Read Hadiyya Luqaas Mishiraachcha 14 Bible Online

Luqaas Mishiraachcha 14 - Hadiyya bible

Luqaas Mishiraachcha 14

¹Usheexxaxxi Ayyaamonne Farisaawe'uwwiinsi mat awwonsaanchi mine hurbaata iteena Yesuus aagukko. Ixxuwwim ixxi maha issooda'e egettam hee'llo'o.

²Eekke'em angii lokkii dashshaakkoo mat manchi Yesuus beyyo waarukko.

³Yesuusim Seera losisaaninaa Farisaawe'uwwinaa «Usheexxaxxi Ayyaamonne jabbaano fayyiisimmi hasisoohonnii hasisooyyo?» yaa xa'mmukko.

⁴Ihukkaarem ixxuwwi maham dabatto'oyyo. Yesuusim ee jabbu mancho amadaa fayyiisaa geegeesukko.

⁵ Yesuusim ixxuwwina «Ki'nnuwwiinsi ixxek beet te'im mirgo'i Usheexxaxxi Ayyaamonne barenne ubuta'n qaqqisaa fissoobee'ek ayyette?» yukko.

⁶Ihukkaarem ixxuwwi ee woshshina maham dabatteena xanto'oyyo.

⁷Maaddina weeshanta'a waatto'i keen lob beyyonne afuutteena xoreexxantamisa Yesuus moo'ukko. Ee bikkina weeshanta'a waatto'i keenina kobi'llishshinne

⁸ «Ayyim bollochcho'ina ki'nnuwwa weeshuta'n hundiinsi e'lloo beyyonne afuuttakkotte. Ayla'ukko ki'nnuwwiinsi lophphoo manni weeshamaakkoohan iheena xanookko.

⁹Lamom weeshu manchi waaraa ‹Ka beyyo ixxena fatakihe› yeena xanookko. Ee ammane tuuttaa hoffi beyyonne afuuttootto.

¹⁰Ihukkaarem bollochcho'ina weeshantakkam ammane ki'nnuwwa weeshu manchi waaraa ‹I beshichcho, hanaan higgaa afuure!› yeebe'e hoffi beyyonne afuullehe. Ee ammane ki'nnuwwinne maqire maadda itteena afuutto'i keen hundim ki'nnuwwa lonsitamo.

¹¹ Mashka'oomim ixxi gaga iimiimaa'ookkok hundim sholle'ookko; ixxi gaga hoffiisookkok hundim lomba siixxookko» yukko.

¹²Odim Yesuus maaddina ixxo weeshu manchina «At ballanne te'im hiimonne maadda gudissoo ammane at ixxuwwina issitti luwwa korina dabatta'a miqqam bikkina ki beshshuwwa te'im kiyyabbaayyuwwa te'im ki qarmanna te'im goddaan ki olla'i manna weeshshitte.

¹³Ihukkaarem at maadda gudissoo ammane buxa, angi te'im lokki muramu keeno, shiihuwwaa qooqquwwaa weeshe.

¹⁴Ixxuwwi eekka kiina dabatta'a miqqeena xantambee'i bikkina at maasse'antootto. Eekka xummaan keen lehiinsi ki'llam ayyaamo Waa'i kiina miqookko» yukko.

¹⁵Yesuusinne maqire hurbaata itteena afuutto'i keeniinsi mat Yesuus wocukkoka macceesaa «Waa'i adillanonne maadda itookkok maasse'amaakkoohane» yukko.

¹⁶Ihukkaarem Yesuus ee manchina «Mat ammane mat manchi lobakat maadda gudisaa dut manna weeshukko.

¹⁷Oo maaddi gudu ammanenne ee weeshanto'i kee'n beyyo ‹ «Waallehe! Hundem luwwim gudaakko» yitaa kure› yaa ixxi awwaadaancho asse'ukko.

¹⁸Ihukkaarem oo weeshanto'i manni ee maaddiinsi gatteena mashka'a qooccimma asheetto'o. Ee keeniinsim luxxek ‹An uulla bita'llummi bikkina moo'eena marimmi hasisoohane. Ee bikkina iina urimma issitoo'isina an keese uunxoommo› yukko.

¹⁹Odim mullekim ‹Onti kado'i mirgo'uwwa bito a'llummi bikkina abuullaa moo'eena hasaammo. Ee bikkina iina urimma issitoo'isina an keese uunxoommo› yukko.

²⁰Odim mullekim ‹An idaayyichcho eebummi bikkina mareena xanoommoyyo› yukko.

²¹Ee lasage oo awwaadaanchi waaraa ee woshsha moollannina kurukko. Moollanni eekka macceesu ammanenne lobakata nadadaa ixxi awwaadaanchina ‹Qaqqissaa beero'i bobba'uwwannee googguwwannee fittaa buxa, angii lokkii muramu keeno, qooqquwwaa shiihuwwaa wore› yukko.

²²Oo awwaadaanchim woraa ‹Moollanna, at ijaajjittisam issaammo. Kabadem manni afuuroo beyyi yookko› yukko.

²³Moollannim awwaadaanchina dabaraa ‹Bobba'uuwwannee googguwwannee fittaa i minenne manni wo'mmoo'isa isse.

²⁴An kiina kuroommo; ee luxxeka weeshanto'i manniinsi matim i maaddika suumennem amadooyyo› yukko» yaa kurukko.

²⁵Lobakat minaadab Yesuusinne maqire mattonam ixxuwwi kollonne daba'llaa

²⁶ «Ayyim i beyyo waarookkok ixxi anniinsi, ixxi amaansi, ixxi areensi, ixxi oosiinsi, ixxi abbaayyuwwiinsi, ixxi aayyuwwiinsii ixxi gagiinsii lonsaa eese iittubeelas eese awwoneena xanooyyo.

²⁷ Odim ayyi manchim ixxo lehonne afisoo hawwo iyyaa ballina ballina eese awwonoobee'ek i awwonaanchi iheena xanooyyo.

²⁸Ki'nnuwwiinsi mat manchi kininne qeeraa'l mine baxeena hasuta'n hinkaa'n diinat ee minina hasisooda'e gaassaa shallagoobee'ek ayyette?

²⁹Eehid issubeelas minooma baxeena amadaa lasage guullimma hoogoohaare moo'u manni hundim

³⁰‹Ku manchi mine baxeena asheerukko. Ihukkaarem baxaa guulleena xanukkoyyo› yukkuuyyi gadookko.

³¹Te'im tommi kum gogot yoo adil lamiyyi kum gogota amadaa waaroo adilinne orameena xanooda'e gaassaa afuuraa sawwoobee'ek ayyette?

³²Ixximdu xanoobee'an ihulas ixxenne orameena waaroo adil qee'llonne hee'onam manna asse'aa iittamookko.

³³Ee'isam ki'nnuwwiinsi ayyim ixxena yoo luwwi hundam urubeelas eese awwoneena xanooyyo.

³⁴Odim Yesuus ixxuwwina «Sooqid xee'oohane; ihukkaarem sooqixxek xee'n bi'uta'n hinkid issitakka'a xee'oo'isa issitakkamo?

³⁵Eehido'i sooqid uulla harshiseenam awwaadoobee'i bikkina manni uunjookko. Qoossaa macceesoo macci yookkok macceesona» yukko.