Read Hadiyya Luqaas Mishiraachcha 10 Bible Online

Luqaas Mishiraachcha 10 - Hadiyya bible

Luqaas Mishiraachcha 10

¹Ee lasage Moollanni Yesuus mulli keenom lamarayyee lam[15] manna doo'llukko. Ixxuwwam lam lam issaa ixxi maroo beyyoo beero'uwwaa hundam ixxeensi higga'a mattona asse'ukko.

² Ixxim ixxuwwina «Murakkam hurbaat lobakata. Ihukkaarem muroo keen hoffane. Ee bikkina hurbaaxxi annichchi baxaano hurbaaxxi muratina asse'oo'isina uunxehe.

³ Mallehe; an ki'nnuwwa oro'i lambe'enne gereebbisa issaa asse'oommo.

⁴ Ki'nnuwwim gonoon ihukko te'im can ihukko te'im caamma'i ihukko amaddakkotte. Ayyem googonne xummaatissakkotte.

⁵Ayyi minem aaggakkam ammane gaassitakka'a ‹Xummi ka minina ihona› yi'llehe.

⁶Ee beyyonne xumma iittoo manchi hee'ulas ki'nnuwwi xummi ixxonne usheexxookko. Xumma iittoo manchimdu ee beyyonne bee'ulas oo xummi ki'nnuwwinam daba'llookko.

⁷ Baxaanchina diinat hasisoo bikkina ee minenne ki'nnuwwina uwwakko'i luwwa ittakku'uuyyii aggakku'uuyyii afuullehe bagaan miniinsi mine mattakkotte.

⁸Ayyi beero'om aaggakkam ammane ki'nnuwwa aa'akkolas hincu luwwa ittehe.

⁹Ee beero'onne yoo jabbaanom fayyiissehe. Ee beero'i manninam ‹Waa'i adillan hincaakko› yi'llehe.

¹⁰ Ihukkaarem ayyi ammanem mat beero'o aaggakkam ammane ki'nnuwwamdu aa'akkobeelas ee beero'i bobba'anne fittakka'a

¹¹‹Ki'nnuwwi beero'iinsi ni lokkonne amaxxamu dira ki'nnuwwina xuur ihona giggissinaammo. Ihukkaarem Waa'i adillan hincukkisa qoossitakka'a laqqehe› yi'llehe.

¹² An ki'nnuwwina kuroommo; Waa'i oogatoo ayyaamo ee beero'iinsi Soddo'm beero'ina sholle'ookko» yukko.

¹³ «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchchanne afuutta'a gaassim baaxiilo biiraa yitam hee'llo'o.

¹⁴Ee bikkina Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko.

¹⁵ Qifirinnaahooma, at iimane affaattoollayyonnihe? Si'oolanne dillitootto» yukko.

¹⁶ Odim Yesuus ixxi losaanina «Ki'nnuwwi woshsha macceesookkok iikkam macceesookko. Ki'nnuwwa sabookkok eesem sabaakkoohane. Eese sabookkokim eese asse'ukkoka sabaakkoohane» yukko.

¹⁷Lamarayyii lamem losaanim «Moollanna! Habusim ki summinne niina kaa'amaakko» yitu'uuyyi liiranchinne daba'llito'o.

¹⁸Yesuusim ixxuwwina dabaraa «Sheexaan iimaniinsi banqisa ubukkuuyyi moo'aammo.

¹⁹ Oono'o! Hamashshaa ginxa yakkam daquuraa hancaaccakkona malaayye uwwaammo. Odim ki'nnuwwi diina'i hundam kaa'llakkamisina malaayye uwwaammo. Mahim ki'nnuwwa hawwodooyyo.

²⁰Ihona bagaan habus ki'nnuwwina kaa'amu bikkina liirantakkotte. Ihukkaarem ki'nnuwwik summi iimanenne kitaabamu bikkina liirammehe» yukko.

²¹Ee ammanchom Yesuus Keesammi Ayyaaninne liiramaa «Iimaninaa uullinaa Moollanni Iyyanna! Kaka lachchaammuwwiinsii qoolluwwiinsii daphphaa'llaa ciilluwwina caakkissittaannina keese galaxxoommo. Eeyya Iyyanna, kuk ki doo'lla.

²² Hundi luwwam Iyyanni iina uwwookko. Beet ayyetda'e ihukkisa iinniinsi bagaan ayyim la'ooyyo. Te'im Annam ayyetda'e ihukkisa Beetiinsii Beet la'iseena doo'llukkaanniinsii bagaan la'ookkok ayyim bee'e» yukko.

²³Ee lasage Yesuus ixxi losaa'n kollonne daba'llaa xale'i ixxuwwina «Ki'nnuwwi moo'llakkamoka moo'ookkok maasse'amaakkoohane.

²⁴An ki'nnuwwina kuroommo; hiraagaa'nnek dutii adilluwwii ki'nnuwwi moo'llakko'oka moo'lleena mixxo'o; ihukkaarem moo'llo'oyyo. Ki'nnuwwi macceessakkamokam macceesseena mixxo'o; ihukkaarem macceesso'oyyo» yukko.

²⁵ Seera erisa la'oo mat manchi Yesuusa keeneena «Losisaancho, heer heerina hee'oo heechcha siixxeena maha isso?» yaa xa'mmukko.

²⁶Yesuusim ixxena dabaraa «Seeranne kitaabamukkok maruwwa? Qananaa'llaa qoossittodu hinkidette?» yukko.

²⁷ Oo manchim dabaraa « ‹Ki Moollanni Waa'a wo'm wodaninne, wo'm foorinne, wo'm malaayyinnee wo'm tiirinnee iitte. Odim ki beshichcho ki gaqqisa iitte› yoohane» yukko.

²⁸ Yesuusim dabaraa «Danaamisa dabattaatto; heer heerina hee'lleena eekka isse» yukko.

²⁹Ihukkaarem oo Seera la'oo manchi ixxi gaga eran issaqqeena hasu bikkina «I ollakkichchi ayyette?» yukko.

³⁰Yesuusim dabaraa «Mat ayyaamo mat manchi Yerusaaleemiinsi Iyyaarko'i beero'o dillukkuuyyim fanguwwi ixxo amadda'a bogga'atii aphphissa'atii lehinaa heechchinaa lambe'enne ubbuussa'a matto'o.

³¹Eehid ihaakkoohaannonne mat qeessichchi ee googinne dillukkuuyyi oo manchi ubukkisa moo'u ammanenne shiininne uraa higukko.

³²Ee'isam odim Leewi'i moollik mat manchi ee beyyo waaraa eekka moo'u ammanenne shiininne uraa higukko.

³³ Ihukkaarem mat Samaarekkichchi ee googinne marukkuuyyim oo manchi ubu beyyo afaa ixxo moo'u ammanenne qishixxukko.

³⁴Ixxim ee manchi beyyo maraa madanne zaytaa woyi'n diqaasaa issaa karukko. Ee lasage ixxi hallichchonne saa'llisaa koyyi garoo mine massaa jabbisukko.

³⁵Oo Samaarekkichchim la'm balla ee koyyi mi'n annichchina lam diinaara fissaa uwwaa ‹Ka mancho jabbise. At kannonne eddaa ixxena fissitti luwwi hundam daba'llaa waaroommi ammane an kiina miqoommo› yukko.

³⁶Fanguwwi anganne ubu manchina ee sasem manchiinsim ollakkichchi ihukkisa moo'isukkok kiina hinka labookko?» yukko.

³⁷Ixxim dabaraa «Ixxena qishixxato moo'isu mancho» yukko. Yesuusim ixxena «Atim mattaa ee'isa isse» yukko.

³⁸ Ixxuwwi mattu'uuyyim Yesuus mat gatte aagukko. Ee gattennem Maarta'a yakkam meentichcho is minenne ixxo aa'llo'o.

³⁹Isenam Maaraame yakkam aayya hee'llo'o. Isem Moollanni lokki gadanonne afuutta'a losisoo losishsha macceessam hee'llo'o.

⁴⁰Ihukkaarem Maarta'a lobakat baxinne matayyitam hee'llo'i bikkina ixxi beyyo matta'a «Moollanna! An mullam hawwona iyyaayya cawwita'a utto'is kiina kichche'isooyyonnihe? Kabadem ise iina hara'mmitona kure» yito'o.

⁴¹Ihukkaarem Moollanni isena dabaraa «Maartaa! Maartaa! At lobakat luwwina hawwitoollaa u'nnantoollaa.

⁴²Ihukkaarem hasisookkok mat luchcho[16]. Maaraame isena e'llookkoka doo'llito'ookko. Oohim iseensi hooramooyyo» yukko.