Read Hadiyya Luqaas Mishiraachcha 1 Bible Online

Luqaas Mishiraachcha 1 - Hadiyya bible

Luqaas Mishiraachcha 1

¹Lophphitaattoo Teewoofiloosa, ni lambe'enne ihu woshsha kanniinsi illageen lobakat keen kitaabbo'ookko.

²Ixxuwwi kitaabbo'okim luxxaanniinsi ki'issa'a illinne moo'llo'i keenii mishiraachchi sagara alallaattam hee'llo'i keenii niina afisso'i woshsha.

³Ee'isam anim luxxaanniinsi ki'isaa hundem luwwam danaamisa saarayyaa moo'aa lasage woshshooma kiina ogorinne kitaabimmi danaam ihaa iina moo'amaakko.

⁴An eekka kitaaboommok at lossitti woshshika hanqa qoossitaa laqqoo'isinatte.

⁵ Heeroodais Yihuxxi uullina adil hee'u doollenne Abiya'i qeessooma'n baxxanchiinsetti ihoo Zakkaaryaasa yakkam qeessichchi hee'ukko. Ixxi mi'n ama Eelsaabeexem Aaroon moollitan hee'llo'o.

⁶Lamim Waa'i ijaajo hundam egerimminne Waa'i illagenne miiqakkam luwwi bee'i muccur keen hee'llo'o.

⁷Ihukkaarem Eelsaabeexe alceennatte hee'llo'i bikkina ixxuwwina oos hee'ukkoyyo. Ixxuwwim lomma'nnamaa hee'amukko.

⁸Mat ayyaamo ixxi baxxanchina tar afukkaare Zakkaaryaas Waa'i illagenne qeessoo'm baxo baxam hee'ukko.

⁹Qeessuwwi eraare issitam losa'nnisam Zakkaaryaasim Keesammi Mine aagaa aduruusa wiriissoo'isina saam ixxena afukko.

¹⁰Zakkaaryaas aduruusa wiriissam hee'u ammane minaadab hundim miniinsi biireen Waa'a uunxonam

¹¹Waa'i asse'amaanchi aduruusa wiriissimmina worqiinsi baxamu mu'uxxi makki kollonne uullaa Zakkaaryaasina moo'amukko.

¹²Ixxim ee asse'amaancho moo'u ammanenne muggaa lobakata baddukko.

¹³Ihukkaarem oo Waa'i asse'amaanchi «Zakkaaryaasa, baddititte! Ki uunxato Waa'i macceesu bikkina ki are Eelsaabeexe goonchi beeto qattamo. Ixxekam summa Yohaannisa yitaa weeshshootto.

¹⁴Atim lobakata liirantootto. Dut keenim ixxi qaranchanne liiramookko.

¹⁵ Oo beetim Waa'i illagenne loban ihookko. Ixxim woyi'n diqaasaa mulli dimbisoo aggaa agooyyo. Ixxi am godabonne hee'ukkuuyyim Keesammi Ayyaaninne wo'mmaakkoohan ihookko.

¹⁶Lobakat Isra'ee'l oosom ixxuwwina Moollanni ihu Waa'i kollonne dabarookko.

¹⁷ Anno'i tiiro oosaannonne dabareena, ijaajamoobee'i keenom ijaajamoo kee'n tiironne dabareenaa ee'isinne gudu minaadaba Moollannina gudiseenaa Waa'i Eeliyaasina uwwu malaayyinnee Keesammi Ayyaaninnee Moollanni illagenne marookko» yukko.

¹⁸Zakkaaryaasim Waa'i asse'amaanchina «Anii i mi'n amaa lomma'nninummi bikkina ku woshshi hinkid iheena xanookko?» yukko.

¹⁹ Waa'i asse'amaanchim dabaraa «An ka mishiraachcha kiina kuroommisina asse'amaammo; an Waa'i illagenne uulloommi Gabri'eelatte.

²⁰Amman afoohaare wo'mmoo woshsha an kurummaare at amma'nnitbee'i bikkina ku woshshi iheebe'e woccaa xantoobee'isina ki suum duudookko» yukko.

²¹Keesammi Minenne Zakkaaryaas dasu bikkina biiranne egeraa hee'u manni maalalukko.

²²Ixxim firu ammanenne ixxuwwinne woceena xanubee'i bikkina angi mare'inne moo'isukkaare Keesammi Minenne mat luwwa kaaltanne moo'ukkisa laqqo'o. Duud ihaatem hee'ukko.

²³Zakkaaryaasim awwaadoo amman beeddaa lasage mine elle'ukko.

²⁴Hofqax ammaniinsi lasage ixxi are Eelsaabeexe lamfoorette ikko'o. Eelsaabeexem «Kaba i Moollanni eese tiiru ammanenne manni eese gadu gado'o iinniinsi hooreena kaka iina issaakko» yita'a onti agana maaxanto'o.

²⁵

²⁶Eelsaabeexe lamfoorette ikko'i loh aganina Waa'i asse'amaanchi Gabri'eel Galiilanne yoo Naazireexxi beero'o Waa'i beyyiinsi asse'amukko.

²⁷ Ixxim asse'amukkok Daawiit moolliinsi qaramaakkoo Yooseefa yakkam manchina xeehanto'oo baajaam landichchi beyyi hee'ukko. Ee landichchokim summi Maaraamette.

²⁸Waa'i asse'amaanchim is beyyo waaraa «Taa xummattennihe? Waa'i kiinninnette. At Waa'i maasse'aakkookkotane» yukko.

²⁹Ihukkaarem Maaraame ixxi wocu woshshanne lobakata muggita'a «Ku hinkido'i xummaato?» yita'a is wodanonne sawwito'o.

³⁰Waa'i asse'amaanchim Maaraamena «Waa'i keese iittoo bikkina baddititte!

³¹ At lamfoorette ikkaa goonchi beeto qattootto. Ixxi summam Yesuusa yitootto.

³² Ixxim loban ihaa hundam xanoo Waa'i Beeto yamamaa weeshamookko. Moollanni Waa'im ixxena anni Daawiitika adilla'n barcuma uwwookko.

³³Ixxim Yaaqoob shumo'onne heer heerinam adil ihookko. Ixxi adillaninam tungi bee'ane» yukko.

³⁴Maaraamem Waa'i asse'amaanchina «An baajaamotte ihummi bikkina ku woshshi hinkid iheena xanookko?» yito'o.

³⁵Waa'i asse'amaanchim isena dabaraa «Keesammi Ayyaan keesenne dillookko. Waa'i malaayyim keesenne usheexxoo bikkina oo qaramoo keesammi beet Waa'i Beeto yamamookko.

³⁶Oono'o, ki qarmancho Eelsaabeexem alceennatte yakku'uuyyi hee'lla'a kaba lommannanonne lamfoorette ikko'aanniinsi kuk loh agana.

³⁷ Mashka'oomim Waa'a kaa'oo luwwi mahim bee'e» yukko.

³⁸Odim Maaraame dabatta'a «Oono'o, an Waa'ina awwaadaanchotte; at yittisam ihona» yito'o. Waa'i asse'amaanchim iseensi annanni ihukko.

³⁹Hofqax ammaniinsi lasage Maaraame Eelsaabeexe moo'lleena duunaam Yihuxxi uullanne yoo beero'o qaqqissa'a matto'o.

⁴⁰Maaraamem Zakkaaryaas mine aagga'a Eelsaabeexe xummaatisso'o.

⁴¹Maaraame Eelsaabeexe xummaatisso'i ammanenne Eelsaabeex godabonne ciilichchi xophukko. Eelsaabeexennem Keesammi Ayyaan dillukkaare

⁴²sagara iimaa'lla'a «At meenti lambe'enne maasse'antaattookkotane; kiinniinsi qaramoo ciilim maasse'amaakkoohane!

⁴³I Moollannina ama at eese moo'lleena waarimmi hinkid labookko?

⁴⁴Mashka'oomim at eese xummaatissitti ammanenne i godabonne ciilichchi liiranchinne xophukko.

⁴⁵Moollanni kiina wocu woshshi wo'mmoohan ihukkisa amma'nnitti bikkina maasse'antaattookkotane» yita'a wocco'o.

⁴⁶ Maaraamem «Waa'i eese gadamaammoo awwaadaancho moo'u bikkina Moollanna lonsoommo. Eese Gatisaanchi Waa'annem liiramoommo. Malaayyaam Waa'i iina lobakat luwwa issu bikkina kaballiinsi ki'isaa qaranchi hundim eese ‹Maasse'antaattookkotane› yookko. Summim ixxek keesamma.

⁴⁷

⁴⁸

⁴⁹

⁵⁰Ixxo lonsitam keenina qaranchiinsi qaranchanne afeebe'em qishixxookko.

⁵¹Ixxi wodinnem malaayyaam baxo baxookko. Bolxitam keenom ixxuwwi sawwitinnem binnaa'ookko.

⁵² Malaayyaam adilluwwam ixxuwwi adilla'n barcumiinsi dilliisaakko. Woroon yoo keenom iimiimaa'aakko.

⁵³Sibaatto'i keeno er luwwinne goddisaakko. Ihukkaarem goddaan keeno kora'i angam mattamisa issaakko.

⁵⁴Waa'i niyyanno'ina Abrihaaminaa Abrihaam shumo'inaa wocukkisam doolli hundinam qishixxukkuuyyi ixxena awwaadaanchi Isra'ee'l minaadabina hara'mmaakko» yito'o.

⁵⁵

⁵⁶Maaraame Eelsaabeexenne maqire sas agana afuutta'a lasage is mine daba'llita'a matto'o.

⁵⁷Eelsaabeexe qattam amman afukkaare goonchi beeto qatto'o.

⁵⁸Is olla'ii qarmannii moollanni isena lobakata qishixxukkisa macceessa'a hundim isenne maqire liiranto'o.

⁵⁹ Ciilichchi qaramu sadeenti ayyaamonnem ballachchisseena waatto'o. Ixxuwwim ee ciilichchika summa anni summanne Zakkaaryaasa yita'a fissiteena hassa'a hee'llo'o.

⁶⁰Ihukkaarem ciilichchi ama dabatta'a «Ihooyyo! Ixxek summi Yohaannisatte yamamona» yito'o.

⁶¹Ixxuwwim Eelsaabeexena «Ki'nnuwwi qarmanniinsi ka summanne weeshamukkok matim bee'e» yito'o.

⁶²Ixxuwwim ixxi annina «Ki beetika summa ayyee yitaa fissimma iittitootto?» yita'a mare'inne xa'mmito'o.

⁶³Zakkaaryaasim kitaabaa kuroo luwwa xa'mmaa «Ixxi summi Yohaannisatte» yaa kitaabukkaare hundim maalalto'o.

⁶⁴Ee ammanchom ixxek suum fooqukko. Allabim tiramukko. Ixxim Waa'a galaxxukkuuyyi wocimma asheerukkaare

⁶⁵olla'i manni hundim baddito'o. Oo woshshim duunaam Yihuxxi uullanne hundannem afukko.

⁶⁶Ee ciilichchinne maqirem Waa'ik malaayyi hee'u bikkina ee woshsha macceesso'i manni hundim «Ku ciilichchi hinkido'an iheenatte?» yita'a ixxuwwi wodanonne sawwito'o.

⁶⁷Ee ciilichchi anni Zakkaaryaasanne Keesammi Ayyaan dillukkaare hiraago wocukkuuyyi

⁶⁸«Ixxi minaadaba hara'mmeena waaru bikkinaa gatisu bikkinaa Isra'ee'l Moollanni Waa'i galaxxamaakkoohan ihona.

⁶⁹Ixxi doo'llu hiraagaa'n kollinne ihaa lobakat doolliinsi illageen wocukkisam neese ni diina'iinsii neese sabbam keen hundiinsii gatisoo'isina ixxena awwaadaanchi Daawiit shumo'iinsi malaayyaam Gatisaancho niina ki'isaakko.

⁷⁰

⁷¹

⁷²Ixxo ki'isukkokim niyyanno'ina ‹Qishixxoommo› yaa wocukkokaa niyyanni Abrihaamina hide'u keesamaakkoo ixxi hidiroo tiiraatette.

⁷³

⁷⁴Ixxi aagu hidirim neese diina'i angiinsi wolabbanonne fillaa baddinoo'n ixxena awwaandoommisinatte.

⁷⁵Ee'isam ni heechchi doollenne hundannem Waa'i illagenne miiqakkam luwwi bee'i mucculluwwi inkaa hee'nnoommisinatte.

⁷⁶ Kaa i beeto, at Moollannina googo gudisseena ixxi illagenne higgaa mattoo bikkina at ‹Hundam xanoo Waa'i hiraagaancho› yamantootto.

⁷⁷Waa'i ixxuwwi baaxiilo haafaa gatisoo'isa ixxi minaadabina la'issootto.

⁷⁸Oohim iheena xanookkok Waa'i kollinne niina eelliinchisa firookkok waaroo ammane Niyyanni Waa'i biijoominnee qishixxatinnettee.

⁷⁹ Ixxim tuunsonnee leh haf woronnee yo'i keenina caakka caakkisookko. Neesem xummi googonne awwonsookko» yukko.

⁸⁰Ciilichchim uullichchaa tiiroo li'ukko. Ixxim Isra'ee'l minaadabina ixxi baxinne la'amoo balli afeebe'e udma'i uullanne hee'ukko.