Read Hadiyya Luqaas Mishiraachcha 15 Bible Online

Luqaas Mishiraachcha 15 - Hadiyya bible

Luqaas Mishiraachcha 15

¹ Ee ammane qaraxaanii baaxiilaanii hundim Yesuus wocoo luwwa macceesseena waatto'o.

²Farisaawe'uwwii Seera losisaanii «Ku manchi baaxiilaano aa'oolla; ixxuwwinne maqirem itoolla» yita'a quunquunto'o.

³Ee bikkina Yesuus ixxuwwina kobi'llishshinne

⁴«Ki'nnuwwiinsi matina xibbi gereebbi hee'uta'n ee gereebbiinsi mat gereechchi bi'uta'n honsayyee honsi gereebbaa udma'anne uraa ee bi'u gereechcho siideebe'e haseena maroobee'ek ayyette?

⁵Siidaa lasage liiramaa qo'llonne iyyookko.

⁶Mine afaa lasagem ixxi beshshuwwaa olla'aa weeshaa ‹Bi'aa hee'u i gereechcho siixxummi bikkina iinninne maqirem liirammehe› yookko.

⁷Ee'isam an ki'nnuwwina kuroommo; baaxiilo biira yimmi hasisoobee'i honsayyiinsii honsi xummaaniinsii baaxiilo biira yaa daba'lloo mat baaxiilaanchi bikkina lophphaakkoo liiranchi iimanenne ihookko.

⁸«Te'im mat meentichchona tommi diinaar hee'aa ee diinaariinsi matoom bi'uta'n ee bi'u diinaara siiddeebe'e caakka caakkissa'a mine fii'llu'uuyyi hassambee'i meentichcho hintannette?

⁹Isem siidda'a lasage is beshshuwwaa olla'aa weeshsha'a ‹Bi'u diinaara siixxummi bikkina iinninne maqirem liirammehe› yitamo.

¹⁰An ki'nnuwwina kuroommo; ee'isam baaxiilo biira yaa daba'lloo mat baaxiilaanchi mashka'inne Waa'i asse'amaan liiramookko.

¹¹Odim Yesuus «Mat manchina lam oos hee'ukko.

¹²Ee oosiinsim hoffi beet ixxi annina ‹Iyyanna, ki amaxxiinsi iina afoo luwwa baxxansitaa uwwe› yukko. Annim yoo diinate baxxansaa uwwukko.

¹³Hofqax balliinsi lasage hoffi beet ixxena yoo luwwi hundam amadaa qee'l uulla marukko. Ee diinatem awwaad bee'i luwwanne bi'isukko.

¹⁴Ee lasage ee uullanne jor qaanne'i aagukko. Ihukkaarem ixxena ma'lluchchim hee'ukkoyyo.

¹⁵Ee bikkina ixxi ee uullanne hee'oo mat manchina fo'annano aagukko. Oo manchim ixxo boonke'e allaarona boonke'e allaarakkam beyyo asse'ukko.

¹⁶Oo beetim boonke'i itoo hurbaatiinsi itaa goddeena hasam hee'ukko. Ihukkaarem ixxena eeham uwwookkok hee'ukkoyyo.

¹⁷Oo beet tiiro issu ammanenne ‹Iyyanni minenne baxxam fo'anni hassoqaxa ittamo; an ka beyyonne sibaarinne lehoommuulla.

¹⁸An ka beyyiinsi ki'aa maraa iyyannina «Iyyanna, Waa'aa keesee hawwodaammo.

¹⁹Ka lasage an ki beeto yamameena laboommoyyo. Eesem ki baxaaniinsi matisa issitaa xige» yoommo› yaa ixxi wodanonne sawwukko.

²⁰Ee bikkina ki'aa ixxi anni beyyo marukko. Ihukkaarem oo beet qee'llonne hee'onam ixxi anni moo'aa qishixxaa geeraa waaraa qaaphphaa suunqukko.

²¹Beetim annina dabaraa ‹Iyyanna, Waa'aa keesee hawwodaammo. An ka lasage ki beeto yamameena laboommoyyo› yukko.

²²Ihukkaarem beetina anni ixxi awwaadaanina ‹Qaqqissakka'a hundiinsim doo'l eddechcha eebbakka'a eddeessehe. Angannem quba'a, lokkonnem caamma'a issehe.

²³Intaa liirammonam hundiinsi doo'l di'ir baa'l moora eebbakka'a dullehe.

²⁴Mashka'oomim ku i beet lehaa hee'ukko; ihukkaarem kaba ixxi foor daba'llaakko. Bi'aahim hee'ukko; ihukkaarem kaba siidamaakko› yukko. Ee bikkina ixxuwwim liiramimma asheetto'o.

²⁵«Ee ammane ixxek lob beet bax beyyonne hee'ukko. Ixxim abuulli beyyiinsi waarukkuuyyi mine afeena hincu ammanenne dibbe'ikaa kajjikaa sagara macceesaa

²⁶ixxi anni awwaadaa'nneka mato weeshaa ‹Ku sagar mahane?› yaa xa'mmukko.

²⁷Awwaadaanchim ixxena dabaraa ‹Kiyyabbaayyi waaraakko. Ixxi maham ihoo'n xumminne daba'llaa waaru bikkina kiyyanni hundiinsi doo'l di'ir baa'l moora duraakko› yukko.

²⁸Ihukkaarem oo lob beet nadadaa mine aagimma sabukko. Ixxi annim miniinsi firaa mine aagoo'isina uunxukko.

²⁹Ihukkaarem lob beet annina dabaraa ‹An kiina lobakat hiincho awwaadaammo. Kiina ijaajancham sabummoyyo. Ihukkaarem an i dara'mmanninne maqire liiramona mat wotaram uwwittoyyo.

³⁰Ki amaxxa saa'aanina baqaa bi'isu ku ki beet waarukkaare hundiinsi doo'l di'ir baa'l moora duttaatto!› yukko.

³¹Annim beetina dabaraa ‹I beeto, at hundi ammanem iinninne maqire yoonto. Iina yoo luwwi hundim kiihane.

³²Ku kiyyabbaayyi lehaa hee'ukko; kaba ixxek foor daba'llaakko; bi'aahim hee'ukko; kaba siidamaakko. Ee bikkina neese lobakata liiramimmi hasisookko› yaa dabarukko» yukko.