Read Hadiyya Luqaas Mishiraachcha 13 Bible Online

Luqaas Mishiraachcha 13 - Hadiyya bible

Luqaas Mishiraachcha 13

¹Ee ammane mat qax manni Yesuus beyyo waatta'a «Galii'l manni Waa'ina kitima hincaa'llonam Philaaxoos ee manna shukko. Ee manni xiigim ee kitiminne maqirem hamaaramukko» yita'a kutto'o.

²Yesuus ixxuwwina dabaraa «Ee Galii'l uulli mannanne eehido'i leh afukkok mulli Galii'l uulli manni hundiinsim lonsita'a jora baxxo'i bikkina labissakka'atennihe?

³Ee'isayyo; an ki'nnuwwina kuroommo; baaxiilo biira yitakka'a daba'llitakkobeelas ki'nnuwwim ixxuwwisam bi'llakkamo.

⁴Te'im Saalooma yakkam beyyonne kininne baxamu qeeraa'l min hanenne ubaa shu tomminaa sadeenti manchi bikkinaa maha sawwitakkamuulla? Oo manni Yerusaaleemanne hee'llam manni hundiinsim lonsita'a jora baxxo'oka labissakka'atennihe?

⁵Ee'isayyo, an ki'nnuwwina kuroommo; baaxiilo biira yitakka'a daba'llitakkobeelas ki'nnuwwim ixxuwwisam bi'llakkamo» yukko.

⁶Odim Yesuus mat kobi'llishshinne «Mat manchina woyi'n kaashshi woronne kaasaakkoo mat odakkichchi hee'ukko. Oo manchim ee odakkichchika misha hasaa waaraa maham siidukkoyyo.

⁷Ee bikkina oo woyi'n kaashshi annichchi woyi'n kaashshi beyyo baxaanchina ‹Oono'o! An ka odakkichchiinsi misha hasaa sas hiinchi hundoomam daba'llamummo. Ihukkaarem maham siidummoyyo. Ku oda'i mahina kora'am uulla gokkisoolla? Ee bikkina mure› yukko.

⁸Ihukkaarem oo woyi'n kaashshi beyyo baxaanchi ‹Moollanna, ixxeka lugumo shuqunaa fiindaa oreetaa issoommo. Ka maaragoomina ure;

⁹waaroo hiinchina mishukkaare danaamo; mishubeelas muramookko› yukko» yaa kurukko.

¹⁰Usheexxaxxi Ayyaamonne Ayihuxxi manni wixxixxi minenne Yesuus losisam hee'ukko.

¹¹Ee beyyonnem jor ayyaan jabbisaa amadukkaanniinsi tommoo sadeenti hiinchoo ihaakkoo mat meentichcho hee'llo'o. Isem quutatte hee'llo'i bikkina xabbita'a uulliteena hore'em xantam hee'llo'oyyo.

¹²Yesuus ee meentichcho moo'u ammanenne weeshaa ixxi anga isenne issaa «Meentichche, at ki jabbiinsi fayye'llaatto!» yukko. Ee ammanchom oo meentichcho xabbita'a uullito'o. Waa'am galaxxito'o.

¹⁴ Ihukkaarem ee wixxixxi mi'n awwonsaanchi Yesuus ee meentichcho Usheexxaxxi Ayyaamonne fayyiisu bikkina quuqaa minaadabina «Baxo baximmina hasisoo loh balli yookko. Ee lohem ballannem waattakka'a fayye'llehe bagaan Usheexxaxxi Ayyaamonne waattakkotte» yukko.

¹⁵Moollanni Yesuus ixxena dabaraa «Ki'nnuwwi ka labisaano! Ki'nnuwwiinsi ayyim Usheexxaxxi Ayyaamonne ixxeka mirgo'o te'im hallichcho gaadiriinsi tiraa wo'o agiseena massooyyonnihe?

¹⁶Tu meentichcho Abrihaam landichchotte ikka'a hee'llu'uuyyi tommoo sadeenti hiinchoo Sheexaanchi karaa hee'llo'ookkote Usheexxaxxi Ayyaamonne fayye'immi labooyyonnihe?» yukko.

¹⁷Yesuus eekka wocukkaare ixxi maso'i hundim tuutto'o. Manni hundim Yesuus baxu maalalsiisoo luwwi hundannem liiramukko.

¹⁸Yesuusim ixxuwwina «Waa'i adillan maha labookko? Mahindu akeekisoommo?

¹⁹Waa'i adillan mat manchi ixxi uullanne massaa wixu shaa'n sire'i'nnoo'i gootto'i sire'e labookko. Oo sire'i li'aa haqqichchi ihoohaare cii'i ixxi caafanne do'nna baxookko.

²⁰Odim Yesuus «Waa'i adillano mahinne akeekisoommo?

²¹Waa'i adillan mat meentichcho sas qunni qamanne edda'a qufisso'i ursho'o labookko. Oo ursho'i qufisso'i qama hundoomam hufaa'ookko» yukko.

²²Yerusaaleema Yesuus marukkuuyyi beero'uwwannee gattuwwannee losisukkuuyyi higam hee'ukko.

²³Mat manchi Yesuusina «Moollanna! Gatoo keen hofqaxannihe?» yaa xa'mmukko. Yesuusim ixxuwwina

²⁴«Xuqqi goocinne aaggakkeena yaki'llehe. An ki'nnuwwina kuroommo; dut keen aaggeena mixxamo; ihukkaarem xantamoyyo.

²⁵Mi'n annichchi iimaa gooca xufaa lasage u'llummanne uullitakka'a gooca qoccitakku'uuyyi ‹Moollanna! Niina fooqaa'e› yitakkamo. Mi'n annichchim dabaraa ‹Hanniinsi waattakko'ookeenda'e an la'oommoyyo› yookko.

²⁶Ee ammane ki'nnuwwi ‹Neese kiinninne maqirem intaammoo angaammoo. Ni gatti googguwwannem losissaatto› yitakkamo.

²⁷ Ihukkaarem oo mi'n annichchi ‹An ki'nnuwwina kuroommo; hanniinsi waattakko'ookeenda'e an la'oommoyyo. Ki'nnuwwi ku jora baxxakkam keen hundim iinniinsi qee'llehe› yookko.

²⁸ Abrihaama, Yisaaqa, Yaaqoobaa hiraagaan hundaa Waa'i adillanonne moo'llakkamo. Ihukkaarem ki'nnuwwi ee ammane biiranne gattakkamaare ee beyyonne ki'nnuwwina wi'llimmii inqe iicimmii ihookko.

²⁹Odim uulli hundiinsim waatto'i lobakat minaadab Waa'i adillanonne maaddanne afuuttamo.

³⁰ Oono'o! Illag lasag ihookko. Lasagim illag ihookko» yukko.

³¹Ee ammanem Farisaawe'uwwiinsi mat mat keen Yesuus beyyo waatta'a «Heeroodis keese sheena hasu bikkina ka beyyiinsi fittaa mare» yito'o.

³²Yesuusim ixxuwwina dabaraa «Mattakka'a ee hantaaraanchina[22] ‹ «Oono'o! Kaballaa soodoo Sheexaana fissoommo; jabbaanom fayyiisoommo; Saxxi ballannem i baxo guulloommo» yoolla› yitakka'a kullehe.

³³Ihona bagaan kaballa, soodoo insoodoo an Yerusaaleema marimmi hasisookko. Mashka'oomim hiraagaanchi Yerusaaleemanne lehimmi hasisookko bagaan mulli beyyonne hannonnem lehimmi hasisooyyo.

³⁴Yerusaaleemaa! Yerusaaleemaa! Hiraagaano shitoohaanno. Waa'i beyyiinsi ki beyyo asse'anto'i asse'amaanom kininne aphphissaa shitoohaanno; antabaakkichchi ixxi ciicoolla laxxi woronne wixxaa'oo'isam anim ki'nnuwwa wixxaa'eena hasummo. Ihukkaarem at sabbitto.

³⁵ Ee bikkina ki'nnuwwik min diihookko. An ki'nnuwwina kuroommo; ‹Moollanni summinne waarookkok maasse'amaakkoohane› yitakkeebe'e eese moo'llakkamoyyo» yukko.