Read Hadiyya Luqaas Mishiraachcha 11 Bible Online

Luqaas Mishiraachcha 11 - Hadiyya bible

Luqaas Mishiraachcha 11

¹Mat ayyaamo Yesuus mat beyyonne Waa'a uunxam hee'ukko. Waa'a uunximma guullu ammanenne ixxi losaaniinsi mat «Moollanna! Yohaannis ixxi losaanina Waa'a uunxato losisukkisam atim neese losise» yukko.

²Ixxim ixxuwwina dabaraa «Waa'a uunxitakkam ammane ‹Niyyanna! Ki summi keesamaakkoohan ihona. Ki adillan waarona.

³Ballina ballina hasisoo hurbaata niina uwwe.

⁴Neese hawwodu keenina hundinam neese haafinoommisam ni baaxiilom haafihe. Keenanchanne aagissitte› yitakka'a uunxehe[17]» yukko.

⁵Odim Yesuus ixxuwwina «Kobi'llishshina ki'nnuwwiinsi matina beshichchi yookko. Baqitennem ee ixxi beshichchi beyyo maraa ‹Iyyabbaayyo, mat koyyiinchi googiinsi waarukkaare uwwoommi luwwi bee'u bikkina sas injeera liqaayyise› yaa xa'mmuta'n

⁶

⁷oo ixxi beshichchi mi'n worinne ihaa ‹Eese hawwissitte! U'llummi xufamaakko; i oosim iinninne ara'anne iinse'aakko. An ki'aa maham uwweena xanoommoyyo› yuta'n

⁸oo manchi ixxena beshichchi ihu bikkina ki'aa uwweena hasubee'aarem hawwisu bikkina hasu luwwi hundam ki'aa uwwookko.

⁹«Odim an ki'nnuwwina kuroommo; xa'mmehe, ki'nnuwwina uwwamookko. Hassehe, siidamookko. U'llummanne uullitakka'a weeshshehe, ki'nnuwwina fooqookko.

¹⁰Mashka'oomim xa'mmukkaannina ayyenam uwwamookko. Hasookkokim siixxookko. U'llummanne uullaa weeshoohaanninam fooqookko.

¹¹Ki'nnuwwi lambe'iinsi ixxi beet qurxumme'e xa'mmukkaare qurxumme'i bikkenne hamashsha uwwookkok te'im[18]

¹²quunqa xa'mmukkaare ginxa yakkam daquura uwwookkok ayyette?

¹³Eehaara'i ki'nnuwwi jor keen ikkakko'isam ki'nnuwwi oosina er luwwa uwwimma laqqakkolas iimanenne yoo Waa'i ixxo uunxoo keenina Keesammi Ayyaana eehanniinsi lobakata lonsaa uwwooyyonnihe?» yukko.

¹⁴Mat ayyaamo Yesuus mat manchiinsi suume duussaa amadaakkoo habusichcho fissam hee'ukko. Habusichchim firu ammanenne oo suume duudaa hee'u manchi wocimma asheerukkaare manni maalalukko.

¹⁵ Ihukkaarem manniinsi mat mat keen «Ixxi habusa fissookkok habus adil Bi'eelzeebul uwwu malaayyinnette» yito'o.

¹⁶ Odim mulli keenim ixxo keenteena Waa'i beyyiinsi maalalsiisoo mare'e moo'isoo'isina hassam hee'llo'o.

¹⁷Ihukkaarem Yesuus ixxuwwi woda'nneka la'aa «Mat adil gassoo uulli manni ixxuwwina'i ixxuwwim orantaman ihulas oo adillan bi'ookko. Ee'isam ixxina'i ixxim annanni ihoo abaroosim ubookko.

¹⁸Ki'nnuwwi eese ‹Ixxi habusa fissookkok habus adil Bi'eelzeebul uwwu malaayyinnette› yitakkolas Sheexaan gassoo habus issena'i issem orantaman ihulas Sheexaa'n adillan hinkid qoxxaa uulleena xanookko?

¹⁹Bi'eelzeebul uwwu malaayyinne an habusa fissoomman ihulas ki'nnuwwi awwonaan ayyi malaayyinne fissitamo? Ee bikkina ki'nnuwwi huushanchanne ixxuwwi oogattamo.

²⁰Ihukkaarem an habusa fissoommok Waa'i malaayyinnette ihu bikkina Waa'i adillan ki'nnuwwi beyyo waaraakko.

²¹«Mat malaayyaam manchi o'l mu'uta amadaa ixxi mine egerulas ixxi mu'ut nakkamooyyo.

²²Ihukkaarem ixxeensi lophphoo mulli qoxar ixxenne oramaa kaa'ulas ixxi amma'nnaa hee'u o'l mu'uta hundam ixxeensi hooraa massookko. Ee lasage ixxeensi bogaa massu luwwa baxxansookko.

²³ Iinninne mateeyyoom bee'ek iinninne uullixxamookko. Iinninne wixxaa'oobee'ekim binnaa'ookko[19].

²⁴«Jor ayyaan mat manchiinsi firoo ammane usheexxoo beyyo hasukkuuyyi wobee'i udma'anne kululookko. Usheexxoo beyyomdu siidubeelas ‹Firaa waarummi i mi'n beyyom daba'llaa maroommo› yookko.

²⁵Daba'llaa maroo ammane oo ixxi firu min fii'amaa gudaakkookkoka siidookko.

²⁶Ee lasage maraa ixxeensi baassam jor ayyaannuwwika lamara amadaa waarookko. Ixxuwwim aagga'a eekke'e hee'llamo. Ee manchik duuha'i eraa'llaanniinsi lasaqqek lobakata jorookko» yukko.

²⁷Yesuus eekka wocukkisam ee minaadaphphi lambe'iinsi mat meentichcho sagara iimaa'lla'a «Keese qaru godabii iiccitti anuunii maasse'amaakkoohane» yito'o.

²⁸Ihukkaarem Yesuus dabaraa «Maasse'anto'i keena'i Waa'i sagara macceessa'a egettam keeno» yukko.

²⁹ Minaadab exxukkuuyyi maru ammanenne Yesuus «Ka doolli manni jor manna. Ixxuwwi maalalsiisoo mare'e moo'lleena hassam keeno. Ihukkaarem hiraagaanchi Yoonaasanne ihu mare'iinsi bagaan mulli mare'i ixxuwwina uwwamooyyo.

³⁰ Naanaawe'i mannina Yoonaas mare'i ihukkisam Manchi Beetim ka doolli mannina mare'i ihookko.

³¹ Woroo'n qarinne yoo uullina adil hee'llo'i Saaba'am Salamoonika qoorooma moo'lleena uulli tochchiinsi waatto'i bikkina Waa'i oogatoo ayyaamo ka doolli manninne maqirem ki'lla'a ka doolli mannanne oogattamo. Ihukkaarem Salamooniinsi lophphookkok ka beyyonne yookko.

³² Ee'isam odim Naanaawe'i uulli manni Yoonaas kuru woshsha macceessa'a baaxiilo biiraa yita'a daba'llito'i bikkina Waa'i oogatoo ayyaamo ka doolli manninne maqirem ki'lla'a ka doolli mannanne oogattamo. Ihukkaarem Yoonaasiinsi lophphookkok ka beyyonne yookko.

³³ «Ayyim caakka caakkisaa lasage daphphit beyyonne te'im sanfi woronne dissooyyo. Ihukkaarem aagu manni caakka moo'oo'isina qoffit beyyonne dissookko.

³⁴Ki'nnuwwik illi ki'nnuwwi orachchina caakka. Ki'nnuwwik illi fayya'i ihoo ammane ki'nnuwwi orachchi hundim caakka. Ihukkaarem ki'nnuwwik illi fayya'i ihubee'i ammane ki'nnuwwi orachchi hundim tuunsaakkoohane.

³⁵Ee bikkina keesenne yoo caakki tuunsoobee'isa ege'lle.

³⁶Ki orachchonne tuunsi mat beyyonnem hee'oobee'isa hundem beyyim caakkaakkoohan ihulas ki orachchi hundim danaamisa caakkisoo caakkisa caakkaakkoohan ihookko» yukko.

³⁷Yesuus wocaa gullukkisam mat Farisaawekkichchi ixxi minenne balli hurbaata itoo'isina xa'mmukko. Ee bikkina ee Farisaawekkichchi mine maraa maaddanne afuurukko.

³⁸Balli hurbaata iteena Yesuus gaassaa anga aanshaqqubee'isa moo'u ammanenne oo Farisaawekkichchi maalalukko.

³⁹Moollannim ixxena dabaraa «Ki'nnuwwi Farisaawe'uwwi humbullikaa made'ikaa hane aanshitakkamo. Ihukkaarem ki'nnuwwi woronne bogimmii jollii wo'mmaakkoo keeno.

⁴⁰Ki'nnuwwi ka qawwuwwa! Hane qooccu Waa'i woro qooccukkoyyonnihe?

⁴¹Ihukkaarem woronne yookkoka buxina uwwehe; hundem luwwim ki'nnuwwina muccur ihookko.

⁴² «Ihukkaarem ki'nnuwwina Farisaawe'uwwina aayye! Ki'nnuwwi kosaratiinsi, qantalaamiinsii duubbi enji hundiinsii tommiinsi mato Waa'ina uwwitakkamo. Ihukkaarem hanqaa Waa'i iittimmaa uttakko'ookko. Ee keeno uttakkota'nnim mulli keenom issimmi hasisam hee'ukko.

⁴³Ki'nnuwwi Farisaawe'uwwa, wixxixxi minneewwanne hundiinsi e'lloo beyyonne afuuchchaa meerannem manni ki'nnuwwa xummaatisonaa iittitakkam bikkina aayye!

⁴⁴Odim manni la'oo'n haninne taakke'oo mare'i bee'i waamma labbakkam keen ikkakko'i bikkina aayye!» yukko.

⁴⁵Seera la'oo keeniinsim mat Yesuusina «Losisaancho, at ka'isa wocimminne neese game'llitoolla» yukko.

⁴⁶Yesuusim dabaraa «Ki'nnuwwi kee'mmaalli iyyo mannanne iyyiissakka'a ki'nnuwwaanninne angi maxxaarinnem nakkitakkambee'i bikkina Seera laqqakkam keenina aayye!

⁴⁷Ki'nnuwwi anno'i hiraagaano shito'ookko. Ee kee'n waamma wereeggissakkam bikkina ki'nnuwwina aayye!

⁴⁸Ki'nnuwwi anno'i shito'i kee'n waamma wereeggissakkam bikkina ixxuwwi jor baxonne iittantakko'isa moo'issakkamuulla.

⁴⁹Ee bikkina Waa'ik qooroom ‹An ixxuwwina hiraagaanoo asse'amaanoo asse'oommo. Ee keeniinsim kollo shitamo. Mulli keenom hawwissamo› yoolla.

⁵⁰Ee bikkina uulli qooccamukkaanniinsi ki'isaa dunamu hiraagaa'n xiigina ka doolli manni xa'mmamookko.

⁵¹ Oohim Aabeel xiigiinsi ki'isaa Keesammi mi'n lambe'ennee Waa'ina kitima kitimakkam mu'uxxi lambe'ennee dunamu Zakkaaryaas xiiganne afeebe'ette. Eeyya, an ki'nnuwwina kuroommo; ixxuwwi xiig ka doolli manniinsi miqisamookko.

⁵²Ki'nnuwwi Seera laqqakkam keen lachchika gooca fooqaa'aancho amaddakko'i bikkina ki'nnuwwina aayye! Ki'nnuwwi gagim aaggakko'oyyo. Aagoo keenom qoltakko'ookko» yukko.

⁵³Yesuus ee beyyiinsi mareena ki'ukkaare Seera losisaanii Farisaawe'uwwii ixxi wocoo woshsha sabimmaa kee'mmaalli xa'mmichcha xa'mmimmaa asheetto'o.

⁵⁴Eekkam issitam hee'llo'ok ixxi wocoo woshshinne ixxo digaaddeena hasso'i bikkinatte.