Read Hadiyya Luqaas Mishiraachcha 18 Bible Online

Luqaas Mishiraachcha 18 - Hadiyya bible

Luqaas Mishiraachcha 18

¹Hundem ammanem hooggoo'n Waa'a uunxitamisina kobi'llishsha Yesuus ixxi losaanina kurukko.

²Ixxim «Mat beero'onne Waa'a baddoobee'ekii mannam hamannoobee'ekii mat daanni hee'ukko.

³Ee beero'onnem busar meentichcho balli hundam ee daanni beyyo waattu'uuyyi ‹I lambe'ennee i masokkichchi lambe'ennee yoo woshshanne oogate› yitam hee'llo'o.

⁴Oo daannim oogatimma sabaa lobakat ammane afukko. Ixxim lasaanchonne ‹An maham Waa'a baddumbee'aaree manna hamannumbee'aarem

⁵tu busar meentichcho eese hawwisso'i bikkina isena hanqa oogatoommo. Eehid issumbeelas i beyyo hundi ammanem waatta'a hawwissamo› yaa sawwukko» yukko.

⁶Odim Moollanni Yesuus «Oo boqqi daanni wocu luwwa sawwi'llehe.

⁷Ee'isam ballaa hiimoo ixxi kollonne laattam ixxi minaadabina Waa'i oogatooyyonnihe? Ixxuwwina dasoohonnihe?

⁸An ki'nnuwwina kuroommo; ixxuwwina qaqqisaa oogatookko. Ihona bagaan Manchi Beet waaroo ammane uullanne amma'nnato siidoohonnihe?» yukko.

⁹Odim Yesuus ixxuwwi gaga xummaan issita'a mulli keeno gaddam keenina kobi'llishshinne

¹⁰«Lam manchi Waa'a uunxiteena Keesammi Mine matto'o. Ixxuwwiinsim mat Farisaawekkichchi hee'ukko. La'mmekim qaraxaanchi hee'ukko.

¹¹Farisaawekkichchi uullaa ixxi wodanonne ‹Waa'a! An mulli mannisa bogaanchi ihumbee'i bikkina, jora baxichchi ihumbee'i bikkina, saa'aanchi ihumbee'i bikkinaa te'im ka qaraxaanchisa ihumbee'i bikkinaa keese galaxxoommo.

¹²Anim saantanne lamaagge soommanoommo. Siixxummi luwwi hundiinsim tommiinsi mato kiina uwwoommo› yukko.

¹³Ihukkaarem oo qaraxaanchi qee'llonne uullaa iim moo'eenam baddaa biqe aphphixxukkuuyyi ‹Waa'a! An baaxiilaanchi ihummi bikkina iina haafihe› yukko.

¹⁴ An ki'nnuwwina kuroommo; ee Farisaawekkichchiinsi qaraxaanchi muccuraa ixxi mine elle'ukko. Mashka'oomim ixxi gaga iimiimaa'ookkok hundim sholle'ookko. Ixxi gaga hoffiisookkok hundim lophphookko» yukko.

¹⁵Mat mat manni Yesuus ixxi anginne nakkoo'isina ciilluwwa ixxi beyyo eebbo'aare ixxi losaan eekka moo'llo'i ammanenne manna wocanto'o.

¹⁶Ihukkaarem ciilluwwa Yesuus ixxi beyyo weeshaa «Waa'i adillanonne hee'llam keen kido'i keen ikko'i bikkina ciilluwwi i beyyo waatteena hoottakkotte.

¹⁷Hanqinam an ki'nnuwwina kuroommo; ayyi manchim ciilluwwisa ihaa Waa'i adillano aa'oobee'ek Waa'i adillanonne aageena xanooyyo» yukko.

¹⁸Mat gassaanchi manchi Yesuusina «Er losisaancho! Heer heerina hee'oo heechcha siixxeena maha isso?» yaa xa'mmukko.

¹⁹Yesuusim ixxena «Mahina eese ‹er losisaancho› yitoolla? Matem Waa'iinsi bagaan erok bee'e.

²⁰ Ihukkaarem Waa'ik ijaaj ‹Saa'llitte, shititte, game'llitte, qophphano naqqassittee kiyyannaa kiyyummaa lonsee› yoo'isa laqqootto» yukko.

²¹Oo manchim «Ee hundam oosoommaniinsim ki'isaa egeraammo» yukko.

²²Yesuusim eekka macceesu ammanenne ixxena «Kabadem kiina mat luwwi gataakko. Iimanenne godda siixxiteena kiina yoo luwwa hundam biteessaa diinatooma buxina baxxansitaa waattaa eese awwone» yukko.

²³Ihukkaarem oo manchi lobakata goddaanchi hee'u bikkina Yesuus eekka wocukkaare kichche'ukko.

²⁴Yesuusim ee mancho moo'aa «Goddaan manni Waa'i adillanonne aagimmi hinkaa'nna kee'mmaalla?

²⁵Goddaanchi manchi Waa'i adillanonne aagimmiinsi gaameelakkichchi marfe'i afo'inne firimmi sholle'ookko» yukko.

²⁶Eekka macceesso'i keen «Eehaara'i ayyi gateena xanookko?» yito'o.

²⁷Ihukkaarem Yesuus «Mannina xanamoobee'i luwwi Waa'ina xanamookko» yukko.

²⁸Pheexiroos «Oono'o! Neese ni mine ullaa keese awwonnaammo» yukko.

²⁹Yesuusim ixxuwwina «Hanqinam an ki'nnuwwina kuroommo; Waa'i adilla'n bikkinaa yaa ixxeka mine, are, abbaayyuwwa, annaa amaa te'im ooso urookkok

³⁰ka doollennem ee uru luwwika lam suume siixxookko. Waaroo doollennem heer heerina hee'oo heechcha siixxookko» yukko.

³¹Tommoo lamem losaanoo Yesuus annanni issaa massaa «Oono'o! Kaba Yerusaaleema malloommuulla. Manchi Beet bikkina hiraagaan kitaabbo'i woshshi hundim wo'mmookko.

³²Manchi Beeto mulli minaadabina higisakka'a uwwakkamo. Oo keenim ixxo naaccamoo sholliissamoo. Ixxi hanennem anja tuhitamo.

³³Ixxom gantamo; shitamome. Ihukkaarem sas balliinsi lasage lehiinsi ki'ookko» yaa kurukko.

³⁴Ihona bagaan Yesuus kuru woshshi ixxuwwiinsi daphphaa hee'u bikkina mayyuda'e qoossita'a laqqo'oyyo.

³⁵Iyyaarko'i beero'onne Yesuus hincaakkoohaannonne mat qooq manchi gooqqi inqenne afuuraa uunxam hee'ukko.

³⁶Oo manchi lobakat minaadaphpheka sagara macceesaa «Ku maruwwa?» yaa xa'mmukkaare

³⁷ixxuwwim ee qooq manchina «Naazireexxi Yesuus higoolla» yita'a kutto'o.

³⁸Oo qooqim «Daawiit Beet Yesuusa, at iina qishixxe!» yaa laarukko.

³⁹Illagenne higga'a mattam hee'llo'i keenim «Sa'ihe!» yita'a wocanto'o. Ihukkaarem ixxi «Daawiit Beet Yesuusa, at iina qishixxe!» yaa lonsaa laarukko.

⁴⁰Yesuusim uullaa ixxi beyyo eebakkamisina ijaajukko. Ixxim Yesuus beyyo hincu ammanenne

⁴¹«An kiina maha issona hassootto?» yaa xa'mmukko. Ixxim dabaraa «Moollanna! An moo'eena hasoommo» yukko.

⁴²Yesuusim ee manchina «Ki amma'nnat keese fayyiisaakko; ki illi fooqihona» yukko.

⁴³Ee ammanenne ixxi illi fooqukkaare Waa'a galaxxukkuuyyi Yesuusa awwonukko. Manni hundim eekka moo'aa Waa'a galaxxukko.