Read Hadiyya Luqaas Mishiraachcha 16 Bible Online

Luqaas Mishiraachcha 16 - Hadiyya bible

Luqaas Mishiraachcha 16

¹Odim Yesuus ixxi losaanina «Mat goddaanchi manchina ixxi mi'n amaxxa egeroo gassaanchi hee'ukko. Manni ‹Ku gassaanchi ki amaxxa binnaa'oolla› yaa ixxi moollannina kurukko.

²Ixxi moollannim ixxo weeshaa ‹Ku ki bikkina macceesummi luwwi maruwwa? Ka lasage at i luwwa egeraanchi ikkeena xantoobee'i bikkina egeraanchi ikkaa hee'llitti ammane issitti luwwa kure› yukko.

³Oo gassaanchim ixxi wodanonne ‹I moollanni eese baxiinsi fissoo bikkina maha isso? Uulla abuulleena xanoommi malaaybee'e; uunxeenam tuuroommo.

⁴Ee bikkina i moollanni eese baxiinsi fissoohaare manni ixxuwwi minenne eese aa'oo'isina an issoommi luwwa la'oommo› yukko.

⁵«Ixxim moollanniinsi diinate liqaayye aa'llo'i manna annannichchom weeshaa luxxi manchina ‹I moollanniinsi liqaayye aa'llitti diinat hinkaa'nna?› yaa xa'mmukko.

⁶Oo manchim dabaraa ‹mat xibbi jaalo'i[23] zayta› yukko. Ixxim dabaraa ‹Qaqqisonne afuuttaa ki badanchi kitaabamu woraqatanne «Ontayyi jaalo'o» yitaa kitaabe› yukko.

⁷Ee lasage mullaannina ‹Keesenne yoo badanchi hinkaa'nna?› yaa xa'mmukko. Oo manchim dabaraa ‹sor kum kiilogiraam[24] arasa› yukko. Ixxim dabaraa ‹Ki badanchi kitaabamu woraqatanne «Sadee lam kum kiilogiraama» yitaa kitaabe› yukko.

⁸Oo amma'nnamubee'i gassaanchi ixxi gagina issu qooroomina ixxi moollanni galaxxukko. Ka uulli manni ixxuwwina'i ixxuwwi issaqqantam luwwina Waa'i oosiinsi lophphita'a qoolluwwa.

⁹«An ki'nnuwwina kuroommo; ki'nnuwwik diinat beeddoohaare heer heerinam hee'llakkam beyyonne Waa'i ki'nnuwwa aa'oo'isina ka bi'oo diinatinne ka uullanne ki'nnuwwi gagina koba amaddehe.

¹⁰Hoffi luwwanne amma'nnamukkok lob luwwannem amma'nnamaakkoohane. Hoffi luwwanne amma'nnamubee'ek lob luwwannem amma'nnamooyyo.

¹¹Ka uulli diinatenne amma'nnantakkobeelas hanqo'i diinatina ki'nnuwwa ayyi amma'nnookko?

¹²Mulli manni diinatenne ki'nnuwwi amma'nnantakkobeelas ki'nnuwwi luwwa ki'nnuwwina ayyi uwwookko.

¹³ «Mat agishshi lam moollannina ijaajameena xanooyyo. Mato sabaa mato iittookko. Te'im mato lonsaa mato gadookko. Ki'nnuwwim diinatinaa Waa'inaa laminam ijaajantakkeena xantakkamoyyo» yukko.

¹⁴Farisaawe'uwwi diinate iittitam bikkina ee hundam macceessa'a Yesuusanne naacco'o.

¹⁵Ihukkaarem Yesuus ee Farisaawe'uwwina «Ki'nnuwwi manni illagenne ki'nnuwwi gaga xummaan issitakkam keeno. Ihukkaarem ki'nnuwwi woda'nneka Waa'i la'ookko. Manni illagenne danaamo labookkok Waa'i illagenne sabamaakkoohane.

¹⁶ Odim Yesuus «Seerii hiraagaa'n losishshii Xammaqaanchi Yohaannisanne afeebe'e kuramaakko. Yohaannisiinsi kid Waa'i adilla'nnek mishiraachchi sagar kuramoolla. Manni hundim ee Waa'i adillanonne aageena yakoolla.

¹⁷ Ihukkaarem Seeriinsi matichchim bi'ukkaanniinsi iimanii uullii higuta'n sholle'ookko.

¹⁸ Ixxi are hollaa mulleta eebookkok hundim saa'aancho. Is aro'iinsi fitto'ota eebookkokim saa'aancho.

¹⁹Odim Yesuus «Mat goddaanchi manchi hee'ukko. Ixxim lobakata bito xee'aalli eddechcha edde'ukkuuyyi balli hundam makki heechcha hee'am hee'ukko.

²⁰Odim orachchi hundim omaraakkoo Ali'aazara yakkam buxichchim ee goddaanchi manchi u'llummanne ubaa hee'ukko.

²¹Ixxim oo goddaanchi manchi itukkuuyyi leemaatiinsi ubu giggira iteena mixam hee'ukko. Wishim waaraa ixxeka omara aallam hee'ukko.

²²Oo buxichchim lehukkaare Waa'i asse'amaan Abrihaaminne maqirem iimanenne afuussito'o. Odim oo goddaanchim lehaa waammamukko.

²³Ixxim Si'oolanne hawwonne ihaa qee'llonne yoo Abrihaaminne maqire afuuru Ali'aazara daaphphaa moo'ukko.

²⁴Ixxim Abrihaama weeshaa ‹Iyyanni Abrihaama, iina qishixxe! An gii'l laba'n woronne hawwummuuyyi yoommi bikkina Ali'aazar ixxi maxxaara wo'onne cefaa i allabo siggisona asse'e› yukko.

²⁵«Ihukkaarem Abrihaam dabaraa ‹I beeto, at leteena illageen danaam luwwa siixxittisa sawwihe. Ali'aazar odim jor heechchanne hee'ukko. Ihukkaarem kaba ixxi danaam heechchannette; at hee'lloottok kee'mmaalli hawwonnette.

²⁶Eehanniinsi hundiinsim higaa ni beyyiinsi ki'nnuwwi beyyo ki'nnuwwi beyyiinsim ayyim ni beyyo higoobee'isina ni lambe'ennee ki'nnuwwi lambe'ennee malaayyaam baalli yookko› yukko.

²⁷«Oo manchim dabaraa ‹Eehaara'i iyyanna, iina onti abbaayyuwwi yo'o. Ixxuwwim waatta'a ka beyyonne hawwonne aaggambee'isa Ali'aazar maraa ixxuwwina qoxxisaa kurona iyyanni mine asse'lloo'isina an keese uunxoommuulla› yukko.

²⁹Ihukkaarem Abrihaam ixxena dabaraa ‹Ixxuwwina Muse'e kitaabu kitaabii hiraagaan kitaabbo'i kitaabii yookko. Eehanniinsi macceessona› yukko.

³⁰Oo manchim dabaraa ‹Iyyanni Abrihaama, ee'isayyo; mat manchi lehiinsi ki'aa maruta'n baaxiiliinsi daba'llitamo› yukko.

³¹Abrihaamim ‹Muse'ekaa hiraagaa'nnekaa kitaaba macceessobee'aa'lleensi mat manchi lehiinsi ki'aa maruta'nnim amma'nnitamoyyo› yaa dabarukko» yukko.