Read Hadiyya Luqaas Mishiraachcha 17 Bible Online

Luqaas Mishiraachcha 17 - Hadiyya bible

Luqaas Mishiraachcha 17

¹Yesuus ixxi losaanina «Manna baaxiilonne aagisoo luwwi waaroo'n gatooyyo. Ihukkaarem baaxiilina mashka'i ihoo manchi bikkina aayye!

²Ayyim ka hoffi keeniinsi[25] mato baaxiilonne aagisoohaanniinsi ixxi gaanjenne liitimma ka'llaa dambalaqanne ubuta'n e'llookko.

³ Ee bikkina ki'nnuwwi gaga ege'llehe; kiyyabbaayyi baaxiilonne aagulas wocame. Ixximdu baaxiiliinsi saxxaa daba'llulas atim ixxi bi'ishsha haafihe.

⁴Ixxi mat ballanne keese lamar kore hawwodaa lamarem korem ‹Bi'isaammo› yulas lamarem korem haafihe» yukko.

⁵Awwonaan Moollannina «Niina amma'nnato ede» yito'o.

⁶Moollannim dabaraa «Winxo'i shaa'n sireqax amma'nnat ki'nnuwwina hee'uta'n ka oda'a ‹Ka beyyiinsi xoqolantaa dambalaqanne kaasame› yitakko'aare ki'nnuwwina ijaajamookko» yukko.

⁷Odim Yesuus «Ki'nnuwwiinsi matina uulla abuulloo te'im gereebba allaaroo awwaadaanchi yookkok oo awwaadaanchi baxiinsi te'im allaachchiinsi waaroohaare ‹Hurbaata itteena waattaa qaqqissaa afuure› yoohonnihe?

⁸Ee'isa yimma uraa ‹Iina hurbaata gudissaa an itaahii agaahii ki'eembe'e uullitaa iina itisee agisee; ee lasage atim ittoottoo aggoottoo› yookko.

⁹Ijaajamu luwwa issu bikkina ee awwaadaancho galaxxooyyo.

¹⁰Ee bikkina ki'nnuwwim ijaajantakko'i luwwi hundam issitakkam ammane ‹Neese awwaad bee'i awwaadaano; niina uwwamu bax xale'e banxaammo› yi'llehe» yukko.

¹¹Yerusaaleema Yesuus marukkuuyyi Samaare'aanninnee Galii'l uulli lambe'innee higam hee'ukko.

¹²Higukkuuyyim mat gatte aagukkisam oddomachchonne firoo baddisoo jabbi amadaakkoo tommi manninne edamukko. Ixxuwwim waatta'a qee'llonne uullito'o.

¹³Oo mannim sagara iimaa'lla'a «Moollanni Yesuusa, niina qishixxe!» yito'o.

¹⁴ Ixxuwwa Yesuus moo'u ammanenne ixxuwwina «Mattakka'a ki'nnuwwi gaga qeessichchina moo'issehe» yukko. Oo mannim mattu'uuyyim fayye'lla'a muccutto'o[26].

¹⁵Ee lasage ee manniinsi mat fayye'ukkisa moo'aqqu ammanenne sagara iimaa'aa Waa'a galaxxukkuuyyi laso daba'llukko.

¹⁶Yesuusam galaxxukkuuyyi lokkonne ubukko. Oo manchim Samaarekkichchi hee'ukko.

¹⁷Yesuusim «Muccutto'ok tommi manchoyyonnihe? Honsoom hannikko'o?

¹⁸Xale'i ka mulli uulli manchiinsi bagaan daba'llaa waaraa Waa'a galaxxookkok matim bee'ukkonnihe?» yukko.

¹⁹Yesuusim ee manchina «Ki'llaa mare; ki amma'nnat keese fayyiisaakko» yukko.

²⁰Farisaawe'uwwi «Waa'i adillan waarookkok hinki ammane?» yita'a Yesuusa xa'mmito'aare Yesuusim ixxuwwina dabaraa «Waa'ik adillan waarookkok manni egeroo'isinneyyo.

²¹Odim ‹Keyye yookko› te'im ‹Eekke'e yookko› yakkambee'ane. Mashka'oomim adil Waa'i ki'nnuwwi lambe'ennette» yukko.

²²Odim Yesuus ixxi losaanina «Manchi Beet ayyaammuwwiinsi matichchom moo'nnumta'n yitakka'a mixxakkam amman waarookko. Ihukkaarem moo'llakkamoyyo.

²³Mat mat keen ki'nnuwwina ‹Waa'ik adillan keyyette te'im eekke'ette› yitamo. Ihukkaarem ki'nnuwwi mattakkotte. Ixxuwwam awwontakkotte.

²⁴Mashka'oomim banqi belecce'oohaare iiman tochchiinsi tochchonne afeebe'e caakkoo'isam Manchi Beetik waarimmi ballim eehidette.

²⁵Ihukkaarem ixxi gaassaa lobakat hawwo aa'immii ku qaranchi ixxo sabimmii hasisookko.

²⁶ Nohe'i doollenne ihukkisam Manchi Beet waaroo doollennem ee'isam ihookko.

²⁷ Nohe'i markabanne aagaa wo'i hundam bi'iseebe'i afeebe'e manni itukkuuyyii agukkuuyyii, eebukkuuyyii ladiisukkuuyyii hee'ukko.

²⁸ Ee'isam Loox doollennem manni itukkuuyyii agukkuuyyii, bito aa'ukkuuyyii biteesukkuuyyii, kaasukkuuyyii mine baxukkuuyyii hee'ukko.

²⁹Ihukkaarem Soddomiinsi Loox firu ayyaamo giirii diina yakkam luwwii[27] iimaniinsi ga'nnaa manna hundam bi'isukko.

³⁰Manchi Beet waaroo ayyaamom ee'isam ihookko.

³¹ «Ee ayyaamo mi'n iimanenne yoo manchi minenne yoo mu'uta fissaa masseena aagoone. Abuulli beyyonne yoo manchim abuulli beyyiinsi mine daba'lloone.

³² Loox are sawwi'llehe.

³³ Ixxi foore gatixxeena hasookkok ayyim bi'isookko. Ihukkaarem ixxi foore bi'isookkok gatixxookko.

³⁴An ki'nnuwwina kuroommo; ee hiimo mat ara'anne lam manchi iinse'ookko. Ee keeniinsi mat massamookko. Mat gatookko.

³⁵Lam meenti mat ikka'a liittamo. Mate massakkamaare la'mmete gattamo» yukko.[28]

³⁷Ixxuwwim «Moollanna! Hanno massakkamok?» yita'a xa'mmito'aare Yesuusim ixxuwwina dabaraa «Leesh yoo beyyonne ammar dummookko» yukko.