim sas balliinsi lasage lehiinsi ki'ookko» yaa losisimma asheerukko.

³²Ee woshsham ixxuwwina caakkisaa kurukko. Ee ammane Pheexiroos Yesuusa mullam haxonne fissaa «Ka'isa woccitte» yukko.

³³Ihukkaarem Yesuus ixxi losaa'n kollonne daba'llaa moo'ukkuuyyi Pheexiroosena «Sheexaancho, iinniinsi qee'lle! At mannane bagaan Waa'ika laqqooyyo!» yaa axeerukko.

³⁴ Ee lasage Yesuus ixxi losaanoo mannaa ixxi beyyo weeshaa «Ayyim eese awwoneena hasulas ixxi gaga lagona. Masiqalam iyyaa eese awwonona.

³⁵ Mashka'oomim ixxi foore gatiseena hasookkok ayyim bi'isookko. Ihukkaarem i bikkinaa mishiraachchi saga'l bikkinaa ixxi foore bi'isookkok ayyim gatisookko.

³⁶Mat manchi ka uulli amaxxa hundam siixxaa ixxeka foore bi'isuta'n ixxena maha awwaadookko?

³⁷Te'im mat manchi ixxeka foore mahinne bito aa'eena xanookko?

³⁸Waa'a lagimminnee baaxiilo baximminnee la'amaakkoo ka qaranchi illagenne eesennee i sagarannee tuuroohaannonne ayyennem Manchi Beet ixxi anni lombinnee keesammi asse'amaaninnee maqirem waaroo ammane ixxonnem tuurookko» yukko.