Read Hadiyya Maarqoos Mishiraachcha 9 Bible Online

Maarqoos Mishiraachcha 9 - Hadiyya bible

Maarqoos Mishiraachcha 9

¹Odim Yesuus ixxuwwina «Hanqinam an ki'nnuwwina kuroommo; ka beyyonne yo'i keeniinsi mat mat manni lobakat malaayyinne Waa'i adillan waarukkuuyyi moo'lleebee'i afeebee'e letambee'i keen yo'o» yukko.

² Loh balliinsi lasage Yesuus xale'i Pheexiroosa, Yaaqoobaa Yohaannisaa awwonsaa mat lob duunanne firukko. Ixxuwwi moo'llu'uuyyim ixxek hagar dabassamukko.

³Ixxi eddechchim belecce'ukko; ka uullanne ayyim aanshaa qadaalliseena xanoobeeqaxam qadaallukko.

⁴Eeliyaasii Muse'ee Yesuusinne atoorattu'uuyyim caakkita'a moo'anto'o.

⁵Pheexiroosim Yesuusina «Losisaancho! Ka beyyonne hee'immi niina danaamo. Ee bikkina sas daasa matoo kiina, matoo Muse'ena, matoo Eeliyaasina banxona» yukko.

⁶Ixxuwwi lobakata baddita'a hee'llo'i bikkina Pheexiroos maha wocooda'e la'am hee'ukkoyyo.

⁷ Umbu'llim ixxuwwa ifiisukko. Ee umbu'l woriinsim «An iittoommi i Beet kane; ixxeensi macceessehe!» yoo sagar macceesamukko.

⁸Ixxuwwim ee ammanem qerephita'a moo'llo'o. Ihukkaarem xale'i Yesuusiinsi bagaan matom moo'llo'oyyo.

⁹Ee duuniinsim dillitu'uuyyi Yesuus ixxuwwina Manchi Beet lehiinsi ki'eebe'e moo'llakko'oka ayyenam kuttakkambee'isa yaa ijaajukko.

¹⁰Ixxuwwim Yesuus kuru sagara ixxuwwi ixxuwwi wodanonne amaddo'o. Ihukkaarem ixxuwwina'i ixxuwwim «Ku lehiinsi ki'imma yimmi mayyimma?» yaqqanto'o.

¹¹ Ixxuwwim Yesuusina «Seera losisaan ‹Gaassaa Eeliyaas waarimmi hasisookko› yitamok mahinatte?» yita'a xa'mmito'o.

¹²Ixxim ixxuwwina «Hanqo'isam Eeliyaas gaassaa waaraa hundem luwwam gudisookko. Ihona bagaan Manchi Beet lobakata hawwoo'isaa gadamoo'isaa ixxi bikkina kitaabamukkok mahinatte?

¹³An ki'nnuwwina kuroommo; Eeliyaas waaraakko. Keesammi Kitaabanne ixxi bikkina kitaabamukkisam ixxo hasso'isa hundam issito'ookko» yukko.

¹⁴Yesuusii sasem losaanii daba'llita'a losaa'n beyyo waatto'i ammanenne ee losaa'n kululleetanne dut manna moo'llo'o. Seera losisaanim ixxuwwinne fitantam hee'llo'o.

¹⁵Oo mannim Yesuusa moo'llo'i ammanenne muggito'o; ixxi beyyom geetta'a matta'a xummaatisso'o.

¹⁶Yesuusim ixxi losaanina «Ixxuwwinne fitantakkamuullak mahannette?» yukko.

¹⁷Ee manniinsim mat manchi Yesuusina «Losisaancho! I beeto habus suume duussaa amadu bikkina ki beyyo eebaammo.

¹⁸Oo xissi ki'oo ammane hannonnem ubbuusaa suuminne himba eebookko. Ixxi inqem iicookko. Orachchim haqqisa gogookko. Ki losaan eekka fissitona xa'mmummaare fissiteena xanto'oyyo» yukko.

¹⁹Yesuusim ixxuwwina «Ki'nnuwwi amma'nnatbee'i qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebe'e an ki'nnuwwa iyyaqqoommo? Huno'o, beetooma i beyyo eebbehe» yukko.

²⁰Ixxuwwim beeto ixxi beyyo eebbo'o. Habusim Yesuusa moo'u ammanenne beeto fitfitaa'ukko. Beetim uullanne ubaa suuminne himba eebukkuuyyi biqqiiqqukko.

²¹Yesuusim ee beet annina «Kuk ka beeto amadukkaanniinsi hinkaa'n ammane» yaa xa'mmukko. Annim «Ciiloommanonnetteme.

²²Dut ammane sheena hasaa giirannee wo'onnee ubbuusookko. Ihukkaarem at xantilas niina qishixxitaa hara'mme» yaa dabarukko.

²³Yesuusim ixxena « ‹Xantilas› yitoollannihe? Amma'nnoohaannina hundem luwwim xanamookko» yukko.

²⁴Ee ammanem beet anni «Amma'nnoommo, i amma'nnaxxi hoonge at iinniinsi hoore!» yaa laarukko.

²⁵Yesuusim manni gafe'amukkuuyyi waaroo moo'u ammanenne habusina «Ka duudissaa gawwissoo habusa! Ka beeto fatakitoo'isinaa od la'mmaagge ixxonne daba'llitaa aaggoobee'isinaa keese ijaajoommuulla!» yaa shaaqukko.

²⁶Habusim laaraa beeto lobakata fitfitaa'aa lasage firukko. Beet tuude'aa hee'u bikkina dut keen «Lehaakko» yitam hee'llo'o.

²⁷Ihukkaarem beetika anga amadaa Yesuus uullisukko. Ixxim ki'aa uullukko.

²⁸Yesuusim mine aagu ammanenne ixxi losaan «Neese ka habusa fissineena xannumbee'ek mahinatte?» yita'a mulli manni macceesoobee'isa xa'mmito'o.

²⁹Ixxim ixxuwwina «Kido'i habusa fissakkamok soommanakka'a Waa'a uunximminnette bagaan mullisinne ma'isinnem fissakkamoyyo» yaa dabarukko.

³⁰Yesuusii ixxi losaanii ee beyyiinsi ki'lla'a Galiilinne higga'a matto'o. Yesuusim xale'i ixxi losaano losisam hee'u bikkina ixxuwwi yo'i beyyo ayyim la'ona hasukkoyyo. Ixxi losaaninam «Manchi Beeto manni anganne higisakka'a uwwakkamo. Ixxuwwim ixxo shitamo. Ihukkaarem sas balliinsi lasage lehiinsi ki'ookko» yukko.

³¹

³²Ihona bagaan Yesuus yukkoka ixxuwwi qoossito'oyyo. Xa'mmiteenam baddito'o.

³³Yesuusii ixxi losaanii Qifirinnaahooma affo'o. Affa'a mine aagga'a lasage Yesuus ixxuwwina «Googonne fitantakkam hee'llakko'ok maruchchonnette?» yaa xa'mmukko.

³⁴ Googonne «Ni lambe'iinsi lophphookkok ayyette?» yitu'uuyyi fitanta'a hee'llo'i bikkina ixxena maham dabatto'oyyo.

³⁵ Yesuus afuuraa lasage tommoo lamem losaanoo weeshaa «Hundiinsim lophpheena hasookkok ayyim ixxi gaga hoffiisaa hundinam awwaadoohan ihimmi hasisookko» yukko.

³⁶Odim mat ciilichcho ixxuwwi lambe'enne uullisaa qaaphphaa

³⁷ «Kido'i ciilluwwiinsi mato i summinne aa'ookkok ayyim eesem aa'aakko. Eese aa'ookkok hundim aa'ookkok eesette ihoo'n eese asse'ukkaneme» yukko.

³⁸Yohaannisim Yesuusina «Losisaancho! Mat manchi ki summinne habusa fissukkuuyyi moo'nnaa niinninne keese awwonoobee'i bikkinam hoollummo» yukko.

³⁹ Ihukkaarem Yesuus ixxuwwina «Neese saboobee'ek ayyim niinninnette. I summinne aganna baxukkuuyyi i bikkina jora woceena gaaggaabookkok bee'e. Ee bikkina hoottakkotte.

⁴⁰

⁴¹ Hanqinam an ki'nnuwwina kuroommo; Kiristoosan ikkakko'i bikkina i summinne mat kubbaayyi wo'o aggakkona uwwookkok ayyim irifo'o siixxookko» yukko.

⁴²Odim Yesuus «Eesenne amma'nnita'a gaga hoffiissam keeniinsi mato huushansookkok ayyim ixxi gaanjenne kee'mmaalli liitimma ka'llaa dambalaqanne ubuta'n e'llookko.

⁴³ Ee bikkina at baaxiilo baxxona ki angi keese huushisoohan ihulas muttaa uunje. Lam angi hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat anga murammi ikkaa heer heerina hee'oo heechcha siixximmi e'llookko.[7]

⁴⁴

⁴⁵Ki lokkim at baaxiilo baxxona keese huushisoohan ihulas muttaa uunje. Lam lokki hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat lokko dim ikkaa heer heerina hee'oo heechcha siixximmi e'llookko.

⁴⁶

⁴⁷ Ki illim at baaxiilo baxxona keese huushisoohan ihulas fissitaa uunje. Lam illi hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat ille hooggaa Waa'i adillanonne hee'immi e'llookko.

⁴⁸ Gaannamanne ixxuwwa itoo daquur hore'em lehoobee'ane. Aphphoo giirim hore'em xoo'oobee'ane.

⁴⁹Kitim hundim sooqidinne muccuroo'isam ayyi manchim giirinne muccurookko.

⁵⁰ Sooqid xee'oohane. Ihukkaarem sooqixxek xee'n bi'uta'n hinkid issitakka'a xee'oo'isa issitakkamo? Ki'nnuwwi lambe'enne sooqixxisa xee'oo iitti hee'ona. Ki'nnuwwina'i ki'nnuwwim iittinne hee'llehe» yukko.