Read Hadiyya Luqaas Mishiraachcha 19 Bible Online

Luqaas Mishiraachcha 19 - Hadiyya bible

Luqaas Mishiraachcha 19

¹Iyyaarko'i beero'o Yesuus aagaa eeheenim higam hee'ukko.

²Eehe'em qaraxaanina awwonsaanchi ihu mat Zakkiwoosa yakkam goddaanchi hee'ukko.

³Zakkiwoosim Yesuus hinkanda'e ihukkisa moo'eena hasaa hee'ukko. Ihukkaarem ixxek uullichchi gundi ihu bikkina manni lophphimmiinsi ki'ukkok moo'eena xanukkoyyo.

⁴Yesuus ee googinne higam hee'u bikkina illageen higaa moo'eena geeraa mat odakkichchonne firukko.

⁵Ee lasage Yesuus ee beyyo afu ammanenne iim moo'aa ixxena «Zakkiwoosa, an kaballa ki minenne hoseena hasummi bikkina iimaniinsi qaqqissaa dille» yukko.

⁶Zakkiwoosim qaqqisaa dillaa liiranchinne aa'ukko.

⁷Mannim eekka moo'llo'i ammanenne «Baaxiilaanchi manchi mine koyyinano marukko» yita'a hundim quunquunto'o.

⁸Zakkiwoosim uullaa Moollannina «Oono'o, Moollanna! Iina yoo luwwiinsi buxina kollo uwwoommo. Ayyeensim aphphisansaa aa'aammoo luwwi yoolas soor suum issaa dabaroommo» yukko.

⁹Yesuusim ixxena «Ku manchi Abrihaam beet ihu bikkina kaballa ka mi'n manni gataakko.

¹⁰ Mashka'oomim Manchi Beet waarukkok bi'llo'i keeno haseenattee gatiseenattee» yukko.

¹¹ Mannim Yesuus kobi'llishshinne wocam hee'ukkoka macceesso'o. Ee ammane Yerusaaleema Yesuus afeena ihaa hee'u bikkina Waa'i ixxuwwanne adil ihoo amman afukkoka labissa'a hee'llo'o.

¹²Ee bikkina kobi'llishshinne Yesuus «Mat geejji manchi adillano aa'aa daba'lleena qee'l uulla marukko.

¹³Oo manchim ixxi awwaadaaniinsi tommo weeshaa annannichchinam mat mat xibbi diinaara[29] uwwaa ‹An waareembe'e ka diinatinne daddallehe› yukko.

¹⁴Ihukkaarem ixxi uulli manni ixxo sabbam hee'llo'i bikkina ‹Ku manchi waaraa neesenne adil ihona hansoommoyyo› yita'a ixxi lasonne asse'amaano asse'llo'o.

¹⁵Oo manchi adillano aa'aa daba'llu ammanenne woddaa'i daddattamisina diinate uwwu awwaadaan daddatta'a hinkaa'nna qassiissoda'e xa'mmeena ixxi beyyo weeshisukko.

¹⁶Ee lasage luxxi awwaadaanchi waaraa ‹Moollanna, ki diinat tommi suume qaraakko› yukko.

¹⁷Moollannim ixxena ‹At amma'nnantaattoo er awwaadaancho, danaamisa issitaatto. Hoffi luwwanne amma'nnantaattoohan ikkitti bikkina tommi beero'ina gassaanchi issoommo› yukko.

¹⁸La'mmekim waaraa ‹Moollanna, ki diinat onti suume qaraakko› yukko.

¹⁹Moollannim ‹Atim onti beero'uwwa gassitona daannooma uwwaammo› yukko.

²⁰Ee lasage mullekim waaraa ‹Moollanna, at dissitbee'ekamii massitoo wixxitbee'ekamii muttoo mogaalli manchi ikkittisa la'aa baddummi bikkina suusinne karaa dissummi ki diinat oono'o!› yukko.

²¹

²²Ixxi moollannim dabaraa ‹Kaa jor awwaadaancho, an ki suumiinsi firu woshshinnem keesenne oogatoommo. An dissumbee'ekamii massoommi, wixumbee'ekamii muroommi mogaalli manchi ihummisa laqqoo'isa kuttaatto.

²³Eehaare an daba'llaa waaraa i diinate qarukkaanninnem a'lloommisina mahina daddaraanina uwwittoyyo?› yaa

²⁴ixxi gadanonne uullito'i keenina ‹Diinatooma ixxeensi aa'llakka'a mat xibbi diinaar yoohaannina uwwehe› yukko.

²⁵Ixxuwwim ixxena ‹Moollanna, ixxena eraarem kum diinaar yookko› yito'o.

²⁶ Ixxim dabaraa ‹An ki'nnuwwina kuroommo; yoohaannina ayyenam edakka'a uwwakkamo. Bee'aanniinsi ayyeensim ee yooqaxam massakkamo.

²⁷Ihukkaarem an ixxuwwina adil ihoombee'isa sabbo'i i maso'uwwa keyye eebbakka'a i illagenne shi'llehe!› yukko» yaa kurukko.

²⁸Yesuus ee woshsha wocaa guullaa illageen higaa Yerusaaleema marukko.

²⁹Marukkuuyyim Wee'l Duu'n gadanonne yo'i Beetafaagee Biitaanaa yakkam gatte afu ammanenne ixxi losaa'nneka lamo weeshaa

³⁰«Ki'nnuwwi illagenne yoo gatte mallehe. Ee gatte aaggakkam ammane ayyi manchim saa'llubee'i wotar karamaakkoo siiddakkamo. Ee wotara tittakka'a keyye eebbehe.

³¹Ayyi la'ukko ayyim ‹Mahina tittakkamuulla?› yaa xa'mmuta'n ‹Moollanni hasu bikkinatte› yi'llehe» yaa asse'ukko.

³²Ixxuwwim matta'a hundi luchchim Yesuus yukkisam ihaa siiddo'o.

³³Ixxuwwim ee wotara tittonam ee wota'l anno'i «Mahina tittakkamuulla?» yita'a xa'mmito'o.

³⁴Ixxuwwim dabatta'a «Moollanni hasu bikkinatte» yito'o.

³⁵Ee wotara eebba'a ixxuwwika eddechcha ee wota'l hanenne issita'a Yesuusa saa'llisso'o.

³⁶Ixxim saa'llaa maronam manni liiramaa ixxuwwi eddechcha ixxi illagenne daham hee'ukko.

³⁷Yesuusim Yerusaaleema afeena hincaakkoohaannonne Wee'l duuninne aad dillukkuuyyi lobakat ixxo awwontam hee'llo'i minaadab sagara iimaa'lla'a ixxi issukkuuyyi moo'llo'i maalalsiisoo luwwi hundinam liiranta'a Waa'a galaxximma asheetto'o.

³⁸ Ixxuwwim «Waa'i summinne waaroo adil maasse'amaakkoohane! Xummi iimanenne ihona, lombim Waa'ina ihona» yitam hee'llo'o.

³⁹Ee minaadaphphi lambe'iinsi mat mat Farisaawe'uwwi Yesuusina «Losisaancho! Ka ki losaano ‹Sa'i'llehe!› yitooyyonnihe?» yito'o.

⁴⁰Ixxim ixxuwwina dabaraa «An ki'nnuwwina kuroommo; ixxuwwi sa'itota'nnim ku kinneewwi shuuraa galaxxookko» yukko.

⁴¹Yerusaalee'm beero'o Yesuus afeena ihaakkoohaannonne beero'ooma moo'aa

⁴²«Kaballa kiina xumma eeboo luwwi mada'e ihukkisa qoossitaattoota'n danaam hee'ukko. Ihukkaarem at eekka qoossittoyyo.

⁴³Ki maso'i ki kululleeta ootta'atii fittoo beyyi hundam ifiissa'atii keese kibbita'a u'nnansitam ayyaam waarookko.

⁴⁴Waa'i keese gatiseena waarukkisa at laqqibee'i bikkina oo maso'i keesee ki woronne yoo minaadabaa hundam bi'isookko. Odim ka ki woronne baxamu minneewwikii ootikii mat kinchim beyyonne gatoobee'isa gindookko» yaa wi'llukko.

⁴⁵Yesuusim Keesammi Mine aagaa ee minenne daddattam keeno «Keesammi Kitaabanne ‹I min eese uunxakkam min ihookko› yamamaa kitaabamaakko. Ihukkaarem ki'nnuwwi gamaa'n ma'n issitakko'ookko» yaa Keesammi Miniinsi fissaa hollukko.

⁴⁶

⁴⁷ Yesuusim ballina ballina Keesammi Minenne losisam hee'ukko. Qeessa awwonsaan, Seera losisaanii minaadaphphi awwonsaanii ixxo shiteena hasso'o.

⁴⁸Ihukkaarem lobakat manni ixxi losishsha ma'lluchchim gatoobee'isa macceessam hee'llo'i bikkina shitam googo siiddeena xanto'oyyo.